Musik Bilong Nau—Abrusim Ol Hevi Bilong En

SAMPELA i tok em i bikpela samting long skelim rok-musik, i gutpela o nogat, na sampela i tok em i no bikpela samting. Na sampela i tok dispela kain musik i save nogutim ol yangpela. Maski ol man i gat wanem kain tingting long musik, sapos yu wanpela Kristen, namba wan samting yu mas tingim i olsem: Musik inap mekim wanem long pasin pren i stap namel long yu na God?

Kristen i mas larim Baibel i stiaim tingting na wokabaut bilong em. Baibel inap helpim Kristen long save wanem ol samting i stret na i no stret long sindaun bilong em, na long ol samting bilong amamas tu. Sapos yu bihainim ol tok bilong Baibel dispela bai helpim yu long abrusim ol samting nogut. Na tu, sapos Kristen i no harim Tok bilong God, God i no ken orait long em. Olsem na ol lo long Baibel i save helpim Kristen long skelim gut ol musik. (Song 43:3; 119:105; 2 Timoti 3:​16, 17) Wanem ol dispela lo bilong Baibel?

Tingting Gut

Baibel i tok: “Yumi no ken strong tumas long bihainim stretpela pasin na long kisim gutpela tingting. Nogut yumi bagarapim yumi yet.” (Saveman 7:16) Olsem na taim yu laik tromoi wanpela kaset long wanem yu ting em musik nogut, tingim​—tru em musik nogut o em wanpela kain musik yu no save laikim? Ating i gat wanpela musik yu no laikim, tasol i no olsem em musik nogut.

Tasol yumi mas tingim gut tok bilong Saveman 7:​17, 18: “No ken strong tumas long bihainim olkain pasin nogut na ol longlong pasin. Nogut yumi hariapim dai bilong yumi. . . . Sapos man i aninit long God, orait maski em i mekim wanem samting, dispela bai i kamap gutpela tasol.”

Olsem wanem sapos wanpela Kristen i save harim ol musik i kirapim ol man long pait, birua long man bilong narapela skin, mekim pasin pamuk, lotuim Satan, kilim i dai skin bilong em yet? Efesus 5:​3, 4 i tok: “Yupela i no ken mekim pasin pamuk na olgeta kain pasin doti, na yupela i no ken mangalim ol samting bilong ol arapela. Tok bilong ol dispela pasin tu i no ken kamap liklik namel long yupela. I no inap yumi manmeri bilong God i toktok long ol dispela kain pasin. Yupela i no ken mekim tok doti na tok kranki na tok pilai nogut.” Tru tumas, sapos yumi laik stap pren bilong God, yumi no ken painim ol amamas nogut. Yumi no ken tok, sapos yumi no mekim pasin nogut i orait long harim o lukim samting nogut. Nogat.

Sapos yumi harim tok bilong ol singsing, yumi inap save wanem ol singsing i stret long ol lo bilong Baibel, a? Tasol yumi no ken tingim ol tok tasol bilong ol singsing, yumi mas tingim ol pasin dispela ol singsing i save kirapim. Kaunim Galesia 5:19 i go inap 23 long Baibel bilong yu, na tingim wanem ol pasin dispela ol ves i makim na ol i kamap long ol singsing yu save harim​—ol i kamapim ol “pasin bilong olpela bel”? Sapos olsem, yu save pinis long tingting bilong Jehova long dispela samting, a?

Sapos wanpela Kristen i laik lotuim Jehova tasol em i save laikim ol musik nogut, em bai save, narapela pasin bai pait wantaim narapela pasin. Na tok bilong 2 Korin 6:​14-17 i truim dispela tok: “Olsem wanem, stretpela pasin na pasin bilong sakim lo tupela i ken wok bung wantaim? Olsem wanem, lait i ken bung wantaim tudak? Ating Krais i save stap wanbel wantaim Satan, a? Man i bilip long Krais na man i no bilip, tupela i ken holim wanpela kain tingting, a? . . . ‘Yupela i mas lusim ol, na i go i stap long narapela hap. . . . Lukaut gut, nogut yupela i pas long ol samting i no klin long ai bilong God.’ ”

Olsem na ol man i laik stap pren bilong God ol i mas bihainim dispela tok bilong Baibel. Sapos yu tingim ol lo bilong Baibel i bikpela samting, orait, yu mas skelim gut olgeta singsing na musik yu save harim. Skelim gut olgeta wan wan plet singsing na video samting yu save holim. Na sapos sampela i no stret wantaim ol lo bilong Baibel, olsem ol i kamapim ol pasin nogut, orait​—tromoi. Sapos yu gat tupela tingting long wanpela singsing, mobeta yu tromoi. Yu mas mekim wankain samting tu long ol samting yu kaunim o samting yu go lukim, olsem ol string-ben. Sapos ol dispela samting i no kamapim stretpela pasin, nogut yu harim o kaunim o go lukim.

