Sampela Pasin i Kalabusim Man

KALABUS long wanpela samting o wanpela pasin i olsem tupela tren i ran i go long wanpela ples na ol i ran long wanpela rot tasol. Maski man i kalabus long wanpela samting o wanpela pasin, tupela inap mekim wankain samting​—senisim tingting bilong em na daunim bel hevi bilong em. Nau yumi ken tingim sampela pasin ol man i save kalabus long en.

Pasin Bilong Wok Oltaim

Sampela i tok, pasin bilong wok oltaim i gutpela samting, no gat rong long kalabus long wok. Ol bos i laikim man i givim bel tru long wok. Tasol dispela kain man inap ting ol wok em i mekim i no kamapim sampela gutpela samting. Wok inap mekim na man i no gat taim bilong tingim bel hevi bilong em, o em i wok oltaim bambai ol man i ken laikim em.

Taim ais i kamap long raunwara ol man inap wokabaut antap long en na ol i no inap bagarap, long wanem, ais i strong. Olsem tasol man bilong wok oltaim em inap karamapim ol hevi bilong em long wok na bai ol man i ting em i no gat sampela hevi. Wanpela savemeri (Linda T. Sanford) i tok: ‘Taim man o meri bilong wok oltaim i no gat planti wok, em i bel hevi stret, tingting planti, belhat, na pilim olsem i stap bilong em i no gat as bilong en.’

Man i wok oltaim na em i no inap tingim narapela samting, wok i olsem hap skin bilong em. Ating taim em i liklik yet em i lain long bihainim kain pasin olsem. Dispela samting i bin kamap long Mary. Papa bilong Mary em man bilong dring oltaim. Kirap long taim Mary i gat 6-pela krismas em i bin wok strong long kukim kaikai na stretim haus bambai papa i ken laikim em. Mary i tok: ‘Wok i kamap olsem hap skin bilong mi. Mi ting sapos mi mekim planti wok moa o mekim gutpela tru, papa bai laikim mi. Tasol nogat; papa i sutim tok long mi​—em tasol.’

Mary i bikpela pinis na em i wok yet long stretim dispela tingting kranki bilong em. Em i tok: ‘Inap long nau mi ting mi samting nating tasol. Olgeta taim mi ting mi mas wok na man i ken laikim mi, na sapos mi no kamapim wanpela gutpela samting, mi olsem samting nating. Long ol pati mi save wok strong long kukim kaikai o lukautim ol man inap long skin bilong mi i no gat strong moa. Mi pilim olsem wok i pe bilong mi bilong i stap long pati.’

Ol man i gat wankain tingting olsem Mary, ol i mas kisim stretpela tingting long wok. No ken tingim wok tasol, ol i mas tingim ol narapela samting tu. Baibel i save strongim bel bilong man bilong wok. (Sindaun 6:​6-8; 2 Tesalonaika 3:​10, 12) Jehova i man bilong wok. (Song 104:24; Jon 5:17) Tasol Jehova i no man bilong wok oltaim; em i gat taim bilong amamas taim em i wokim ol samting na long taim em i wokim pinis.​—Stat 1:​4, 12, 18, 21, 25, 31; skelim wantaim Saveman 5:18.

Jehova i givim wok long Saveman, em Pikinini bilong em, Jisas, na em tu i amamas long wok. (Sindaun 8:​30, 31) Na Jisas i tokim lain bilong em ol bai kisim malolo taim ol i wok wantaim em. Tasol maski ol i mekim bikpela wok, i no olsem ol i no inap malolo.​—Matyu 11:​28-30; Mak 6:31; skelim wantaim Saveman 4:6.

Ating papa o mama i bin tokim yu olsem, wok bilong yu bai kamapim pasin tru bilong yu​—yu man nating o yu man i gat nem. O sapos yu laik papa o mama i laikim yu, orait yu mas mekim ol samting bilong kirapim em long laikim yu. Ating bai yu amamas long save Jehova i no gat dispela kain tingting. Baibel i tok: “Yupela papa, yupela i no ken mekim ol pikinini bilong yupela i kros, nogut ol i pilim olsem ol i no inap mekim wanpela gutpela wok.” (Kolosi 3:21) Maski man i no pilim ol gutpela pasin Jehova i mekim, Jehova i tingim em na sori long em. Jehova i no wetim man i kirap pastaim long laikim em na mekim wok bilong em. Baibel i tok: “God i bin laikim yumi pastaim,” maski yumi “ol man bilong mekim pasin nogut.” Tru tumas, Jehova i kirap na laikim yumi pastaim. (1 Jon 4:19; Rom 5:​6-8) Na Jehova i no save sutim tok long yumi taim yumi mekim laik bilong em. Na taim yumi mekim wok bilong Jehova, dispela i olsem rot bilong kamapim bel bilong yumi olsem yumi laikim em tru.

