Ples Papamama na Pikinini Wantaim i Ken Putim Yau na Lain
WANPELA MAN LONG JAPAN I RAITIM DISPELA STORI BILONG KIRAP!
LONG 1993 bos bilong wanpela kampani bilong klinim na stretim ol samting long Fukuoka Dom Stediam long Japan, em i tok: ‘Kampani bilong mipela i mas sem long pasin bilong yupela, long wanem, taim yupela klinim ol samting, ples i klin tru, winim ol samting mipela i mekim.’ Dispela man i tok olsem taim ol Witnes Bilong Jehova i redim ol samting bilong “God i Skulim Yumi” Kibung Distrik bilong ol. Na dispela man i bin stap taim ol Witnes Bilong Jehova i bin mekim kibung bilong ol long Tokyo Dom Stediam long 1992, em kibung “Ol Man i Stap Olsem Lait.” Na em i kirap nogut long ol samting em i lukim. Taim ol kibung i pinis stediam i stap klin tru, winim taim ol Witnes i kam bilong mekim kibung bilong ol. Na dispela man i tok: ‘Pasin bilong ol pikinini i nambawan tru.’
Long 1993, “God i Skulim Yumi” Kibung Distrik i bin kamap tu long Takamatsu Siti. Wanpela man i lapun liklik i lukim ol man i kam bung na em i askim sampela olsem: ‘Yupela ol Kristen? Long yia i go pinis yupela i bin bung tu, a? Taim yupela bung, ol pikinini bilong yupela i stap we?’ Ol dispela man i kam bung i tokim em olsem: ‘Ol i stap wantaim papamama bilong ol na harim ol tok na opim Baibel bilong ol yet.’ Dispela man i tok: ‘Gutpela tru. Olgeta yia mi lukim lain bilong yupela i kam na mi save kirap nogut long pasin bilong pikinini bilong yupela.’ Em i tok, planti taim em i save harim tok olsem ol pikinini na papamama i no poroman gut na toktok gut wantaim, tasol taim em i skelim pasin bilong ol pikinini Witnes, em i save ol i stap gut wantaim papamama bilong ol.
Long 1993, wanpela komyuniti skul tisa i bin go long wanpela kibung distrik bilong ol Witnes Bilong Jehova long Makuhari Mese na em i kirap nogut tru taim em i lukim pasin bilong ol pikinini long ples kibung. Skul i ples pikinini bai lain taim em i harim ol narapela i toktok, tasol dispela tisa i pilim olsem ol pikinini i no laik harim tok. Tasol long ples kibung em i lukim narapela kain samting. Em i tok: ‘Long kibung ol pikinini i sindaun gut inap longpela taim. Na ol i no sindaun nating, nogat; ol i holim pensil na raitim gut ol tok ol i save harim, maski pepa mas slip long lek bilong ol. Na i hatwok long raitim tok Japan sapos pepa i no slip gut. Toktok na pasin bilong harim tok na bilas bilong ol pikinini Witnes i narapela kain long ol narapela pikinini, long skul tu. Ating i olsem, long wanem, olgeta de papamama i lainim ol, na ol i wok long litimapim nem bilong Jehova, na famili olgeta i wok gut wantaim na stap wanbel.’
Olsem ol Israel long bipo i bin mekim, ol Witnes Bilong Jehova long nau, maski ol i lapun o yangpela, man o meri, olgeta i save bihainim lo bilong God i tok olsem: “Singautim olgeta man wantaim meri na pikinini . . . bai olgeta i ken kam na harim dispela tok.” Na Baibel i kamapim as na ol i bung wantaim: “Ol i ken harim [tok] na i stap aninit long God, . . . na bihainim gut olgeta tok bilong em.”—Lo 31:12.