Samting Bilong Amamas o Samting Nogut Bilong Bagarapim Tingting?
Long wanpela bung bilong ol string-ben wanpela man bilong singsing i putim wanpela meri long wanpela bokis. Nau em i kisim tamiok na brukbrukim dispela bokis. Blut giaman i sut i kam ausait na paitim maus bilong dispela man. Nau em i kirap na spetim dispela blut giaman long ol man i lukim dispela samting.
Long 1984 wanpela yangpela man i gat 19 krismas i kilim i dai em yet long gan. Papamama i tok, wanpela singsing (“Suicide Solution”) i kirapim em long mekim olsem.
Wanpela nius bilong ol yangpela i stori long ol pasin sem wanpela string-ben i bin mekim taim ol i wokim singsing long studio. Na insait long karamap bilong plet singsing i gat wanpela bikpela pepa bilong pasim long banis. Em piksa nogut long sem bilong man na meri.
PAIT, kilim i dai skin, pasin sem—em sampela samting ol plet singsing bilong rok-musik, na ol singsing long video, na ol bung bilong string-ben i save kamapim. Taim ol man i gat tok long ol dispela musik nogut o kotim ol, ol man bilong singsing na ol kampani i mekim wok bisnis long ol dispela singsing ol i painim rot bilong tok ol i no gat asua. Na wanpela piksa nogut ol i malenim i strongim wanpela tok olsem, ‘tingting bilong planti man long Amerika i nogut na dispela kain tingting i wok long bagarapim ol.’ I wankain long sampela singsing ol i tok bokis long gan na naip, na ol i makim sem bilong man. Nau ol i no haitim moa—ol i tokaut klia, gan na naip i makim tru sem bilong man.
Ating ol man bilong singsing na ol kampani i kamapim ol dispela singsing i no kot, tasol samting ol i mekim i no save giamanim olgeta man. Olsem wanem long yu? Yu save—pait na pasin sem na pasin bilong lotuim Satan, ol i bikpela samting long rok-musik ol man i laik baim long nau?
Musik Hevi-Metal na Rap
Inap planti yia nau i gat kain kain rok-musik i bin kamap. Tasol long nau planti man i no amamas long tupela kain musik, em musik hevi-metal na rap, long wanem, em i save kamapim ol pasin sem.
Musik hevi-metal i save pairap strong. Wanpela nius (Time) i tok: ‘Ol man i kamapim musik hevi-metal i save amamasim planti yangpela man, na singsing bilong ol i mekim na long ai bilong ol yangpela ol dispela man i olsem ol man i givim baksait long ol man i mekim pasin nogut.’ Planti singsing bilong musik hevi-metal i bilong mekim ol man i kirap nogut, na ol i kamapim ol tok doti, em yumi sem long toktok long en. Wanpela nius bilong ol dokta long Teksas i tok, musik hevi-metal i save litimapim ‘tingting nogut bilong ol man long maritpasin, na pait, na birua, na ol samting bilong ol spirit nogut.’
Na planti man i tingting planti, long wanem, musik hevi-metal i save poromanim kros pait. Olsem: Wanpela taim ol i pasim wanpela bung, long wanem, man bilong singsing i gat sik, na nau ol man long dispela bung i no amamas. Ol i kirap na pait na kukim ples bung. Long narapela bung, 3-pela yangpela i bin dai taim planti tausen yangpela i subim ol narapela long go klostu long pletfom ol man i sanap long en na singsing. Olsem na sampela yangpela i stap long poret ol i pundaun na ol narapela i krungutim ol long lek.
Planti blakskin i save kamapim rap-musik, tasol ol waitskin tu i save laikim dispela kain musik. Dispela musik i pairap nating na i no gat singsing; ol i kolim tasol ol tok. Sampela tok bilong rap-musik i no orait long ol man i mekim pasin sem long pikinini o kisim ol drak. Tasol planti tok bilong en i stori long pasin bikhet, pait, birua long ol meri, bel nogut long man bilong narapela skin, tok doti, ol tok doti bilong ol samting bilong maritpasin.
Sampela taim ol pait i kamap long ol bung bilong rap-musik. Long wanpela bung 300 bikhetman bilong wanpela lain i paitim sampela man. Nau ol dispela man i kirap na holim ol sia ain na paitim ol. Pait i go i go inap long taim polis i kam. Long dispela pait 45 man i bin kisim birua.
Long 1992 wanpela lain polis (Sheriffs Association) bilong Nu Yok i tambuim ol man long baim wanpela samting bilong wanpela kampani (Time Warner Inc.), inap long taim ol i rausim wanpela singsing nogut long ol stua bilong ol, em singsing rap “Cop Killer” [“Kilim Polis”]. Man i bosim dispela lain polis (Peter Kehoe) i tok: ‘Dispela singsing i kirapim ol man long birua long polis na em i save litimapim pasin bilong kilim i dai ol polis. Dispela singsing bai mekim na sampela polis inap dai.’ Bihain kampani i tekewe dispela singsing long ol stua bilong en.
Dispela Musik Inap Mekim Wanem?
Taim ol man i singsing long samting nogut o kamapim pasin nogut long ai bilong ol man taim ol i singsing, dispela samting i mekim wanem long ol man i harim singsing bilong ol o lukim samting ol i mekim? Tingim ol dispela samting:
Profesa Carl Taylor bilong Misigen Stet Yunivesiti i tok, rok-musik i gat ‘pasin bilong en yet, na ol man bilong singsing i gat strong moa long stiaim wokabaut bilong ol yangpela.’
