Insait Bilong Ol Tok i Kam Long Olgeta Hap
Rot Bilong Save long i Stap Bilong Bipo?
Inap sampela mun i go pinis, ol i bin painim 3-pela yangpela haiskul meri ol i hap indai na i slip long rot long Tokusima, long Japan. Ol i bin wok long kilim i dai skin bilong ol yet. Bilong wanem ol i mekim olsem? Wanpela nius (Asahi Shimbun) i tok: ‘Ol i bilip olsem ol i bin i stap bipo olsem pikinini meri bilong king, na ol i ting sapos ol inap mekim na klostu ol i dai, bai ol inap save long dispela i stap bilong ol long bipo.’ Dispela nius i tok, as bilong dispela samting em ‘ol yangpela long nau ol i laik kisim save long ol samting i stap hait, olsem ol samting bilong ol spirit, na dispela pasin i wok long i go bikpela long nau.’ Oltaim dispela 3-pela yangpela meri i bin wok long kaunim ol komik buk i stori long yumi bin i stap bipo na nau yumi kamap nupela.
Tasol dispela kain bilip i no inap helpim yumi. Baibel i tok, taim ol man i dai, “ol i tanim i kamap graun gen. Na long dispela taim ol i no inap mekim olgeta samting ol i bin tok long mekim.” (Buk Song 146:4) Planti man i bilip olsem ol i gat tewel, na taim ol i dai, skin tasol i dai na tewel i stap laip yet. Dispela bilip giaman i mekim na ol man i no bilip long tok bilong Baibel, em Baibel i tok taim man i dai, em i dai tru na i no gat wanpela hap bilong em i stap laip yet; em i no i stap moa, olsem na em i no inap mekim wanpela samting. (Saveman 9:5, 10) Tasol ol man i dai pinis na God i tingim ol, ol bai kirap bek. (Jon 5:28, 29) Baibel i kamapim as bilong dispela tok giaman olsem man i gat tewel, na man i dai em bai kamap nupela gen, as bilong en em Satan, em i “papa tru bilong pasin bilong tok giaman.”—Jon 8:44; lukim Stat 3:4.
Ol Katolik na Pasin Bilong Rausim Bel
Klostu tenpela yia bipo ol Itali i bin vot na orait long pasin bilong rausim bel, na nau lo bilong gavman i orait long dispela pasin, maski Misin Katolik i no orait long en. Tasol long taim bilong yumi, ol bisop long Itali i raitim sampela tok long wanpela pepa, na ol i kamapim tok bilong ol bikman bilong Misin Katolik, em ol i tok, ‘Lo i stap long bel bilong olgeta man i makim olsem pasin bilong rausim bel i gat bikpela rong, na sapos man i orait long mekim dispela pasin, em tu i gat bikpela rong, na lo bilong Misin tu i tok olsem. Ol i save rausim long Misin ol meri i rausim bel na ol man i wok wantaim ol long mekim dispela pasin nogut.’
Ol Itali i ting olsem wanem long pasin bilong rausim bel? Sampela i bin givim askim long 2,040 manmeri long Itali bambai ol i ken save long tingting bilong ol long pasin bilong rausim bel, na ol dispela manmeri i tok, i gat 4-pela samting inap kamap na bai i orait long meri i rausim bel, maski Misin i tambuim dispela pasin. Dispela 4-pela samting, em olsem: (1) sapos mama i gat bel na em inap i dai, i orait long em i rausim bel (83 pesen i tok olsem), (2) sapos dokta i ting skin bilong pikinini i kamap nogut insait long bel bilong mama, i orait long mama i rausim bel (76.3 pesen i tok olsem), (3) sapos meri i gat bel na dispela samting inap bagarapim skin bilong em, i no gat rong sapos em i rausim bel (71.1 pesen i tok olsem), (4) sapos man i bagarapim meri na nau em i gat bel, i orait long em i rausim bel (55.2 pesen i tok olsem). Wanpela nius (La Repubblica) i tok, long olgeta 4-pela 4-pela Itali, wanpela i tok, ‘Sapos meri i laik rausim bel, i no gat rong long dispela.’ Long olgeta yia long Itali, inap olsem 300,000 meri i rausim bel. Ol i go long haus sik o long dokta, em gavman i makim, o ol yet i mekim wanpela samting, em gavman i no orait long en.
Samting i kamap ples klia em olsem: Long ol kain samting olsem, ol bikman bilong Misin Katolik ol i no bin lainim gut ol manmeri long ol tok bilong Baibel bambai ol i bihainim tok. Tasol ol Kristen tru i save pinis long tok bilong Baibel long dispela bikpela samting. Ol i tingim strongpela lo bilong Baibel na ol i no save rausim bel. Nogat tru.—Kisim Bek 21:22-25; lukim tu Buk Song 139:14-17; Jeremaia 1:5.
Ol i Pilai Laki na Ol i Lus
Long olgeta 14 milion 14 milion manmeri i baim laki tiket, wanpela tasol i save win. Tasol wanpela nius bilong Kanada (The Globe and Mail ) i tok, planti milion manmeri ol i save insait long pasin laki, em gavman i as bilong en. I gat wanpela samting tasol i kirapim ol man long baim laki tiket, em ol i tingting long win. Long ol nius na long televisen i gat planti tok bilong grisim ol man long baim laki tiket. Ol i save stori long ‘ol gutpela samting man inap kisim sapos em i win, na ol samting nogut inap painim em sapos em i no baim laki tiket.’ Ol man i gat bisnis long laki tiket, ol i laik kisim sampela profit mani bilong ol yet, na ol i laik bai wan wan man tasol i win, olsem na long olgeta de ol i wok strong long kirapim planti man long baim laki tiket long olgeta taim.
Olsem wanem? Planti man moa i baim laki tiket? Tru tumas ol i mekim. Long wanpela nius (American Health), wanpela dokta (Durand Jacobs) i stori long pasin bilong baim laki tiket i go bikpela namel long ol yangpela, na em i tok, ‘planti yangpela i baim laki tiket, long wanem pe bilong dispela tiket i no bikpela tumas, na i no hatwok long kisim, na i no gat lo i tambuim dispela samting. Pastaim ol i baim ol laki tiket, tasol bihain ol i kirap mekim ol narapela kain pasin bilong pilai laki.’ Wanpela bikman bilong Kanada em i tok, ‘Sapos man i tok pasin bilong baim laki tiket em i no wanpela kain pasin bilong pilai laki, dispela man em i longlong. Ol manmeri i save tromoi bikpela mani tru long baim ol laki tiket, long wanem ol i tingting long kisim planti mani moa. Tru tumas, pasin bilong baim laki tiket em i wanpela kain pasin bilong pilai laki.’
Pasin bilong baim laki tiket i kirapim man long tingim tumas mani. Presiden bilong wanpela lain bilong pinisim pasin bilong pilai laki (em Dokta Marvin Steinberg, bilong Connecticut Council on Compulsive Gambling) em i tok, ol yangpela i save tromoi mani bilong baim kaikai long baim laki tiket, o ol i stilim mani, o ol i stilim samting bilong stua, bambai ol i gat mani bilong baim. Tok bilong Pol i stret, em i tok, “Pasin bilong laikim tumas mani em i as bilong olgeta pasin nogut. Sampela man ol i bin laikim tumas mani, . . . na ol i karim bikpela hevi moa.”—1 Timoti 6:9, 10.