Resis Long Wilwil—Hevi Bilong En
MI HATWOK, sotwin, kikim strong wilwil, tasol skin i no les tumas. Mi pilim hatwok bilong mi i no lus nating. Mi kikim i go antap 25 kilomita long het bilong maunten Great Saint Bernard namel long Swiselan na Itali. Kosa bilong mi i stap long ka na makim olsem mi go pas long ol narapela. Nau long tingting bilong mi, mi lukim olsem mi winim dispela resis na pasim yelopela kolsinglis bilong man bilong winim resis.
Mi go pas long ol motabaik na ka na siksti i go daun long maunten. Long namel rot i baut wil long baksait i wel na mi lusim rot. Mi pinisim dispela resis Tour de l’Avenir long 1966, tasol mi no winim yelopela kolsinglis na kisim biknem.
Dispela Laik i Kamap Olsem Wanem
Taim Namba 2 Pait i pinis mama i karim mi long Britani. Long hap wes bilong Frans planti man i laik resis long wilwil na planti man bilong dispela hap i kamap nambawan man bilong resis. Taim mi manki mi save go lukim ol resis long wilwil long hap bilong mi, na mi no lusim wanpela resis Tour de France i save kamap long televisen. Mi lukim ol man bilong resis i taitim bun long go antap long ol bikpela maunten na ol i siksti i go daun. Mi lukim ol i resis olsem, na mi ting ol i narapela kain, olsem wanpela god.
Taim mi gat 17 krismas mi laik resis. Wanpela man i wok bisnis long wilwil i helpim mi na mi baim wanpela wilwil i no nupela. Em namba wan taim mi gat wilwil bilong resis. Olgeta moningtaim long Sande, na namel long wik paslain na bihain long wok, mi bin kikim wilwil. Tupela mun bihain long taim mi kirap lain long resis, bel bilong mi i guria, long wanem, mi insait long namba wan resis bilong mi. Mi inap winim dispela resis, tasol ol narapela i bungim mi 9 mita paslain long pinis bilong mak. Long yia mi bin kirap long resis, klostu olgeta resis mi bin insait long en, mi no win, tasol mi bin stap wantaim ol narapela 14 man i go pas.
Mi no resis planti long 1962—inap 3-pela mun tasol, long wanem, gavman i singautim mi long go insait long ami inap 18 mun long kantri Aljiria. Bihain mi go bek long Frans na long 1965 mi tromoi bikpela hap taim long skulim skin gen long resis long wilwil. Tasol long yia bihain mi bin tingting strong long go insait long resis na winim nambawan prais.
Kirap long Mas 1966 mi bin winim planti resis. Taim mi winim resis o kamap namba tu mi save winim sampela mak. Taim mi gat planti mak mi inap insait long ol bikpela resis. Tasol long dispela taim wok mi mekim wantaim papa em i bikpela wok na skin bilong mi i les. Maski mi gat bikpela laik, mi no inap tromoi bikpela hap taim long raun long wilwil. Olsem na taim mi bungim planti mak, mi larim ol narapela i go pas na winim mi bambai mi no ken insait long ol strongpela resis.
Mi Kamap Hapman Stret
Mi winim planti resis, olsem na 3-pela tim i laik wokim kontrak wantaim mi. Mi no laik, long wanem, mi no laik lusim papa. Tasol wanpela kosa i strong na askim papa long givim wanpela wik malolo long mi na mi inap insait long wanpela resis long ol maunten Piranis long boda bilong Frans na Spen. Mi kisim mak, olsem na mipela go long Spen na mi insait long wanpela resis Tour of Catalonia. Mi bin winim dispela resis. Sampela de bihain mi insait long narapela resis. Dispela resis i gat sampela hap bilong en. Mi bin winim namba wan hap na pasim kolsinglis bilong man bilong win. Tasol long laspela de bilong dispela resis mi mas givim kolsinglis i go bek, long wanem, tim bilong mi i no laik insait moa long dispela resis.
