Man i Pilai Laki Oltaim—Em i No Win Tru

PROFESA Jean Ades bilong Frans i tok: ‘Pasin bilong pilai laki oltaim em wanpela kain sik, olsem pasin bilong dring oltaim na kisim drak oltaim, ol tu i wanpela kain sik. Maski i no gat drak long en, laki inap kalabusim man olsem drak i save mekim, na nau planti man i save ol i kalabus long laki.’ Maski man bilong pilai laki oltaim em i lusim bikpela mani, dispela pasin i pas olgeta long skin bilong em, olsem na em bai pilai pilai i go bilong winim bek mani bilong em i bin lus. Wanpela niusman long Frans i tok: ‘Klostu olgeta man i lus long laki, ol i no bel hevi inap longpela taim​—bai ol i pilai gen. Tasol sampela man i laik tumas long pilai laki na ol i no inap bosim dispela laik, olsem na dispela pasin i save bagarapim tru sindaun bilong ol. Olgeta taim ol i tokim skin bilong ol yet olsem ol bai lusim laki, tasol ol i no inap​—pilai laki i kalabusim tru ol.’

Wanpela man bilong Saut Afrika i save pilai laki, em i tok: ‘Sapos yu kalabus long laki, taim yu pilai long wil bilong laki o pilai kas, yu no tingim moa wanpela samting. Man! Marasin adrenalin long skin i mekim na klok bilong yu i meknais hariap, olsem na bai yu tromoi olgeta mani bilong yu long wil bilong laki o long kas. Marasin adrenalin i mekim na mi inap pilai laki i go inap sampela de na nait, mi no slip. Ai bilong mi i pas long ol kat na namba, na mi ting bai mi kisim bikpela mani; mi no inap lus. Na i gat planti man olsem mi, ol i no inap lusim laki, maski ol i tromoi sampela handet kina o sampela tausen kina bilong pilai. Mipela bai pilai pilai i go inap long mani bilong mipela i pinis olgeta, na famili bilong mipela i bagarap olgeta.’

Wanpela profesa (Henry R. Lesieur) long Sen Jon Yunivesiti, Nu Yok, em i tok, strongpela laik bilong pilai laki i mekim na maski ol i win o lus, ‘inap sampela de planti man bilong pilai laki i no slip, kaikai, o go long toilet. Ol i amamas tru long pilai, olsem na ol i no tingim moa wanpela samting. Taim ol i pilai na ting bai ol i win, bel bilong ol i kirap tru na amamas, na tuhat i kamap long han bilong ol, na klok i meknais hariap, na bel i tanim.’

Wanpela man bipo em i kalabus tru long pilai laki, em i tok, em i no tingim bikpela mani em inap kisim sapos em i win long pilai laki, nogat; em i tingim bikpela amamas em i kisim taim em i pilai. Em i tok: ‘Pasin bilong pilai laki i mekim na bel i skrap long amamas. Taim wil bilong laki i tantanim na yu ting bai yu win, inap liklik taim tingting bilong yu i mekim na ai i raun na klostu yu pundaun.’ André, em wanpela man bilong Frans na em i save pilai laki, em i tok: ‘Taim yu betim FF10,000 [em mani bilong Frans] long hosres, na hos i ran i go i go, na sapos klostu long pinis bilong resis olsem 100 mita wanpela man i tok, meri o mama bilong yu i dai, yu no tingim​—yu tingim resis tasol.’

André i stori long ol samting em i bin mekim na em inap pilai laki, maski em i save lusim bikpela mani. Em i kisim dinau long ol beng, na long ol pren bilong em, na long sampela man i save mekim wok bisnis long givim mani long man olsem dinau, em ol man i save singaut long bikpela winmani. Em i bin stilim ol sek mani, na giaman long kisim mani long ol pasbuk bilong beng. Taim em i go long ol haus laki na sampela meri i stap wanpis, em i bin grisim ol i go i go inap long taim em i kisim kredit-kat bilong ol, na taim em i kisim pinis​—em i go pinis. Wanpela niusman bilong Frans i tok: ‘Nau André i no tingim ol bikpela dinau bilong em, na em inap stretim o nogat. Em i raun mekim ol dispela samting, long wanem, em i tingting strong long wanpela samting tasol​—pilai laki.’ André i kirap na mekim pasin raskol na bihain em i go kalabus. Marit bilong em i pinis.

Planti man bilong pilai laki oltaim, ol i wankain long ol man i kalabus long drak o ol man bilong dring oltaim. Maski dispela pasin bilong ol i mekim na ol i no gat wok mani moa, o bisnis na skin bilong ol i bagarap, na famili i lusim ol, ol i pilai yet.

Nau tasol long Frans, planti taun i orait long pasin bilong pilai laki. Planti bisnis i bagarap, tasol i gat wanpela bisnis i go bikpela moa. Em wanpela kain stua ol man i save lusim gutpela hanwas samting bilong ol bilong kisim liklik mani, na bihain ol inap kisim bek hanwas sapos ol i putim mani gen na hap mani antap long en. Papa bilong ol dispela kain stua i tok, planti taim ol man bilong pilai laki ol i lusim olgeta mani bilong ol long laki, olsem na ol i kam long stua na givim ring o hanwas o klos samting bilong ol bilong kisim liklik mani bilong baim bensin bilong go bek long haus. Na planti bilong ol dispela kain stua i kamap nau long sampela taun i stap long nambis bilong Amerika. Long sampela taun i gat 3-pela o 4-pela stua olsem i stap klostu klostu.

