Ol Piksa Komik Bilong Pait Inap Bagarapim Yumi?

WANPELA MAN LONG BRITEN I RAITIM DISPELA STORI BILONG KIRAP!

“ASUA Bilong Bugs Bunny na Pait i Save Kamap Long Ol Skul.” Em bikpela het-tok i kamap long nius The Times bilong Landon. Dispela nius i stori long tingting bilong sampela tisa long sampela pikinini, ol i tok ol i save bihainim pasin ol i lukim long ol piksa komik long televisen long pait na bagarapim man.

Nambatu bos bilong wanpela skul i tok, “Klostu olgeta piksa komik em bilong pait, na maski gutpela man i save winim pait, pasin em i mekim long win i no gutpela.” Olsem wanem? Yu gat wankain tingting long planti piksa komik bilong televisen?

Long nau ol i putim planti piksa komik long televisen na long ol video, olsem na planti papamama i tingting planti. Sampela i tingting planti long pikinini bilong ol i kisim tingting bilong ol man i stap long ol piksa komik, em ol i save kamapim pasin bilong pait na giaman na bikhet.

Tasol sapos ol pikinini i lukim sampela pait long ol piksa komik, yu ting dispela inap bagarapim tru ol?

Em i Nogut?

Redio-stesin BBC (British Broadcasting Corporation) i tok, ol man bilong kamapim ol stori bilong televisen, ol i mas tingting gut long ol pasin bilong pait na bagarapim man em ol dispela piksa na ol komik tu i kamapim. Ol i tok, ‘taim man i lukim ol dispela pait na em i pilim tru ol samting i kamap long dispela stori, dispela inap kirapim bel bilong em.’

Tasol ol samting ol piksa komik i makim i no bin kamap tru​—ol i stori nating tasol; olsem na ating ol i no inap bagarapim pikinini tumas, a? Planti manki i save lukim ol piksa komik long televisen bilong kisim amamas tasol. Na tru tumas, ol komik i save amamasim ol. Tasol olsem wanem? Ol komik inap mekim sampela samting moa? Ol inap, long wanem, ol piksa komik i save pas strong long tingting na bel bilong ol manki. Dokta Gregory Stores bilong Yunivesiti Oksfot i mekim wanpela tok long nius TV Times i save kamapim program bilong ol televisen-stesin, na em i tok, ol piksa komik ol pikinini i save lukim ol i as bilong ol driman nogut bilong ol pikinini long ol samting olsem ‘tambaran na masalai na ol animal nogut bilong bagarapim man.’

Na ripot bilong gavman bilong Briten (Screen Violence and Film Censorship) i tokaut olsem, ol lain em pikinini i save sindaun wantaim ol na lukim piksa komik, ol inap stiaim tingting bilong em long ol dispela piksa. Olsem na i no gutpela sapos ol pikinini tasol i stap na lukim ol piksa komik long televisen.

Dispela ripot i tok tu, ol liklik pikinini i no go yet long skul, kwiktaim ol i save makim ol pait samting ol i lukim, na sapos ol pikinini i gat 5-pela o 6-pela krismas ol i lukim kain piksa olsem, ol bai kirap na mekim tru ol pait olsem ol i bin lainim long televisen.

Em nau, ol lain bilong redio samting i tokaut olsem: Ol man, na ol pikinini tu, maski ol i gat hamas krismas, sapos longtaim liklik ol i wok long lukim ol piksa bilong pait long televisen, ol bai kisim tingting olsem ol dispela pait i no samting nogut. Olsem na ol bai insait kwik long ol pait, o sapos ol i lukim ol man i paitim nogut wanpela man, ol i no inap sori long em.

Ol manmeri i bin lukim oltaim piksa komik bilong Bugs Bunny o Tom and Jerry long piksa wokabaut bilong bipo taim ol i yangpela yet, ating nau ol i save amamas long lukim dispela piksa long televisen. Tasol samting bipo ol man i ting i nogut, nau ol i ting em i orait tasol. Olsem na ol papamama i mas tingim ol pikinini na glasim gut ol piksa komik ol i save kamapim long nau.

Wanpela mama i tokim nius Scotsman olsem ol pikinini i save bihainim kwik ol samting ol i lukim. Em i tok: ‘Pikinini bilong mi i gat 5-pela krismas na em i save laikim tru piksa komik bilong Turtles. Taim mi go kisim em long skul, mi lukim ol pikinini em narapela i wok long kikim narapela olsem ol i lukim long dispela piksa komik.’

Sampela papa bilong stua i kisim wankain tingting olsem ol dispela papamama na tisa. Wanpela stua long Briten i putim tambu long wanpela samting ol pikinini i save baim bilong pilai, em bilong dispela piksa Turtles; ol i ting, nogut ol pikinini i kirap na kikim nabaut ol narapela olsem ol i mekim long karate, na ol i pilai na hait insait long ol bikpela paip i save karim ol samting bilong toilet i go na ol inap kisim bagarap. Wanem samting moa ol komik inap mekim long pikinini?

