Olsem Wanem? Ol Dispela Lotu i Gat Stretpela Tingting?
BILONG kisim stretpela tingting long dispela hevi bilong rausim bel, planti ol i askim pris pasto long en. Ol i gat wanem tingting?
Misin Katolik i strong long meri i no ken rausim bel. Ol i tok, pikinini i stap laip taim melek bilong papa i bung wantaim kiau bilong mama long bel. Sampela pris i insait long wok politik i bin askim pop long rausim long lotu ol man politik em ol i bilong lotu Katolik na ol i orait long meri i rausim bel. Tasol planti Katolik i orait long meri i rausim bel na ol i strong long misin i mas senisim tingting bilong en long dispela samting.
Long Misin Presbitirian long Amerika, 46 pesen bilong ol pasto i tok, ‘Baibel i no tambuim pasin bilong rausim bel.’ Lo bilong misin i orait long meri i rausim bel.
Namba 16 Bikpela Kibung bilong Yunaitet Sios Bilong Krais i ‘orait long ol manmeri i ken wokim famili-plening. Na sapos gavman i no tambuim pasin bilong rausim bel na meri i no ken kisim bagarap long en, misin i orait long meri i rausim bel olsem wanpela rot bilong mekim famili-plening.’
Lo bilong Misin Evanjelikal Luteran i tok, ‘sapos i no gat tru narapela rot, rausim bel i orait.’ Tasol ol i no laik tru long tok, rausim bel i gat ‘rong,’ o ‘pikinini i kirap taim meri i kisim bel.’
Misin Sauten Baptis Konvensen i strong long meri i no ken rausim bel. Tasol Misin Amerikan Baptis i tok: ‘Mipela i no wanbel long lo bilong misin na lo bilong gavman long pasin bilong rausim bel. Olsem na mipela i orait long wan wan yet i ken tokaut long bilip bilong em yet long dispela samting.’
Lotu Juda i no wanbel long dispela samting. Sampela olsem ol Otodoks Juda i no orait long meri i rausim bel, tasol ol Rifom Juda na Konsevativ i orait long en.
Lotu Islam i tok, meri i gat bel 40 de, em inap rausim bel, maski wanem as bilong en. Tasol bihain long 40 de i gat wanpela as tasol na em inap rausim bel—sapos mama yet inap bagarap. Lo tumbuna bilong ol i tok, mama i kisim bel ‘40 de, i olsem wanpela liklik samting tru long bel bilong em; narapela 40 de bihain em wanpela liklik hap blut; narapela 40 de bihain em wanpela liklik hap skin. Nau wanpela ensel i kam na winim win bilong laip i go insait long pikinini.’
Lotu Sinto i no gat lo na i tok, em laik bilong man na meri sapos ol i laik rausim bel o nogat.
Ol Hindu na Buda na Sik i tok laip bilong man i bikpela samting. Tasol ol i no insait long tok pait long rausim bel i stret o nogat, long wanem, ol i bilip olsem taim tewel bilong daiman i lusim skin em bai kam bek long skin bilong narapela man samting. Olsem na ol i ting sapos meri i rausim bel, tewel bilong pikinini bai kamap long narapela laip.