Yu Laikim Wanem Kain Sindaun?
SAPOS yu gat strong, bai yu kamapim nupela taim i no gat ol bikpela hevi olsem bilong nau? Ating bai yu mekim, a? Olsem na yumi save, gutpela Man i bin wokim yumi, God Jehova, em bai mekim olsem tu, a? Em i gat strong bilong kamapim nupela stretpela taim.
Baibel i tok: “[Jehova, NW] i save mekim gutpela pasin long olgeta manmeri na em i save marimari long olgeta samting em i bin wokim. Em i save givim kaikai samting long olgeta inap long ol i stap gut.” (Song 145:9, 16) Yu gat wanem ol laik? Yu laikim wanem kain sindaun?
Tupela dokta i raitim buk i tok: ‘Sapos yumi askim olgeta man ol i laikim wanem kain nupela taim, ating yumi olgeta bai wanbel long sampela samting.’—Buk A Sane and Happy Life: A Family Guide, bilong Abraham na Rose Franzblau.
Orait, yumi ken skelim sampela samting tupela dokta i tok i mas i gat long nupela taim na yumi ken save, yumi tu i laik kisim ol dispela samting o nogat. Taim yumi mekim olsem bai yumi save, God i bin tok promis long givim dispela samting long yumi, o nogat.
Namba Wan Samting
Namba wan samting tupela dokta i makim long lista bilong ol em “graun i no gat pait.” Planti pait nogut tru i bin kamap, olsem na planti man i laik tru long nupela taim i kamap na bai ol pait i pinis na narapela lain i no kilim i dai narapela lain. Gutpela samting ol dispela man i wetim i stap long wanpela hap tok long banis bilong Yunaitet Nesen long Nu Yok. Olsem: BAI OL I PAITIM OL BAINAT BILONG OL I KAMAP OLSEM OL AIN BILONG BRUKIM GRAUN, NA BAI OL I PAITIM OL SPIA BILONG OL I KAMAP OLSEM OL NAIP. NA OLGETA LAIN MANMERI BAI I NO KEN PAIT MOA, NA BAI OL I NO SKUL MOA LONG PAIT.
Yu save dispela hap tok em wanpela tok promis God i bin mekim? Dispela tok i stap long Baibel long Aisaia 2:4. Na sapos yu kaunim Song 46:8, 9 yu bai save, God bai bagarapim olgeta samting bilong pait na em bai “mekim i dai pait long olgeta hap graun.” Long gutpela taim God bai kamapim bai i no gat pait long en, na dispela gutpela tok profet bai kamap tru: “Olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.”—Maika 4:4.
Ating yu tu bai tok, yu laikim “nupela taim i no gat pait,” a? Na Man bilong wokim yumi em i tok promis pinis long kamapim!
Nupela Taim i Gat Planti Kaikai
Namba 2 samting yu laikim, em wanem samting? Ating em i wankain long lista bilong tupela dokta olsem, “nupela taim i no gat hangre. Bikpela hangre na sot long kaikai i pinis olgeta.” Gutpela tru sapos i gat wanpela taim i no gat wanpela pikinini i sot gen long kaikai, a? Tru tumas, ating yu laik i stap long nupela taim i gat planti kaikai. Tasol husat inap tok dispela samting bai kamap?
Tingim tok promis bilong God: “Graun bai kamapim planti gutpela kaikai.” “Planti rais na wit samting i ken kamap long ol gaden bilong ol manmeri.” (Song 67:6 NW; 72:16) Em nau! Long nupela taim God bai kamapim, bai i gat planti gutpela kaikai. Baibel i tok Jehova bai “redim bikpela kaikai tru. Bai i gat planti gutpela gutpela abus na nambawan wain tru bilong dring.”—Aisaia 25:6.
Ol man i no inap pinisim hangre, tasol God inap mekim. Taim pikinini bilong em, Krais Jisas, i stap long graun em i wokim mirakel na liklik bret na sampela pis i kamap planti tru, inap long planti tausen manmeri i ken kaikai. Olsem na yumi save, aninit long Kingdom bilong God bai Jisas i no hatwok long givim kaikai long ol man.—Matyu 14:14-21; 15:32-38.