Long resis Route de France long hap bilong Nis mi kisim prais bilong man i hapman stret long resis long ol maunten. Mi wantaim 9-pela moa i resis gut, olsem na ol i makim mi olsem man bilong Frans i ken insait long resis Tour de l’Avenir. Long dispela resis man i no kisim mani olsem prais, olsem long resis Tour de France.
Mi bin resis tupela mun long dispela hap na mi no salim pas long famili. Ol i save mi mekim wanem taim ol i kaunim niuspepa, em tasol. Mi tingting planti long papa i bin larim mi i malolo wanpela wik tasol, olsem na mi tokim ol mi no ken insait long dispela resis, na mi go bek long famili bilong mi. Tasol kosa na man bilong wanpela nius bilong spot i tokim papa, mi inap kamap nambawan man bilong Frans long resis, olsem na papa i no pasim mi, em i larim mi i resis. Man! Mi inap mekim samting mi gat bikpela laik long mekim! Ol i makim mi bilong insait long nambawan resis bilong olgeta hap. Em dispela resis long 1966 mi stori pinis long en. Mi no winim dispela resis, long wanem, mi bin pundaun.
Long 1967 mi bin winim olsem 10-pela resis. Mi bin insait long resis Paris-Nice na mi kamap namba foa long resis Tour du Morbihan long Britani. Long 1968 mi gat 24 krismas taim mi sainim kontrak bilong insait long resis bilong kisim mani. Mi insait long tim bilong Jan Janssen, em man bilong Holan. Long dispela yia mipela i bin insait long resis Tour de France na Jan i bin winim dispela resis. Bihain long wanpela resis long Ren, long Britani, mi bungim Danielle. Em i no bin lukim wanpela resis long wilwil bipo—em namba wan taim. Tasol bihain em i lukim planti resis, long wanem, long yia bihain mitupela i marit.
Long dispela taim bipo mi amamas tru—mi insait long tim bilong resis na raun raun long ol hap, na mi no sindaun gut long wanpela hap tasol; long olgeta de mi lukim ol nupela taun na ples. Mi no kisim bikpela mani, tasol mi no tingim, long wanem, mi kisim bikpela amamas long resis. Mi resis gut, na mi gat bikpela laik long winim wanpela bikpela resis. Tasol long dispela taim mi kisim save olsem resis bilong kisim mani i narapela kain tru long resis nating.
Ol Nambawan Man . . . na Ol Narapela
Long 1969 mi poromanim Raymond Poulidor bilong Frans. Em i gat nem long resis. Mi bin insait long resis Paris-Roubaix na resis Flèche Wallonne long Beljam. Mi bin resis gut long ol maunten wantaim ol nambawan man bilong resis long wilwil. Tasol samting mi amamas moa long en, em long winim ol resis long ples bilong mi long Britani. Mi gat bikpela laik long ol man i save kam lukim ol dispela resis.
Tasol maski mi gat bikpela laik, mi olsem planti man moa, skin bilong mipela i no gat bikpela strong olsem ol nambawan man bilong resis. Mi no pinisim resis Tour of Spain, long wanem, i gat ais na ren. Long dispela taim mi save, ol nambawan man bilong resis i gat bikpela strong. Maski i gat bikpela san o bikpela kol, dispela i no pasim ol, ol i resis tasol. Eddy Merckx bilong Beljam em nambawan man bilong resis long dispela taim. Em i winim tru mipela olgeta. Taim mi insait long resis wantaim em, olgeta taim mi stap baksait long em.
Ol Man Bilong Resis i Wanbel
Maski wanpela tim i resis wantaim narapela tim, ol i stap wanbel. Mi lukim dispela samting long 1969 long resis Tour de France. I gat sampela hap bilong dispela resis, na long wanpela hap bilong en i gat planti maunten, olsem na taim mipela i kamap long ples slip long apinun, skin bilong mipela i les tru. Long de bihain long 7 klok long moningtaim belo i krai na kirapim mipela long slip. Bikpela kaikai bilong moningtaim i wetim mipela 3-pela aua paslain long resis.