Wanpela manki klostu em i kilim i dai em yet, em i tok, dispela musik i mekim na em wantaim pren bilong em (pren i bin kilim i dai em yet), i ting ‘indai em rot bilong winim ol hevi.’
Long 1988 tripela yangpela i laik painim amamas, olsem na ol i kilim i dai wanpela pren bilong ol. Wanpela bilong ol yangpela i tok, musik hevi-metal i kirapim ol long tingim indai i olsem nambawan samting.
Bihain long wanpela bung bilong rap-musik ol yangpela i raun na brukim ol windo. Bikman bilong wanpela lain i save lukautim ol man long taun Pitsbek, Pensilvenia, em i tok: ‘Mi no gat tupela tingting long rap-musik. Mi save em musik bilong kirapim man long pait.’
Taim ol i skelim sampela yangpela na ol lotu bilong Satan, ol i kisim save olsem: Planti ol i insait long dispela pasin bilong lotuim Satan—ol i save kisim ol drak na harim musik hevi-metal olgeta taim. Dispela musik i save litimapim pasin bilong kisim drak na mekim pasin pamuk. Wanem samting i kamap long dispela? Planti yangpela i save go insait long lotu bilong Satan.
Ating yumi no ken tok em musik tasol i mekim na ol yangpela i kisim ol drak, o mekim pasin raskol, o kilim i dai skin bilong ol. Planti famili i bruk na planti hevi i kamap long olgeta lain man, olsem na dispela tu i mekim na ol yangpela i bihainim pasin nogut. Tasol musik inap kirapim ol yangpela long mekim sampela samting nogut bipo ol i no bin ting long mekim. Sapos planti hevi i painim wanpela man na em i bel hevi, yu ting i gutpela sapos em i harim musik i save kirapim man long pait na bagarapim man o bagarapim em yet? Nogat, a?
Musik nogut inap bagarapim tingting bilong ol man. Na planti man i givim bel tru long ol man bilong singsing, i olsem ol i lotuim ol, olsem na ol tok bilong singsing bilong ol i gat strong tru.
Olsem Wanem Long Yu?
Yu save harim wanem kain musik? Gutpela tru sapos yu skelim musik yu save harim. Tasol sapos yu save harim ol singsing nogut i gat toktok bilong pasin sem, olsem wanem? Em i bin bagarapim tingting na pasin bilong yu? Sapos em i no bin bagarapim pasin bilong yu, olsem wanem long tingting na bel bilong yu? Sapos yu harim harim gen ol singsing nogut, dispela inap mekim na bai yu ting i no gat rong long harim dispela kain musik.
Tingim wanpela yangpela man Kristen. Em i mekim ol wok Kristen, tasol em i save harim ol musik hevi-metal na rap. Dispela i no bin kirapim em long kilim i dai man o kilim i dai em yet o lotuim Satan, tasol dispela i mekim wanem long tingting bilong em? Em i tok: ‘Dispela kain musik em musik nogut tru. Long skin dispela musik i larim mi i stap isi na mekim ol wok bilong mi, tasol tingting bilong mi i no stap isi. Mi tingim ol samting nogut i gat pasin sem na ol samting bilong pait. Mi inap tingting nabaut long ol samting nogut. I no gat wanpela de mi no bin tingting strong long kilim i dai skin bilong mi.’ Bihain em i pasim tok long em i no ken harim moa dispela kain musik. Taim em i mekim olsem, tingting na pasin bilong em i wok long senis na kamap gutpela.
Maski rok-musik i gat ol tok na pasin nogut long en, ol man i save laikim dispela musik nogut. Ol bai litimapim nem bilong en. Tasol yu gat wanem kain tingting long dispela kain musik? Yu inap pasim yau na ai long ol tok na pasin nogut bilong en? Yu inap go long ol bung bilong singsing olsem ol bung dispela stori i toktok long en na yu no pret long hevi bai painim yu? Na olsem wanem long pasin nogut bilong ol man i kamapim o harim dispela kain musik?
Sapos yu save tingim skin bilong yu, ating yu no inap kaikai ol samting i save bagarapim skin, maski i swit tumas long maus bilong yu, a? I wankain long olgeta musik nogut. Dispela musik inap bagarapim tingting bilong yu. Olsem na yu ken mekim wanem bilong kisim stretpela tingting long musik? Em i gutpela sapos yu kaunim ol tok bilong stori i kam bihain long dispela.
[Blok/Piksa long pes 6]
Lotuim Satan Em Wanem Kain Lotu?
Singsing bilong sampela musik hevi-metal i save kirapim ol man long lotuim Satan, tasol dispela i no samting bilong pilai—em inap bagarapim ol. Wanpela nius (Texas Medicine/The Journal) i stori long sampela pasin ol man bilong dispela lotu i mekim, olsem ‘katim skin bilong ol bilong dringim blut na mekim ofa long ol animal.’ Ol man i insait long lotu bilong Satan ol i ‘givim bel tru long Satan, na ol i mekim sampela pasin bilong kisim strong long Satan. Ol inap bihainim laik bilong ol yet na mekim wanem wanem samting ol i laik mekim, long wanem, ol i no bilip long God na bel i no kotim ol.’ Olsem na sampela man long dispela lotu i save mekim ol pasin nogut na ol i no sem.
[Piksa long pes 5]
Yu no save kisim kaikai nogut long dram pipia na putim insait long bel bilong yu, a? Nogut yu putim ol samting nogut long tingting bilong yu
[Piksa long pes 7]
Sapos yu go long kain bung olsem, yu ting em inap mekim gut bel bilong yu?