Nupela Taim i No Gat Sik
Long nupela taim yumi olgeta i laikim, yumi no inap tru painim wanpela man i gat sik. Olsem na yumi no kirap nogut long namba 3 samting. Tupela dokta i tok: “Nupela taim i no gat ol bikpela sik. Na ol pikinini inap go bikpela na i no ken sik. Na ol i no ken tru kisim wanpela sik i gat rot bilong pasim o oraitim, na ol i ken stap olsem i go inap long taim ol i dai.”
Tingim amamas bilong ol man sapos ol i no kisim kus o narapela sik! Ol man i no inap pinisim sik, tasol God inap pinisim. Na em i tok promis olsem long dispela nupela taim i no gat wanpela man bai i tok: “Mi gat sik.” Nogat. “Ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas.” (Aisaia 33:24; 35:5, 6) Tru tumas, God “bai i mekim drai wara i stap long ai bilong olgeta . . . Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.”—KTH 21:4.
Samting Krais Jisas i bin mekim taim em i stap long graun i kamapim klia ol bikpela samting em bai mekim long nupela taim God bai kamapim. Em i bin helpim ol aipas long lukluk, na ol yaupas long harim tok, na ol mauspas long toktok, na ol lek nogut long wokabaut. Na tu, em i bin kirapim sampela man i dai pinis.—Matyu 15:30, 31; Luk 7:21, 22.
Gutpela Wok na Stretpela Lo
Long nupela taim ating yu na klostu olgeta man bai laikim gutpela wok em olgeta i ken amamas long en, na stretpela lo i ken bosim olgeta, a? Olsem na tupela dokta i tok: “Namba 4 samting em olsem: Ol man i mas i gat wok long nupela taim inap long ol i ken lukautim ol yet na famili bilong ol.” Na “namba 5 samting em olsem: Olgeta man inap amamas long stap fri aninit long lo, na i mas i gat stretpela lo bilong helpim olgeta man.”
I no gat wanpela gavman bilong man i kamapim dispela gutpela sindaun. Tasol nupela taim God bai kamapim em bai mekim. Baibel i stori long ol gutpela wok ol man bai mekim long dispela nupela taim. Em i tok: “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring. . . . Na bai ol i amamas long ol samting ol yet i bin hatwok long kamapim. Wok ol i mekim bai i no inap lus nating.”—Aisaia 65:21-23.
Olsem wanem long wok bilong helpim ol man long i stap fri na stretpela lo bilong helpim olgeta man? Maski ol bikman bilong gavman i bin wok strong long helpim ol man, tasol sori tru, bikpela hap wok bilong ol i lus nating. Long planti hap ol i no mekim pasin i stret long sampela lain—ol i daunim ol na mekim nogut long ol. Olsem na yumi save, ol man i no inap tru long inapim ol dispela laik bilong man. Tasol God I Gat Olgeta Strong em inap, na em bai mekim olsem long rot bilong Krais Jisas, em i bin kirapim em pinis. Olsem na Jehova i tok: “Mi yet mi bin makim em [Jisas], na oltaim mi amamas moa yet long em. . . . Em bai i bringim stretpela pasin tasol long olgeta lain manmeri bilong graun.”—Aisaia 42:1; Matyu 12:18.
Baibel i tok promis, aninit long Kingdom bilong God em “bai i pinisim dispela kalabus bilong bagarap nau olgeta samting i stap long en, na bai olgeta samting i stap gutpela tru wantaim yumi ol pikinini bilong God.” (Rom 8:21) Long nupela taim olgeta man bai stap fri na stretpela lo bai helpim ol, olsem na olgeta man bai amamas!
I Gat Rot Bilong Mekim Ol Samting na Malolo
Ating long nupela taim yu laik i stap long en, olgeta man, maski ol i bilong wanem kain skin o kantri, ol bai amamas long kisim wankain sindaun. Olsem na yumi no kirap nogut long save long namba 6 samting tupela dokta i tok i mas i stap long nupela taim, em olsem: “Long nupela taim olgeta man i gat rot long mekim wok long gutpela save bilong ol. Na ol bai kisim gutpela samting tru long ol dispela wok ol i mekim na i no gat man i daunim ol.”
I no gat wanpela gavman i bin kamapim gutpela taim na olgeta lain i gat wankain sindaun na i gat lo i helpim olgeta wantaim. Nogat. Pasin bilong mekim nogut long sampela lain i stap yet. Tasol Krais Jisas, King bilong nupela taim, em bai mekim wankain pasin Papa bilong em, Jehova, i mekim, olsem: “[God] i no save bihainim wantok pasin na em i no save larim ol manmeri i grisim em.” (Lo 10:17; Rom 2:11) Dispela nupela taim bai nambawan tru, long wanem, olgeta man bai lain long bihainim pasin bilong God Jehova long mekim wankain pasin long olgeta man, na ol bai mekim tru dispela pasin.—Aisaia 54:13.
