Sampela Tok i Kam long Olgeta Hap
Lotu i Pundaun Long Wok Bilong En
I gat 15 bisop bilong Misin Katolik long ol kantri long Afrika olsem Burundi, Ruwanda, Tansania, Uganda, Saier, ol i bin tokaut long ol bikpela hevi i kamap long kantri bilong ol. Ol i tok, i gat planti “ol Kristen” i baptais pinis long kantri bilong ol, ‘tasol narapela lain i birua long narapela lain, olsem na ol man i kilim i dai planti manmeri na ol i bin bagarapim ples, na dispela pasin birua i mekim na planti ol i mas ranawe i go long ol narapela hap.’ Ol dispela bisop i tok, ‘ol man i bilong kain kain ples na lain, olsem na dispela i bin kamapim hevi olsem narapela i no inap bilip long narapela, na narapela i pret long narapela, na narapela i bel nogut long narapela. Em ol samting i no stret wantaim bilip Kristen.’ Wanpela nius bilong lotu (Ecumenical Press Service), i kamapim tok bilong ol dispela bisop olsem: As bilong dispela hevi em olsem ‘bilip Kristen i no bin go insait long bel na tingting bilong ol dispela lain man.’
Lapun Tru, Tasol Ol i Mekim Wok
Long Japan i gat tupela lapun meri, em mama i bin karim tupela wantaim, na tupela i gat 100 krismas. Nem bilong wanpela em Kin, na insait bilong dispela nem em “gol.” Nem bilong narapela em Gin, na insait bilong dispela nem em “silva.” Tupela i meri bilong toktok na skin bilong tupela i strong yet na tingting bilong ol i klia. Long Septemba 1991 bikman bilong taun Nagoya i bin bungim tupela taim em i go tok amamas long tupela, long wanem, tupela i lapun tru. Bihain long dispela, tupela i kamap long televisen na long ol nius samting. Tupela i kirap mekim wanpela wok long wokim ol kaset na ol man i baim, na long dispela wok ol i kisim bikpela mani. Olsem na ol i mas go long ofis bilong takis na wokim pepa bilong takis, em namba wan taim ol i bin mekim olsem, long wanem, bipo ol i no bin mekim wok mani samting. Tasol tupela meri ya i no kirap nogut long bikpela mani ol i kisim. Tupela i tok, ol i no gat wok long dispela mani, olsem na bikpela hap bilong dispela mani ol i givim long welfe.
Ol Samting Antap i Ran Stret Long Rot Bilong Ol
Wanpela profesa long wanpela yunivesiti long Inglan, nem bilong em Pol Davis, em i wanpela saveman bilong saiens na em i bin raitim wanpela buk (The Mind of God), na long dispela buk em i tok, em i no ken bilip olsem yumi kamap nating—i gat gutpela as na yumi ol man i stap long dispela graun. Na em i tok moa olsem: ‘Long wok saiens bilong mi, taim mi skelim ol samting antap na dispela ol samting i wok olsem wanem, mi kirap nogut tru, na mi bilip tru olsem i mas i gat wanpela samting i gat bikpela save em i bin wokim ol dispela samting. Ol samting long antap na long graun i no inap tru kamap nating. Tasol em laik bilong wan wan sapos em i laik kolim dispela samting olsem God o nogat.’
Lotu i No Bikpela Samting Long Ol
Wanpela nius Katolik bilong Paris (La Croix), i kamapim tingting bilong sampela man i bin skelim tingting na bilip bilong ol manmeri long 20 kantri samting bilong Yurop. Long i stap bilong ol, lotu i no bikpela samting. Famili bilong ol, na wok mani bilong ol, na ol pren bilong ol, na ol amamas bilong ol—ol dispela samting i bikpela samting long i stap bilong ol. Dispela nius i tok: ‘Long sindaun bilong ol man long nau, ol bilip bilong lotu bilong ol em ol tumbuna i bin bihainim, i no gat strong, na lotu i no gat strong moa long stiaim wokabaut bilong ol.’ Ol man i skelim gut dispela samting ol i tok, ‘ating lotu i no bikpela samting long i stap bilong ol dispela man, long wanem, lotu i no bin mekim wanpela samting bilong helpim ol man long stretim ol hevi bilong ol.’ Dispela nius i tok, ol man i skelim dispela samting i bin givim askim long planti man, na planti i no bilip long ol lotu, tasol ol i bilip long God. Ol i tok: ‘Long kantri Swiden tasol planti man i no bilip long lotu na ol i no bilip long God tu.’
Ol Hevi Bilong Sik AIDS
Wanpela nius bilong Frans i kamapim tingting bilong bikman bilong wanpela dipatmen bilong Wol Helt Oganaisesen, em dispela lain i gat wok long helpim ol lain na bai ol i no ken sik tumas. Ol lain i bin skelim hevi bilong sik AIDS long olgeta hap graun, na dispela bikman, em Dokta Maikel Merson, em i tok, em i pret long dispela sik bai kamapim planti bikpela hevi long sindaun bilong ol man, na bai ol i sot long mani bilong stretim dispela hevi. Dokta Merson i bin go long wanpela kibung bilong Wol Beng long Bangkok long Tailan. Long dispela kibung ol i mekim bikpela tok long sik AIDS, na Dokta Merson i mekim strongpela tok olsem: ‘I no longtaim tumas na planti yangpela na ol manmeri i no lapun yet bai ol i dai long sik AIDS. Dispela bai kamapim bikpela hevi long planti kantri.’ Long Afrika planti manmeri i bin dai long sik AIDS ol i yangpela yet, na planti ol i no lapun yet na ol inap mekim bikpela wok long ples sapos ol i stap laip yet. Long ol liklik ples, planti famili olgeta i bin dai long dispela sik. Ol saveman i ting, kirap long nau na i go inap long yia 2000 samting, inap olsem 6 milion manmeri bilong Afrika bai dai long sik AIDS. Na ol i ting long nau long olgeta hap graun i gat 9 milion i go inap long 11 milion manmeri i gat dispela binatang jem (HIV ) i save kamapim sik AIDS. Na ol saveman i tok, dispela namba bai go antap moa inap olsem 27 milion samting, taim yia 2000 i kamap.
