Katim Marit—Is i Kisim Tingting Bilong Wes
WANPELA MAN LONG JAPAN I RAITIM DISPELA STORI BILONG KIRAP!
BOS bilong wanpela bikpela kampani long Japan i laik pinis long wok, tasol em i kirap nogut tru long harim meri bilong em i tok: ‘Mi tu mi laik pinis long wok.’ Meri i no amamas moa long stap wantaim em na mekim ol wok bilong haus. Nau long Japan planti ol i katim marit, na yumi kirap nogut long save, planti em ol man na meri i lapun liklik o ol i lapun pinis. Kirap long 20 yia i go pinis i kam inap long nau, namba bilong ol lapun i katim marit i go bikpela tru. Ol i ting sapos ol i lusim poroman, nau rot i op bilong i stap amamas.
Ol yangpela tu i katim marit. Taim ol i marit nupela ol i go malolo na raun long sampela hap. Sapos tupela i no stap amamas taim ol i malolo, orait, taim ol i kam bek, ol i brukim marit. Long olgeta 8-pela o 10-pela yangpela marit long Japan, tupela i save painim rot bilong katim marit. Ol i ting em rot bilong i stap amamas.
I gat wankain hevi long Hong Kong. Maski olpela tingting long marit i strong yet long Saina, namel long yia 1981 na 1987 planti i bin katim marit. Long Singapo pasin bilong katim marit i bin go bikpela olsem 70 pesen, maski ol man i gat lotu Muslim o narapela lotu.
Yumi save, long hap bilong Is man i save bosim strong meri na daunim em. Bipo long Japan, sapos man i laik katim marit, em inap raitim liklik tok long pepa na givim long meri. Pepa i makim olsem em i katim marit bilong tupela. Tasol meri i no inap mekim olsem. Em i gat wanpela rot tasol—em i mas ranawe i go long wanpela haus lotu i save lukautim ol meri em man i bin mekim pasin nogut long ol. Na sapos meri i no gat rot bilong lukautim em yet, em i stap tasol wantaim man bilong em, maski man i no laikim em o man i save prenim ol narapela meri.
Long nau planti man marit i givim bel tumas long wok mani bilong ol na helpim kampani; ol i no tingim famili bilong ol liklik. Na ol i ting dispela i no gat rong. Ol i givim bel tumas long wok mani na ol i no tingim laik na tingting bilong meri. Ol i ting meri i stap bilong mekim ol wok bilong haus, olsem kukim kaikai na wasim ol laplap samting, na em tasol.
Tasol nau ol meri bilong Is i kisim tingting bilong Wes, olsem na ol i kisim narapela kain tingting long sindaun bilong ol long marit. Wanpela nius (Asia Magazine) i tok: ‘Long Esia planti meri i laik stap fri na bihainim tingting bilong ol yet, olsem na dispela i bikpela as na pasin bilong katim marit i go bikpela long Esia.’ Wanpela man (Anthony Yeo), em bos bilong wanpela lain (Counselling and Care Centre) long Singapo, em i tok: ‘Nau ol meri i save ol i no samting nating—ol tu i gat nem na ol i mas i stap fri long mekim ol samting i stret ol i ken mekim. Ol i no laik bai narapela i daunim ol. I gat kain kain rot bilong helpim ol meri long nau. Sapos wanpela man i mekim nogut long meri, meri inap mekim sampela samting. Na sapos meri i no amamas long marit bilong em, em inap katim marit. Bipo, olsem 25 yia i go pinis, ol man i bin tingting planti sapos ol marit i katim marit, tasol nau nogat.’
Na planti senis i bin kamap long ol kantri bilong Wes tu. Wanpela man (Samuel H. Preston) i tok, insait long 20 yia, planti senis i bin kamap long ol famili Amerika na ol senis i olsem wanpela guria i bagarapim famili. Long 1985 long olgeta wan handet wan handet famili i gat pikinini i no winim yet 18 krismas, 25 famili i gat papa o mama tasol. Wanpela as, em planti papamama i bin katim marit. Na ol i ting 60 pesen bilong ol pikinini em mama i bin karim ol long 1984, ol bai stap wantaim papa o mama tasol taim ol i no winim yet 18 krismas.
Tasol sapos ol marit i no pas gut wantaim, yu ting katim marit em rot tru bilong i stap amamas? Bilong bekim dispela askim yumi mas save wanem samting i bin mekim na ol man i ting katim marit em rot bilong stretim ol hevi bilong ol.
[Blok long pes 4]
Ol i Sindaun Wantaim Tasol i Olsem Marit i Bruk
LONG planti marit, maski tupela i sindaun wantaim long wanpela haus, ol i stap olsem ol i katim pinis marit. Long Japan, man i save bosim strong meri na planti meri marit i no gat mani bilong lukautim ol yet, olsem na maski man na meri i no laik, tupela bai sindaun wantaim long wanpela haus, tasol ol bai stap olsem ol i katim pinis marit. Bilong daunim bel hevi bilong ol, dispela ol meri i save givim bel long lukautim pikinini. Planti mama i strong tumas long lukautim na bosim pikinini, olsem na taim pikinini i go bikpela, ol i no inap bosim wokabaut bilong ol yet.
Olsem na taim pikinini man bilong ol dispela mama i go bikpela na marit, planti bilong ol i no laik holim meri bilong ol. Maski ol i marit planti yia, ol i no holim meri na bai em i ken save man i laikim em. Ol dispela man i pas tumas long mama, na ating mama i bin subim ol long marit. Wanpela nius (Asahi Evening News) i kamapim tok bilong Dokta Yasushi Narabayashi, em wanpela dokta i save gut long hevi bilong ol marit. Dokta i tok, dispela hevi i wok long go bikpela moa na planti tausen man i sem long askim ol dokta long helpim ol.