Ol Samting Nogut

Wanpela nius i stori long ol kampani i save wokim ol samting olsem piksa komik Turtles i kamapim, na nius i tok, em wanpela bikpela trik tru bilong pulim ol pikinini long baim ol dispela samting, na ol i save baim planti moa yet.

Ol dispela kampani i wokim 400 kain samting bilong Turtles, olsem ol buk komik, singlis i gat ol piksa samting bilong Turtles long en, na ol i ting ol pikinini bai laik tru long baim. Orait, sapos ol dispela piksa komik i save grisim ol pikinini na ol i strong long baim ol dispela samting, orait, ol samting ol i lukim long ol dispela piksa bai mekim sampela samting long ol, a? Tasol ating sampela bai tok, ol pikinini i save les kwik long ol dispela samting.

Tasol ol i no save les kwik long ol olpela piksa komik. Nius The Times bilong Landon i tok, “Ating ol bai les long Turtles, tasol ol bai laikim Tom and Jerry i go inap oltaim oltaim.” Olsem na yu papa o mama i ken tingim sampela askim olsem: Sapos yu lukim ol kain piksa komik olsem long televisen, pikinini bilong yu inap ting olsem yu orait long olgeta samting ol i mekim long piksa? Na taim ol i mekim nogut long ol animal insait long piksa, olsem wanem long dispela? Tru, ating bai yu tok, ol dispela piksa komik i no samting tru. Tasol nau ol i mekim ol narapela kain samting long ol dispela piksa, ol i kolim animatronics.

Dispela nupela kain pasin bilong wokim piksa komik inap trikim ol man na ol i hatwok long save, em i komik tasol o em i wanpela samting tru. Wanpela nius bilong Landon (The Sunday Times Magazine) i tok, maski ol man i save moa long pasin bilong trik ol man bilong wokim piksa wokabaut i mekim, ol i lukim ol dispela piksa komik olsem em i samting tru. Em nau, ol piksa bilong pait na bagarapim man, ol tu i olsem samting tru.

Na i gat wanpela nupela piksa komik ol i wokim, em inap paulim tru pasin bilong ol yangpela. Nius The Times bilong Landon i tok, em i stori bilong ‘wanpela famili ol i save bikmaus na les nabaut na i no laik lain long wanpela samting; wanpela as bilong en, em ol i birua long olgeta lo bilong gavman samting i save bosim ol man.’

Em nau, taim yupela ol papamama i glasim gut ol piksa komik ol pikinini bilong yupela i save lukim, ating yupela i tingting planti. Orait, yupela ken mekim wanem long dispela?

Tambuim Piksa Bilong Pait

Skelim ol gutpela samting na ol samting nogut bilong ol piksa i save kamap long televisen. Sampela papamama i tingim ol pikinini na ol i pasim tok olsem ol i no ken kisim televisen. Na sampela ol i helpim ol pikinini long skelim ol gutpela samting na ol samting nogut bilong ol piksa em ol i larim ol pikinini i lukim. Wanpela nius bilong Landon (The Independent) i tok, ‘Sapos ol i lainim pikinini long skelim gut piksa komik o ol narapela samting i kamap long televisen, dispela bai helpim gut pikinini.’ Ol papamama inap helpim gut pikinini long mekim olsem, winim ol narapela.

Wanpela lain i bin skelim samting televisen i mekim long i stap bilong ol famili na ol i stori long tupela rot bilong skulim pikinini. Wanpela i olsem: Papamama i toktok gut wantaim pikinini na kamapim klia ol tok, na ol i laik kirapim pikinini yet long tingim ol samting inap helpim em. Narapela rot i olsem: Papamama i givim strafe o tok long givim strafe long pikinini sapos em i lukim ol piksa ol i tambuim em long lukim. Orait, wanem samting i kamap ples klia long dispela tupela rot?

Ol pikinini em papamama i tok long givim strafe long ol, ol i kamapim klia olsem ol i laikim ol piksa bilong ‘pasin bikhet na pait,’ tasol ol pikinini em mama i bin skulim ol na toktok gut wantaim ol na kamapim klia ol tok, i no planti bilong ol i laikim ol piksa bilong pasin bikhet na pait. Olsem na ol papamama i mas toktok gut wantaim pikinini long olsem wanem i no gutpela long lukim ol piksa komik bilong pait na bagarapim man. Tasol ol pikinini i save bihainim pasin ol i lukim ol narapela i mekim. Olsem na yupela papamama i mas tingim dispela na givim baksait long ol stori bilong televisen long pait na bagarapim man. Sapos yupela i lukim, pikinini bai ting i no gat rong long em i lukim.

Orait, pikinini i ken lukim wanem samting bilong kisim amamas? Sapos i gat sampela banis animal, famili i ken i go lukim. Sapos i no gat ples olsem, yu ken painim sampela gutpela video bilong ol animal samting na pikinini i ken lukim long haus.

Tru, nau long dispela taim yumi no inap abrusim ol pait samting bilong dispela graun. Tasol maski yumi yangpela o lapun, yumi inap abrusim ol piksa long televisen i kamapim pasin bilong pait na bagarapim man.

[Piksa long pes 12]

Ol piksa komik i save kirapim pasin bilong bagarapim man?