I gat olsem 150 man i insait long dispela resis. Olgeta i stori long ol hevi i bin painim ol long sampela de bilong resis, tasol ol i tingting gut, na i no gat wanpela i kamapim tok hait bilong tim bilong em, olsem ol bai mekim wanem wanem ol samting long dispela resis. Mipela save mipela bai hatwok long dispela hap bilong resis. Mipela lusim taun Samoni long as bilong maunten Mont Blo, na resis i go 225 kilomita i go antap na i go daun long ol maunten na bihainim 3-pela rot i brukim ol bikpela maunten bilong kamap long Breason.
Taim resis i kirap mipela siksti i go. Maunten Madolen i olsem 1,984 mita, na taim mi go antap mi save mi bai hatwok tru. Ren i pundaun na taim mipela i go antap moa, ren i kamap ais. Taim mipela stap antap tru, mipela 6-pela bilong ol narapela narapela tim i kam bihain liklik long ol narapela bilong tim bilong mipela. Skin bilong mipela i kol nogut tru na taim mipela go daun long maunten, pinga bilong han bilong mipela i go strong na mipela i no inap wokim gut brek bilong wilwil, mipela mas tromoi lek long graun. Taim mipela kam daun long maunten wanpela bikman bilong resis i makim long han olsem mipela kam bihaintaim na mipela inap raus long dispela resis. Mi bel hevi stret.
Maski mipela hatwok, i olsem mipela i no inap pinisim resis, tasol man bilong narapela tim i gat gutpela save long resis em i strongim mipela long resis yet. Em i bungim mipela na tokim mipela long senis senis long i go pas. Olsem na mipela i taitim bun na resis i go. Taim mipela kamap long liklik ples bilong kisim kaikai, em i pas. Tasol mipela i no tingting planti, mipela olgeta i bungim liklik kaikai mipela i holim na mipela olgeta i kisim liklik hap skel.
Taim mipela kam long ples daun san i strong, olsem na skin i kisim strong. Sampela aua i wok long lus na mipela i mas winim yet tupela samting i laik pasim mipela—maunten Telegraf, mak bilong en 1,670 mita na maunten Galibea, mak bilong en 2,645 mita. Mipela i go antap na long hap rot i baut mipela kirap nogut tru long lukim ol narapela man bilong resis. Mipela abrusim sampela i sotwin stret na slip long rot. Mi lukim wanpela hapman bilong resis, em bilong Beljam, na em i wokabaut na subim wilwil i go. Skin bilong em i les olgeta. Mi bungim man bilong go pas long tim bilong mi na mi pinisim gut resis.
Dispela resis i lainim mi long wanpela bikpela samting olsem: Sapos man i no kamap yet long mak bilong pinis bilong resis, em i no winim o lusim yet resis. Na mi no inap lusim tingting long pasin bilong olgeta man i bin insait long resis—narapela i bin strongim narapela maski em i bilong narapela tim.
Mi Harim Tok Bilong Baibel
Long 1972 em namba wan taim mi bin harim tok bilong Baibel. Wanpela man, nem bilong em Guy, i kam lukim mi. Nau tasol em i bin lusim ol resis bilong kisim mani. Em i stori long nupela bilip bilong em. Mi tokim em mi no laik harim, na olgeta man i ting lotu bilong ol yet em nambawan. Guy i kamapim sampela tok bilong Baibel, na em i tok, planti lotu i tok Baibel i as bilong bilip bilong ol, olsem na yumi mas skelim—bilip bilong yumi i stap long Baibel o nogat.
Mi Katolik, tasol mi no go long lotu. Mi bin harim sampela i tok long Baibel, tasol mi no ting Baibel i bikpela samting long lotu bilong mi. Tasol mi amamas long Guy i kamapim ol dispela tok, long wanem, klostu nau wanpela wanblut bilong meri bilong mi i laik kam lukim mipela na em i wanpela misineri Katolik. Olsem na mipela inap toktok wantaim em long ol dispela tok Guy i bin kamapim.