Sampela i Ting i Orait Tasol

Sapos ol musik yu save laikim i no gutpela tumas na i save sakim sampela lo bilong Baibel, yu mas tingting gut. Sampela ol i pundaun long dispela samting na ol i painim rot bilong helpim pasin nogut bilong ol. Sapos dispela samting i painim yu, orait, yu mas tingting gut: Tingting bilong yu long dispela musik i stret? o bel bilong yu i save laikim na yu gat dispela tingting? Orait, nau yumi ken skelim tok bilong sampela na bai yumi save, bel i giamanim ol. Sampela i tok olsem:

I orait long mi harim dispela string-ben, long wanem, ol man insait long en i save sakim ol drak. Tasol olsem wanem long ol narapela pasin nogut, olsem pamuk, pait, bikhet? Ol i sakim ol dispela pasin nogut tu? Baibel i tok: “Liklik yis tasol em inap long mekim olgeta bret i solap.”​—Galesia 5:9; Jems 2:10.

Planti samting long dispela graun i no stret, olsem na ating i stret ol dispela string-ben i kamapim rong bilong olgeta samting long singsing bilong ol. Baibel i orait long yumi ken kros taim ol man i kalapim ol stretpela lo, tasol Baibel i tok, Kingdom bilong Krais tasol i rot bilong stretim ol samting.​—Daniel 2:44; Matyu 6:​9, 10.

Ol gutpela samting ol Kristen i wetim i narapela kain long ol samting ol man bilong wokim musik i tokaut long en, olsem pasin bikhet em rot bilong stretim ol hevi bilong yumi. Kros na belhat bilong dispela graun em i samting nogut tru.​—Rom 12:9; Jems 3:​15-18.

Ol man bilong wokim musik i gat save long mekim. Tru, tasol maski man i gat save long wokim musik, sapos dispela musik i no stret long ol lo bilong Baibel, em i no gutpela musik. King Solomon i gat bikpela save long kain kain samting, na long musik tu. Tasol taim em i givim baksait long lotu i tru, Baibel i tok: “Bikpela i kros long Solomon na i tokim em olsem, ‘. . . yu no bihainim tok bilong mi.’ ” Na Nimrot i save tru long wokim haus na painim abus, tasol God i no amamas long em, long wanem, Nimrot i wanpela bikhetman.​—1 King 11:9; Stat 10:​8, 9.

Wan wan singsing bilong ol string-ben i orait. Tasol sapos yu no was gut taim yu baim kaset o plet singsing bilong harim dispela wanpela singsing, ating yu bai harim ol narapela singsing nogut bilong dispela ben i stap long dispela kaset o plet singsing, a? Liklik wara i no inap rausim bikpela hap graun malumalum, a? Olsem na sapos wanpela singsing bilong ben i orait, yumi no ken ting i orait long harim ol narapela singsing nogut long dispela kaset o plet singsing. Gutpela singsing i no stretim ol singsing nogut.

Ol man bilong singsing i no save mekim pasin pamuk o lotuim Satan​—samting ol i mekim taim ol i singsing em giaman tasol. Tasol yu mas tingim: Musik ol i save kamapim bilong amamasim ol man, em i gat liklik o planti tok nogut long en. Na Kolosi 3:8 i tok, ol Kristen i mas “rausim” olgeta pasin bilong kros na tok nogut. I no stret sapos Kristen i amamas long harim ol dispela kain tok. Na Pol i bin tokim ol Efesus long ol i “no ken poroman wantaim ol man i save mekim pasin bilong tudak. Kain pasin olsem em i no save karim gutpela kaikai. Nogat. Mobeta yupela i mas soim ol man olsem, dispela kain pasin em i nogut.” Man i amamas long ol pasin bilong tudak i no inap stretim man i save mekim ol dispela kain pasin.​—Efesus 5:​6, 11.

Mi no givim yau long ol tok bilong singsing, mi save harim musik bilong en tasol. Tasol ol tok bilong en inap pas long tingting bilong yu, na bihain yu inap kisim hevi long dispela. Sampela taim yumi ting sampela samting i no stap moa long tingting bilong yumi, em i raus pinis​—tasol nogat, em i stap. Olsem na yumi mas was gut. Nogut yumi larim ol singsing nogut i pas long tingting na ol i pait wantaim tok bilong Filipai 4:8. Yumi mas tingting tasol long ol klinpela naispela pasin.

