Pas Bilong Ol Man

Em Wanpela i Stap Tenkyu tru long stori bilong Pepita Abernathy, “Em i Mekim Gutpela Wok Maski Em Wanpela i Stap.” (Disemba 8, 1993) Taim mi kaunim dispela stori, aiwara i kamap long ai bilong mi. Mi save hatwok long autim tok long ol pren bilong mi o long autim tok long ol hap ol man i no laik harim tok. Tasol Pepita Abernathy i bin autim tok long planti hap, maski em i no save long tok ples bilong ol man long ol dispela hap! Nau mi holim stretpela tingting long wok autim tok.

J. W., long Amerika

Musik Nau tasol mi kaunim stori, “Musik Bilong Nau​—Yu Ting i No Inap Bagarapim Yu?” (Mas 8, 1994) Taim mi bin go long haiskul mi save amamas tru long harim musik hevi-metal. Dispela musik nogut i as bilong pasin nogut na pasin bikhet mi bin mekim. Tasol nau mi kam klostu long Jehova olsem pren bilong em, olsem na i no ol tok bilong singsing tasol mi no laikim, nogat; krai bilong dispela musik tu mi nolaik tru long en.

L. K., long Amerika

Yupela i kamapim ol gutpela tok bilong helpim mipela ol yangpela. Na yupela i no stori nating bilong truim tok bilong yupela; yupela i kamapim tok bilong ol buk na nius bilong nau em ol i gat nem. Sampela i ting musik i orait sapos em i no musik hevi-metal o rap-musik maski musik ol i harim i stori long pasin pamuk, pait na bagarapim man, na kisim ol drak. Ol stori bilong yupela i daunim tingting kranki bilong ol dispela man. Nau mipela olgeta i save, mipela i mas mekim wanem bilong skelim gut ol musik mipela i laik harim.

F. M., long Itali

Long nau tasol pikinini man bilong mi i raus long kongrigesen Kristen. Mi bin hatwok tru long pasim em long harim rap-musik. Mi bin stori wantaim em long wanem musik i gutpela na wanem musik i no gutpela. Na tu, mi bin kamapim ol lo bilong Baibel long dispela samting. Tasol long pasin hait em i bin wok yet long harim dispela musik; em i ting dispela musik i no inap bagarapim em. Tasol em i kirap na mekim planti pasin nogut dispela kain musik i save litimapim. Mi bel hevi stret long pikinini i bin lusim pasin Kristen. Olsem na mi laik olgeta papamama Kristen i mas tingim ol dispela stori yupela i bin kamapim na mi laik ol i kaunim na stori gut long en wantaim pikinini bilong ol.

G. C., long Amerika

Yupela i bin stori long kain musik yumi mas sakim. Na yupela i no tok nating, nogat; long gutpela pasin yupela i kamapim klia ol tok, na tok bilong yupela i gat as bilong en. Mipela i save yupela i gat bikpela laik long helpim olgeta yangpela long sakim dispela pasin nogut bilong nau.

B. V., long Frans

Ol Yangpela i Laik Save . . .  Mi gat 11-pela krismas tasol, na mi amamas tru long stori “Olsem Wanem Mi Ken Abrusim Sik AIDS?” (Julai 8, 1994) Mitupela mama i bin toktok wantaim long dispela stori. Yupela i bin stori gut long dispela sik na olsem wanem mipela i ken abrusim, olsem na mi laik tok tenkyu tru long yupela. Bipo mi ting mi inap kisim sik AIDS long olgeta rot!

L. K., long Amerika