Wanblut bilong meri i tok, tru Baibel em Tok bilong God, tasol mipela mas was gut long ol Witnes Bilong Jehova. Em yet i ting ol i gutpela lain, tasol tok bilong ol i giamanim ol man. Taim Guy i kam mi askim em long dispela samting. Guy i tokim mi, lotu i bin lainim mi olsem man i gat tewel, tasol dispela bilip i no stap long Baibel. (Esekiel 18:4) Na Guy i askim mi, olsem wanem na wanblut i no kamapim nem bilong God, em Jehova.—Song 83:18.
Mi kirap nogut tru long save God i gat nem. Taim mipela soim wanblut long nem bilong God long Baibel, em i tok yumi no ken bilipim olgeta tok bilong Baibel. Mipela i no toktok moa wantaim em long Baibel, na tu, Guy i go bek long Paris long wok mani bilong em.
Wanpela yia bihain Guy i kam bek long Britani na em i kam lukim mipela. Em i toktok gen wantaim mipela na soim mipela olsem Baibel i save kamapim ol tok profet. Dispela i kirapim mipela long skelim gut Baibel. Nau Guy i kam lukim mipela planti taim. Tasol resis long wilwil i nambawan samting long i stap bilong mi, na mi gat planti pren, tasol Guy i no les long mi. Na ol man long Britani i strong long lotu i gat ol bilip ol i kamapim long bipo, olsem na famili i no amamas long nupela laik bilong mipela long Baibel.
Long 1974 mi pinis long resis long wilwil, long wanem, birua i painim mi long rot. Nau mitupela meri bilong mi i kirap na tingim wanem samting i bikpela samting long i stap bilong mipela. Mipela pasim tok long go sindaun long narapela taun na bai famili bilong mipela i no ken paulim moa tingting bilong mipela. Nau mipela kirap na go long ol miting long Haus Kingdom bilong Kongrigesen Dinan. Mipela wok long kamap strong long tok i tru na long 1976 mitupela i kisim baptais.
Kirap long dispela taim rot i op na mi toktok long Baibel wantaim sampela wankrismas bilong mi em ol i man bilong resis. Na taim mi go long ol haus na autim tok bilong Baibel, planti man i luksave long mi na ol i amamas long toktok long wok resis bilong mi bipo. Tasol sampela ol i no amamas taim mi laik stori long tok bilong Kingdom.
Long nau sapos mi laik eksasais, mi save raun long wilwil wantaim famili bilong mi. Taim mi mekim olsem mi pilim tru tok bilong Pol, em i tok: “Sapos yumi laik mekim bodi bilong yumi i kamap strong, na yumi save trening oltaim, dispela bai i helpim yumi liklik. Tasol sapos yumi trening long mekim pasin bilong God i kamap strong long yumi, dispela bai i helpim yumi moa yet. Em inap long helpim yumi long dispela laip nau yumi stap long en, na long laip yumi bai kisim bihain tu.”—1 Timoti 4:8.—Em stori bilong Jean Vidament.
[Blok long pes 17]
Resis Tour de France
Resis Tour de France i bin kirap long yia 1903. Dispela resis i gat nem tru long olgeta hap bilong graun. Ol man i save resis inap 3-pela wik na ol i raun 4,000 i go inap 4,800 kilomita na resis i pinis long Paris. Inap 200 man i save insait long dispela resis bilong kisim mani na taim ol i resis ol i raun long ol liklik ples bilong Frans na long sampela kantri klostu. Planti man i save sanap arere long rot na singaut bilong strongim ol man bilong resis.
Long olgeta de, man i kamap hariap long mak em bai pasim yelopela kolsinglis. Tasol man i go pas inap long laspela de, em i man bilong winim resis.
Sampela sotpela hap bilong resis i bilong wan wan man o tim i mas kamap hariap long mak. Na long resis bilong ol tim, olgeta man insait long tim i mas kamap wantaim long mak.
[Piksa Kredit Lain long pes 15]
Mike Lichter/International Stock
[Mep/Piksa long pes 16, 17]
Long 1968 taim Jean Vidament i gat 24 krismas em i resis long resis Tour de France
RUBEK (kirap)
PARIS
Tour de France—resis long wilwil
Frans