Na yu mas save: Sapos man “i laik pren wantaim ol pasin bilong graun, em bai i kamap birua bilong God,” long wanem, nambawan birua bilong God, em Satan. Em i as bilong ol pasin nogut bilong dispela graun na ol tingting nogut bilong ol man i givim baksait long God. Yu ting wanpela man marit bai amamas sapos meri bilong em i putim long ples klia piksa bilong wanpela man bipo em i save prenim? Maski meri i tokim man bilong em, em i no laikim moa dispela man na piksa i stap bilong bilasim haus tasol, man i no ken amamas, a? Em bai tokim meri long rausim dispela piksa na no ken tru tingim dispela man. Orait, olsem wanem sapos yumi bringim ol musik nogut long haus bilong yumi, o larim dispela musik i kamap long bel bilong yumi, em ol musik i save mekim wok bilong Satan? Sapos yumi tok: ‘Mi no tingim ol tok bilong singsing​—mi save laikim ol musik bilong en tasol,’ yu ting Jehova bai orait long musik nogut bilong yu?​—Jems 4:4; 1 Korin 10:​21, 22.

Mas Mekim Tru

Sapos yu bin harim ol musik nogut, i gat wanem as tru na yu mekim olsem? Ating yu no amamas long ol tok nogut bilong ol singsing, a? Ating yu amamas long musik bilong en, olsem pairap na krai bilong en, na i hatwok long givim baksait long en, a?

Tru, sampela taim i hatwok long bihainim ol stretpela lo. Na sapos yu givim bel tru long wanpela samting na i no stret long lo bilong God, bai yu hatwok moa. Olsem wanem? Bai yu wok long giamanim bel bilong yu na tok yu narapela kain, na yu holim yet “tupela tingting”? O bai yu pasim tok long bel olsem yu no ken tru laikim ol samting Jehova i no save laikim?​—1 King 18:21.

Maski yu lusim sampela samting bilong yu yet, sapos yu mekim bilong amamasim Jehova, bai yu amamas moa. Olsem na yu no ken pas long ol samting i no klin long ai bilong God. Sapos yu givim baksait long samting i no klin, Jehova bai kisim yu olsem pikinini bilong em. Tru tumas, bai yu insait long lain Jehova i laikim na em i orait long en.​—2 Korin 6:17.

Jehova i save tingim yumi na em i laik helpim yumi, olsem na em i givim ol lo long yumi bilong helpim sindaun bilong yumi. Harim tok bilong em long Aisaia 48:​17, 18: “Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut. Sapos yupela i bin harim tok bilong mi, . . . oltaim laip bilong yupela bai i pulap long amamas, olsem wara i ran oltaim na i no save pinis. Na stretpela pasin bilong yupela bai i kamap strong oltaim olsem solwara i save bruk long nambis.”

[Piksa long pes 9]

Sapos wanpela Kristen i save harim musik nogut, em i no inap helpim narapela long givim baksait long en, a?

[Piksa long pes 11]

Bai yu amamas moa sapos yu tromoi ol samting Jehova i no laikim

[Blok/Piksa long pes 10]

Wok Bilong Papamama

Sapos yu wanpela papa o mama, Baibel i tok, em wok bilong yu long lainim ol pikinini long save wanem musik i gutpela na wanem musik i nogut. Olsem na yu mas save long ol musik ol i save harim. Na yu mas strong long wanem kain musik bai yu larim ol i harim long haus.

Toktok gut wantaim ol pikinini bilong yu. Nogut yu tok: “Bilong wanem yu harim ol dispela pipia musik?” Sapos yu tok olsem, ol yangpela bai strong moa long harim dispela kain musik. Sapos yu stori long sindaun nogut bilong ol man i kamapim dispela kain musik, tasol musik bilong ol i no kamapim dispela kain pasin, ating pikinini i no ken harim tok bilong yu. Wanpela yangpela man i tok: ‘Man i kranki sapos em i tok olgeta rap-musik i nogut!’

Olsem na yu mas kisim save long tingting bilong God long ol dispela samting. Ol Witnes Bilong Jehova bai amamas long helpim yu, na ol i ken givim sampela buk long yu em Baibel i as bilong en, na ol i save stori gut long ol dispela samting. Kamapim klia long pikinini olsem yu no laik subim em long bihainim laik bilong yu long musik, nogat. Yu tingim ol lo bilong Baibel.​—Efesus 6:4.