Sampela lain i no gat gutpela sindaun na ol i mas mekim bikpela wok tru i go i go na ol i no gat malolo. Olsem na ating yu bai wanbel long narapela samting nupela taim i mas kamapim: “Namba 7 samting em olsem: Samting ol man i amamas long mekim, ol i mas i gat taim bilong mekim ol dispela samting ol i amamas long en.”
Jehova i save man i mas malolo, olsem na long Lo bilong em bilong bipo em i bin makim wanpela de long wik bilong malolo. (Kisim Bek 20:8-11) Olsem na yumi save, long nupela taim God bai kamapim, em bai helpim ol man long malolo na kisim ol gutpela samting bilong amamas.
Ol Man i Stap Long Nupela Taim
Laspela samting tupela dokta i stori long en, em pasin bilong ol man “yumi laik ol bai stap wantaim yumi long nupela taim.” Ating yu tu bai tok ol dispela samting i bikpela samting. Olsem: “Namba 8 samting: Long nupela taim ol man i mas i gat ol nambawan gutpela pasin na ol dispela pasin i makim olsem ol i narapela kain long ol animal. Olsem save na ol wok ol inap mekim, givim biknem long ol narapela na bilip long ol, mekim pasin sori na givim bel long narapela, ol i amamas long ol yet, tasol ol i no tingim skin bilong ol tasol—ol i tingim narapela man tu.”
Ating bai yu amamas long stap wantaim ol man i kamapim ol gutpela pasin, a? Olsem pasin sori, na givim bel long narapela, na bilip long narapela, na ol man i no tingim skin bilong ol yet, nogat, ol i tingim narapela man tu. Em nau! Ating yu laikim tru dispela kain nupela taim, a? I no gat wanpela bikman bilong dispela graun inap kamapim kain taim olsem. God Jehova tasol inap kamapim, na em bai mekim, long wanem, dispela i no wanpela tingting nating.—Song 85:10, 11.
Wanem Taim Em Bai Kam?
Olsem yumi tok pinis long narapela stori, “God i promis pinis long em bai i wokim nupela skai na nupela graun, na stretpela pasin tasol bai i stap long en.” (2 Pita 3:13) Jisas i tok, truim bilong dispela tok promis bai kamap “taim olgeta samting i kamap nupela, na Pikinini Bilong Man bai i gat biknem na i sindaun long sia king bilong en.”—Matyu 19:28.
Bipo God i bin sindaunim Adam na Iv long gaden Paradais na em i tokim tupela long skruim dispela gaden Paradais i go long olgeta hap. Em i laik bai tupela i kamapim pikinini na olgeta wantaim i mekim graun olgeta i kamap naispela gaden Iden. (Stat 1:26-28; 2:7-9, 15) Adam na Iv i lus tru long mekim dispela wok, tasol taim olgeta samting i kamap nupela, Kingdom long han bilong Krais bai kamapim bek Paradais long dispela graun. Bihain Paradais bai stap long olgeta hap. Olsem na Man i bin wokim yumi bai truim laik bilong em bilong bipo long kamapim nupela taim i gat pasin isi na stretpela pasin long en. Tasol wanem taim dispela nupela taim bai kam?
Ating tingting bilong yu i wankain olsem bilong planti man ol i save tok: ‘Em bai kam, tasol em i no ken kam taim mi stap laip.’ Tasol olsem wanem yu save em i no ken i kam long taim bilong yumi? Olsem wanem? Ol bikpela hevi i save kamap nau i makim olsem nupela taim God i laik kamapim i klostu? Olsem wanem yumi ken save?
[Piksa long pes 7]
Long nupela taim bel isi bai stap, skin bilong olgeta man bai gutpela olgeta, na ol man i no ken sot long wanpela samting
[Kredit Lain]
Cubs: Courtesy of Hartebeespoortdam Snake and Animal Park
[Piksa long pes 8]
Long nupela taim ol manmeri bai amamas long mekim gutpela wok
[Piksa long pes 9]
Long nupela taim yumi inap malolo gut