Kalabus Long Televisen

Sampela i tok, pasin bilong lusim bikpela hap taim na lukim televisen, em pasin bilong stap kalabus long wanpela samting. Wanpela meri (Marie Winn) i tok: ‘Televisen i wankain long drak na dring. Ol piksa i kamap long televisen i mekim na man i no tingim moa ol hevi o i stap bilong em. Em i amamas long sindaun tasol na lukim televisen na tingting i no gat wok.’​—Buk The Plug-In Drug.

Tru, i no gat rong long lusim tingting long ol wok bilong yu sapos em bilong liklik taim tasol. Tasol televisen i bosim tingting bilong sampela man na bel i no inap pilim ol samting tru tru. Taim televisen bilong wanpela maritman i bagarap em i tok: ‘Mi pilim olsem inap planti yia tingting bilong mi i olsem samting i dai pinis. Ai bilong mi i pas tasol long televisen na mi no inap lusim.’ Na yangpela Kai i tok: ‘Mi no laik lusim bikpela hap taim na lukim televisen, tasol mi no inap bosim. Ol samting i kamap long televisen i mekim na mi mas lukim.’

Man i lusim bikpela hap taim na lukim televisen i no save wokim tingting. Baibel i tok, i gutpela sapos yumi tingim long bel ol samting yumi wok long kisim save long en. Bilong mekim olsem, yumi mas sindaun long wanpela hap i no gat pairap samting na lusim haptaim bilong wokim tingting olsem. (Josua 1:8; Song 1:​2, 3; 145:5; Matyu 14:23; Luk 4:42; 5:16; 1 Timoti 4:15) Tasol sampela man i pret sapos i no gat liklik pairap samting; ol i no laik tingim wanpela samting, olsem na ol i painim samting bilong helpim ol, na planti taim dispela samting em televisen. Tasol maski televisen i kamapim sampela gutpela piksa, em i no samting tru tru olsem i save painim yumi.

Pilai Laki Oltaim

As bilong pilai laki em pasin mangal. Tasol man bilong pilai laki i no tingim mani tasol. Nogat.a Nigel i tok: ‘Mi mas pilai bilong kisim amamas na mi no ken tingim ol hevi bilong mi. Pilai laki i olsem mi kisim drak.’ Man bilong pilai laki i amamas long pilai, maski em i win o nogat, o em i kisim hevi o nogat. Ol pren bilong Nigel i lusim em. Famili bilong sampela man bilong pilai laki i save lusim ol. Planti i kisim sik. Na klostu olgeta i pinisim mani bilong ol. Tasol ol i pilai​—wan wan tasol i lusim, long wanem, winmani i no pulim planti man bilong pilai laki​—pilai i pulim ol. Taim ol i pilai ol i amamas na ol i pilim wankain amamas olsem long taim man i kisim drak.

Tru, man i pilai laki inap lusim tingting long ol hevi bilong em inap liklik taim, tasol ol hevi i no ranawe, ol i stap. Sut bilong kilim pen i no ken stretim bikpela bagarap man i kisim, em i mas kisim sampela marasin moa. Sapos man bilong pilai laki i gat sampela hevi na dispela hevi i bin kirapim em long pilai laki, orait em i mas save long en na mekim sampela samting bilong stretim. Em bai hatwok long mekim olsem, tasol em i mas strongim bel na bihain em bai kisim gutpela samting long en.

Lusim Kalabus

Man i no ken givim baksait long dispela bel hevi i save kirapim em long mekim wanpela pasin na nau em i stap kalabus long en. Em i mas save long as bilong hevi na wok long stretim. Em bikpela hatwok tru. Wanpela man bipo em i kalabus long dring na drak i tok: ‘Mi bin kalabus long dring na drak inap 30 yia na mi no inap lusim wantu tasol. Mi bin hatwok tru, long wanem, mi gat bikpela hevi tru na mi bin mekim nabaut long drak na dring bilong karamapim hevi bilong mi.’

Tasol maski man i hatwok long lusim dring o drak samting, sapos em i mekim, gutpela samting tru bai painim em. Tingim Mary, em pastaim yumi bin stori long em. Em i tok: ‘Inap planti yia mi pret long karim ol hevi bilong mi, i olsem mi laik ranawe long ol, olsem na mi givim bel long wok oltaim na bai mi no ken tingim ol hevi. Tasol nau mi wok long karim hevi, na mi kirap nogut, long wanem, ol hevi i no bikpela samting moa.’

Wankain samting i bin kamap long planti man i bin winim hevi long stap kalabus long wanpela samting. Ol i no stap moa olsem “wokboi nating bilong pasin bilong bagarap.” Ol i beten askim God long givim “bikpela strong” long ol bilong helpim ol long winim traim i save painim ol taim ol i wok long lusim pasin i save kalabusim ol.​—2 Pita 2:19; 2 Korin 4:7.

[Ol Futnot]

[Rait long pes 9]

‘Dispela tok kalabus i stret long olgeta samting o pasin i save kalabusim man.’​—Dokta J. Patrick Gannon.

[Piksa long pes 10]

Wok i bikpela samting long man bilong wok oltaim. Famili i olsem nambatu tasol

[Piksa long pes 10]

Taim ol i pilai laki, ol i amamas na ol i pilim wankain amamas olsem man i kisim drak