Planti Man i Kisim Dispela Drak
Wanpela nius (The American Journal of Psychiatry) i tok: ‘I no gat narapela drak ol man i mekim bikpela wok long en olsem drak kafin.’ Ol man bilong skelim dispela samting ol i kisim save olsem, bipo ol man i bin dring planti kafin [em marasin i stap long kopi samting] na nau ol i lusim, orait sampela aua bihain, olsem 12 i go inap 24 aua samting, ol i kisim het pen, o skin i les, o ai i laik slip. Na ol dispela hevi long skin inap painim ol inap long wanpela wik samting. Planti man i no strong long lusim pasin bilong dring planti kopi, long wanem, ol i no laik kisim ol dispela hevi. Tasol yumi no ken ting kopi tasol i gat marasin kafin long en, nogat; lip ti, na sampela koldring olsem koka kola, na sampela marasin yumi inap baim long haus marasin, olsem kinin bilong het pen, o bilong kus, o bilong slekim skin, na sampela moa, ol tu i gat marasin kafin long ol. Sampela man i ting, nau ol i no dring marasin kafin, long wanem, ol i lusim pinis kopi o lip ti samting. Tasol taim ol i mas slip long haus sik na ol dokta i mekim wok long sampela marasin i gat kafin long en, bihain ol inap kisim sampela hevi long skin bilong ol, long wanem, skin bai singaut gen long kisim dispela marasin kafin.
Ol Man Bilong Bihainim Mak Bilong Lek
Man bilong raitim wanpela buk (African Wildlife) i tok, sapos ol i no was gut, bai i no gat ol man moa long hap bilong Afrika i gat save long lukim mak bilong lek bilong ol animal samting na bihainim. Man bilong raitim dispela buk (Louis Liebenberg) em wanpela saveman bilong dispela samting, na em i ting dispela save long lukim mak bilong lek bilong animal na bihainim, em bai pinis. Sampela man ol i save tru long mekim dispela wok ol i go lapun na ai bilong ol i go tudak. Na ol man i mekim dispela kain wok ol i no gat nem na ol i kisim liklik pe tasol, olsem na sampela man moa i no laik lain long dispela wok. Sapos ol yangpela i holim yet dispela tingting, olsem wok bilong bihainim mak bilong lek bilong animal em wanpela wok nating, dispela hevi bai stap yet. Nau ol yangpela i laik kisim wanpela wok ol i ting em wok i gat nem na em i gat bikpela pe, winim dispela wok ol lapun bilong ol i save mekim. Tasol man i gat save long bihainim mak bilong lek bilong animal em i mekim bikpela wok, long wanem, i gat planti man i kilim i dai ol animal bilong stilim skin o tit o kom bilong ol. Olsem na dispela man bilong raitim buk i tok, em i gutpela sapos ol man i save, man bilong mekim dispela wok long bihainim mak bilong lek bilong animal em wanpela saveman tru, na wok bilong em i no wanpela wok nating.
Ol i No Laikim Ol Meri
Planti meri long India i go long dokta bambai ol i ken kisim save olsem pikinini i stap long bel bilong ol em pikinini man o pikinini meri. Sapos em pikinini meri, planti ol i askim dokta long rausim bel. Olsem na long sampela provins long India i gat planti man na i no gat planti meri. Olsem: Long Provins Haryana long olgeta 1,000 man i gat 874 meri tasol. Wanpela toksave bilong Yunaitet Nesen i tok, i no olsem ol meri India i no inap karim pikinini meri, nogat. As bilong dispela samting em olsem: Ol i no laik karim pikinini meri, olsem na ol i rausim bel. Long India ol manmeri i ting meri em i putim hevi tasol long famili, olsem: Taim meri i marit, papamama i mas givim pe bilong marit long lain bilong man bilong em. Na tu, taim meri i karim pikinini, famili bilong meri i mas givim ol presen long famili bilong man bilong em. Taim pikinini man i kamap, olgeta manmeri i amamas, tasol sapos pikinini meri i kamap, ol i no amamas. Sapos meri bilong wanpela man i no karim pikinini man, em inap lusim meri, o em bai kisim narapela meri, olsem namba tu meri. Dispela wankain hevi i stap long ol manmeri India i sindaun long ol narapela kantri tu. Olsem na wanpela nius bilong Kanada (The Medical Post) i tok, sampela man i gat tok long sampela dokta long Britis Kolombia long hap i gat planti India i sindaun long en, ol i helpim ol meri India long rausim bel taim ol i save pikinini meri i stap long bel. Tasol meri i gat bel, em i mas wet inap long 16 wik bilong save tru olsem dispela pikinini long bel em man o meri. Olsem na sampela taim dispela pikinini i stap long bel na dokta i rausim, em i no meri, em man. Sapos olsem, ol dokta i no toksave long mama.