Na sampela man i mekim pasin raskol bilong helpim ol long painim mani bilong pilai laki. Profesa Lesieur i skelim dispela samting na em i tok: ‘Ol man i kalabus long laki i save mekim planti kain pasin i brukim lo. Olsem: Ol i raitim sek giaman, paulim mani bilong kampani, stil, holim gan samting na hansapim man bilong stilim mani, kisim mani bilong ol man i putim mani long hosres, olsem betim hos, mekim hait wanpela samting nogut bilong kisim mani, mekim ol tok promis giaman bilong kisim mani, baim i go long ol man sampela samting ol i bin stilim.’ Na i no dispela ol samting tasol​—sampela man bilong pilai laki, ol i save stil long bos bilong ol. Wanpela man i tok, inap 85 pesen bilong ol planti tausen man i kalabus long pilai laki na ol i save long ol, ol i tokaut olsem ol i save stil long bos bilong ol. Na em i tok moa: ‘Sapos yumi bungim mani ol man bilong dring oltaim i save tromoi, na mani ol man i kalabus long drak i save tromoi, mani bilong ol i no winim mani man i kalabus long pilai laki i save tromoi.’​—Em tok bilong Gerry T. Fulcher, dairekta bilong lain Institute for the Education and Treatment of Compulsive Gamblers.

Sampela lain i skelim moa dispela hevi na ol i tok, klostu 60 pesen bilong ol man i pilai laki oltaim na ol i no stap long kalabus, na 97 pesen bilong ol man i pilai laki na ol i stap long kalabus, ol i tok, ol i mekim ol pasin i no stret long lo bilong gavman bilong helpim ol long pilai, o bilong helpim ol long bekim dinau bilong ol, em laki i as bilong en. Long 1993, long ol taun i stap long nambis bilong Galf, Amerika, em ol taun i gat planti haus laki, inap 16 taim ol raskol i hansapim beng bilong stilim mani. Dispela pasin i go bikpela moa inap 4-pela taim long yia i go pinis. Wanpela man i bin hansapim 8-pela beng na stilim 89 tausen kina bambai em i ken mekim yet pilai laki. Na sampela man bilong pilai laki i gat bikpela dinau, na ol man i strong long ol i mas bekim, olsem na ol i holim gan na hansapim ol beng.

Nius The New York Times i tok: ‘Man i pilai laki oltaim i kalabus long dispela pasin, na taim em i laik lusim, em i gat bikpela hatwok tru, olsem man i laik lusim drak o dring.’ Ol man bilong pilai laki i tok, laki i no olsem ol narapela pasin nogut, i hatwok moa long lusim. Wanpela man i tok: ‘Mipela sampela i bin kalabus long dring na drak, na mipela i wanbel long tok, i hatwok moa long lusim pasin bilong pilai laki oltaim.’ Saveman Howard Shaffer bilong lain Center for Addiction Studies long Havat Yunivesiti, em i tok: Inap 30 pesen bilong ol man i kalabus long laki na ol i laik lusim, ‘ol i save kros long ol liklik samting, o bel bilong ol i pen, o ol i no slip gut, o mak bilong blut i go antap, o klok bilong ol i meknais hariap.’

Na dairekta bilong National Center for Pathological Gambling long Baltimo, Merilan, Amerika, em Valerie Lorenz, em i tok: ‘Ol man i pilai laki oltaim, ol i kisim sampela sik olsem: Het i pen olgeta taim, ol i hatwok long pulim win, ol i kisim pen long nek, sampela taim klok i meknais hariap na sampela taim em i wok isi isi tumas, na han o lek i save dai.’

Na sampela i kilim i dai skin bilong ol yet. Sampela lain i tok, pilai laki i samting bilong kalabusim man, tasol “i no bagarapim skin bilong em”; tasol dispela pasin i save kirapim man long bagarapim skin bilong em yet. Olsem na em i samting nogut tru. Nius The New York Times Magazine i tok, nau tasol ol i wokim ol haus laki long wanpela provins long Amerika, na ‘namba bilong ol man i kilim i dai skin bilong ol yet i go antap olsem dabol. Tasol lain bilong helt i no laik tok, as bilong dispela samting em pilai laki.’ Long Saut Afrika, insait long wanpela wik tasol, 3-pela man bilong pilai laki i kilim i dai skin bilong ol yet. I no gat wanpela man i save hamas man tru i kilim i dai skin bilong ol yet long wanem ol i gat bikpela dinau tru long pilai laki, maski dispela pilai i stret long lo bilong gavman o i no stret long lo.

Sori tru. Sampela man i kalabus long pilai laki ol i kilim i dai skin bilong ol yet. Kaunim stori i kam bihain long dispela na tingim ol samting sampela man i bin mekim bilong lusim dispela pasin.