Tok Bilong Helpim Nupela Papa o Mama
WANPELA lain (U.S. Bureau of the Census) i tok, long 1995 planti famili bai i gat nupela papa o mama, winim ol famili i gat papa na mama. Na long olgeta wan handet wan handet pikinini i no winim 18 krismas, 59 bai stap long famili i gat nupela papa o mama. Nau mipela laik stori long sampela samting bilong helpim ol papa o mama i bin marit gen.
No Ken Les Kwik: Nupela papa o mama i mas save, bikpela hap taim i mas lus na ol pikinini bilong poroman i ken orait long em. Wanpela savemeri (Mavis Hetherington) i tok, famili bai hatwok sampela mun o yia long sindaun gut wantaim, long wanem, ‘taim mama i marit gen ol pikinini bai kros, o belhat, o bel nogut long nupela papa bilong ol. Na ol bai kros nogut long mama tu, long wanem, ol i no laik mama i marit gen.’ Olsem na i gutpela sapos nupela papa o mama i pilim gut hevi bilong ol pikinini, maski em i hatwok long mekim olsem.—Sindaun 19:11.
Mas Pas Gut Pastaim: Wanpela meri (Joy Conolly) i stori long buk bilong em (Stepfamilies) olsem: taim nupela papa o mama i pas gut wantaim pikinini bilong nupela poroman, orait, nau em inap stretim pikinini. Inap long dispela taim, i gutpela sapos papa o mama tru bilong pikinini i stretim em. (Sindaun 27:6) Tasol i gutpela sapos nupela papa o mama i mekim ol samting pikinini i bin mekim bipo wantaim papa o mama tru bilong em, olsem wokabaut o pilai samting, na em bai save sindaun bilong em i no senis. Tasol i no gutpela sapos long taim bilong kaikai nupela papa i givim tok bilong stretim famili.
Mekim Wankain Pasin Long Olgeta Pikinini: Nupela papa o mama i mas was gut. Em i mas mekim wankain pasin long pikinini bilong nupela poroman olsem em i mekim long pikinini tru bilong em, maski sampela taim em i hatwok long mekim olsem.—Lukim Rom 2:11.
Isi Isi Pas Gut Wantaim: Taim ol i skelim sampela famili i gat nupela papa o mama ol i kisim save olsem: Ol nupela papa i hatwok tru long pas gut wantaim ol pikinini meri bilong nupela poroman. Wanpela man bilong raitim buk i tok: ‘Nupela papa i laik long pas gut wantaim pikinini meri bilong nupela poroman bilong em, tasol pikinini i surik long em. Na taim nupela papa i laik stretim pikinini meri, pikinini i bel nogut long dispela. Olsem na nupela papa i mas isi isi long pas gut wantaim pikinini meri bilong nupela poroman bilong em.’ Olsem na em i no ken kros kwik na em i mas pilim bel hevi bilong pikinini. Ol pikinini meri i amamas sapos nupela papa i litimapim nem bilong ol, tasol ating ol i no amamas tumas sapos em i laik holim ol, na nupela papa i mas tingim gut dispela samting. Na sapos tru pikinini meri i no laik bai papa i holim em, orait papa i mas tok amamas tasol long em.—Lukim Sindaun 25:11.
Was Gut Long Pasin Bilong Bel Nogut: Planti pikinini meri i no amamas long nupela mama. Ol i ting nau papa i laikim nupela mama na ol nogat. Sapos nupela mama i tingim dispela samting na pilim tingting bilong pikinini, ating hevi i no ken kamap namel long tupela. Na papa i ken helpim gut pikinini long save em i laikim em yet. (Sindaun 15:1) Ol saveman i tok, planti nupela mama i strong long kamap olsem mama tru bilong ol pikinini meri bilong nupela poroman, tasol mobeta ol i wok isi isi long kamap mama bilong ol.
I hatwok long stap nupela papa o mama, tasol planti tausen famili olsem i pas gut wantaim. Na maski famili i stap olsem wanem, Baibel i save givim ol gutpela tok bilong helpim famili long sindaun gut wantaim. Baibel i tok: “Givim bel bilong yupela long ol arapela manmeri. Dispela pasin i winim tru olgeta arapela pasin.”—Kolosi 3:14.