Rot Bilong Stretim Bek Graun i Klostu
STEPHEN M. WOLF, em bikman bilong wanpela kampani bilong balus i bin tok: ‘Man i save tingim ol wara na graun na win samting o man i no save tingim dispela samting—olgeta i save, long nau planti bikbus na kain kain pisin na animal samting i laik pinis. Sapos dispela hevi i stap olsem, ating olgeta samting long graun—yumi man tu—olgeta inap bagarap. I gat wanpela savetok olsem: “Yumi man i no as bilong olgeta samting i gat laip, olsem na sapos yumi bagarapim samting i gat laip, yumi bagarapim yumi yet.” ’ Dispela man i tok stret.
Na em i tok moa: ‘Yumi as bilong ol dispela hevi i save kamap, na yumi tasol inap stretim.’ Tok bilong em i no stret olgeta. Tru, yumi save kamapim ol dispela hevi, tasol yumi no inap stretim. Ol man i mekim wan wan samting bilong stretim ol hevi, tasol long olgeta hap planti samting i wok yet long bagarap.
Long yia i go pinis Al Gore i bin raitim wanpela buk (Earth in the Balance—Ecology and the Human Spirit), na em i tok, ol hevi long wara, na win, na graun samting long olgeta hap i wok long go bikpela moa. Na bikpela tok em i kamapim em olsem: ‘Taim mi skelim pasin bilong ol man long bagarapim ol wara, na win, na graun samting, mi save tru dispela i makim olsem bel bilong ol i pas pinis na ol i no pilim ol samting ol i mekim.’
Tru tumas, ol i no pilim liklik olsem ol i bagarapim graun, olsem na ol i no tingim ol gutpela samting long bus na graun na wara. Na ol i no tingim planti tausen kain kain diwai, gras, animal samting, na sindaun bilong ol man na bai ol i no ken sik tumas. Na tu, ol i no tingim tru ol pikinini na tumbuna pikinini bilong ol, em taim ol i go bikpela ol i mas i stap long graun i bagarap olgeta. Na ol i no tingim dispela Man i bin wokim graun na ol samting long en inap long yumi ol man i ken stap gut long en.
Long Aisaia 45:18 Baibel i tok, Jehova “i bin wokim skai na graun i kamap strong tru. Em i no wokim graun bilong i stap nating. Nogat. Em i bin wokim bilong olgeta samting i ken i stap long en.” Bipo tru em i putim man long graun bilong lukautim graun na ol samting long en. Stat 2:15 i tok: “Bikpela i kisim dispela man em i bin wokim na i putim em long dispela gaden long Iden, bai man i ken i stap na lukautim dispela gaden.” God i wokim Adam i stret olgeta, tasol em i bin bikhet na bihainim laik bilong em yet. Em i lusim dispela wok God i bin givim long em long ‘lukautim graun.’
Na inap long nau ol man i pundaun tru long mekim wok bilong lukautim graun, na sampela ol hevi i kamap nau em yumi no inap abrusim. “God i bin makim rot bilong ol manmeri, na ol i no hatwok long bihainim. Tasol ol yet i kamapim planti kain tingting na pasin, na dispela i mekim wokabaut bilong ol i hat tumas.” (Saveman 7:29) “Yupela i manmeri bilong mekim sin tasol. Olsem na yupela i no inap i stap lain pikinini bilong God.” (Lo 32:5) Ol man i bin lusim stretpela pasin na mekim planti rong, ol i no ken stap long graun. Baibel i tok, long taim stret olsem God i makim, em bai larim ‘ol stretpela man tasol i kisim graun.’—Song 37:29.
Jehova i Save Tingim Graun
Taim Jehova i wokim pinis olgeta samting, em i tok, “i gutpela.” Na em i laik bai olgeta samting i stap ‘gutpela.’ Em i bin wokim naispela gaden long Iden na em i putim Adam long dispela gaden bilong lukautim. Ol gras sayor na pikinini bilong diwai samting i stap long dispela gaden i no bilong ol man tasol i kaikai, nogat. God i tok: “Mi givim ol grinpela lip na gras samting olsem kaikai bilong olgeta bikpela na liklik animal na bilong olgeta pisin.”—Stat 1:30, 31.
Sampela lo em lain Israel i bin kisim long Lo bilong Moses em ol lo bilong lukautim graun. Long olgeta 7-pela 7-pela yia ol i mas “larim graun i malolo.” Sapos sampela kaikai i kamap nating taim graun i malolo, papa bilong gaden i no inap bungim, tasol ol wokboi nating bilong em na ol animal inap kaikai long en.—Wok Pris 25:4-7.
Yumi save Jehova i tingim olgeta kain kain pisin, animal samting, na em i no laik ol i pinis olgeta, olsem na em i tokim Noa long kisim tupela tupela animal, man na meri, i go insait long sip. Na Jehova i tingim ol animal pisin samting taim em i givim Lo long ol Israel. Olsem: Ol i no ken kalabusim maus bilong bulmakau taim em i wok long krungutim rais samting bilong rausim skin bilong en. Ol i mas larim em i kaikai liklik taim em i wok. Na ol i no ken pasim bulmakau wantaim donki long hap ain bilong brukim graun na mekim tupela i wok wantaim. Dispela bai mekim nogut long animal i liklik na em i no gat strong. Na sapos bulmakau bilong wantok i lusim banis bilong en na i raun nabaut, ol i mas kisim em i go bek long wantok. Na maski bulmakau i bilong birua o em i de Sabat, ol i mas helpim dispela bulmakau. (Kisim Bek 23:4, 5; Lo 22:1, 2, 10; 25:4; Luk 14:5) Ol inap kisim ol kiau o ol pikinini long haus bilong pisin, tasol ol i no inap kisim pisin mama. Pisin mama i mas i stap bilong kamapim sampela pisin moa. Na Jisas i tok, “ol man i save baim tupela liklik pisin long wan toea tasol. Na Papa . . . i save lukautim gut ol dispela pisin. Sapos em i no laik, orait i no inap wanpela bilong ol i pundaun long graun.”—Matyu 10:29; Lo 22:6, 7.
Man bilong raitim Song i tok: “Heven em i ples bilong God tasol, na em i givim graun long yumi manmeri.” (Song 115:16) Na long Matyu 5:5 Jisas i tok: “Ol man i save daunim nem bilong ol yet, em ol i ken amamas. Bai God i givim olgeta graun long ol.” Olsem wanem? Yu ting God bai givim graun i bagarap olgeta long ol man? Sapos yu gat wanpela naispela haus na gaden na taim yu dai yu laik bai ol pikinini bilong yu i kisim, tasol nau i gat sampela man i sindaun long haus na ol i no lukautim gut bai yu larim ol i stap? Ating bai yu rausim ol na stretim ol samting ol i bin bagarapim, a? Yu no laik ol pikinini i kisim haus na gaden i bagarap, a?
Jehova i bin mekim dispela samting paslain long taim em i kisim ol Israel i go long graun em i bin tok promis long givim long ol. Lain Kenan i mekim planti pasin nogut i gat sem, olsem na Jehova i rausim ol. Tasol em i tokim ol Israel sapos ol i mekim wankain pasin, em bai rausim ol tu. Yumi ken kaunim dispela stori long Wok Pris 18:24-28:
“Yupela i no ken mekim ol dispela pasin nogut [pasin sem long wanblut, man i slip wantaim narapela man o animal]. Sapos yupela i mekim, bai yupela i kamap doti long ai bilong mi. Ol haiden i stap long graun Kenan, ol i bin mekim ol dispela pasin nogut na ol i kamap doti pinis. Na nau mi wok long rausim ol, bilong yupela i ken kisim graun bilong ol. . . . Na mi mekim save long graun bilong ol, na graun i laik trautim ol dispela haiden man bai ol i no stap long graun Kenan moa. Tasol yupela i mas bihainim dispela olgeta lo mi bin givim yupela. Yupela manmeri bilong Israel na ol arapela lain i stap wantaim yupela i no ken mekim pasin bilong ol haiden, long wanem, dispela pasin i sting moa yet na mi no laikim tru. Yupela i save, ol haiden i stap pastaim long dispela graun, ol i bin mekim ol dispela stingpela pasin. Olsem na graun i doti long ai bilong mi. Nogut yupela i mekim olsem. Sapos yupela i mekim, bai graun yet i rausim yupela olsem graun i bin rausim ol haiden i stap paslain long yupela.”
Tasol lain Israel i kirap na mekim wankain pasin ol Kenan i bin mekim. Olsem na Jehova i truim tok bilong em, na em i salim lain Babilon bilong rausim ol Israel na karim ol i go kalabus long Babilon. Paslain long dispela samting i kamap, Jehova i bin salim tok long ol Israel long rot bilong profet Aisaia. Em i tok: “Bikpela bai i bagarapim tru graun na graun bai i stap nating. Em bai i krungutim na . . . graun bai i kamap narakain olgeta. Na em bai i mekim ol manmeri i ranawe i go nabaut. Graun i kamap doti long olkain pasin nogut bilong ol manmeri. Ol i bin givim baksait long ol lo bilong God na sakim tok bilong em na ol i bin brukim dispela kontrak God i bin mekim wantaim ol, em kontrak bilong i stap oltaim. Olsem na God i tok na taim nogut tru i kamap long graun na pinisim tru bikpela lain manmeri, na liklik lain tasol i stap.”—Aisaia 24:1, 5, 6.
Bagarap Bai Painim Ol Man i Bagarapim Graun
Wankain hevi i painim yumi long nau. Ol buk, nius, televisen, video samting i save kamapim pasin nogut bilong planti man, olsem ol pasin i gat sem, na kros pait, na bagarapim man, na pasin giaman long wok politik samting. Planti wok bisnis na kampani samting i gat pasin mangal, olsem na samting ol i wokim inap bagarapim ol wara na win na graun samting. Sampela marasin nogut ol i wokim na i tambu long kantri bilong ol yet, ol i salim i go long ol kantri i stap rabis na i no gat dispela lo, na dispela marasin inap bagarapim skin bilong ol man. Baibel i tok ol Kristen i mas abrusim ol dispela kain pasin:
“Yupela i no ken wokabaut moa long pasin bilong ol haiden. Tingting bilong ol i paul olgeta, na save bilong ol i olsem tudak. Ol i no gat save tru, na bel bilong ol i pas, olsem na ol i stap ausait long laip bilong God. Ol i no save sem moa long pasin ol i save mekim. Ol i go insait tru long pasin nogut, na bel bilong ol i kirap tru long mekim ol kain kain pasin doti.”—Efesus 4:17-19; 2 Timoti 3:1-5.
Tingting na bel bilong ol man i bagarap, na ol wara na win na graun i bagarap. God i bin putim ol lo bilong bosim olgeta samting long graun, olsem na olgeta samting inap stap stret long wok bilong en. Na God i bin givim lo bilong bosim yumi ol man, em maus bilong bel. Tasol yumi olgeta i man bilong sin, olsem na bel bilong planti man i no kotim ol moa na em i save giamanim ol. Olsem na ol dispela kain man i no tingim samting ol i mekim bilong bagarapim ol samting bilong graun, olsem ol wara na win samting. God tasol inap bosim ol man na stretim dispela graun. Na Baibel i tok Jehova bai mekim olsem taim em i “bagarapim ol man i bin bagarapim graun.”—KTH 11:18.