Ol Skul i Gat Hevi
Ol papamama i salim ol pikinini i go long skul bilong lain long rit rait na bungim ol namba. Ol i ting skul bai lainim gut ol pikinini bambai ol i kamap gutpela man na meri na papamama i ken amamas long ol. Tasol sori tumas! Planti skul i no mekim gut wok bilong ol. Bilong wanem i olsem? Long wanem, ol skul long olgeta hap i gat hevi.
LONG planti kantri long nau ol skul i sot long mani na ol tisa, olsem na ol i no inap givim gutpela skul long ol pikinini. Wanpela nius (Time) i tok, long olgeta hap bilong Amerika i gat hevi long mani, olsem na sampela skul i mas ‘stretim ol olpela buk, larim ol rum i bagarap, pinisim ol klas bilong wokim piksa na pilai spot, o pasim skul planti de long sampela taim.’
Long Afrika tu, mani bilong helpim ol skul i sot. Wanpela nius bilong Legos (Daily Times) i tok, long kantri Naijiria i gat wanpela tisa tasol bilong olgeta 70 skulmanki, na “wanpela tisa long olgeta 3-pela i no tisa tru.” Wanpela nius bilong Saut Afrika (South African Panorama) i tok, ol skul bilong ol blakskin long Saut Afrika i sot long ol tisa, tasol narapela samting tu i mekim na ol dispela skul “i bagarap” em olsem: planti tumas pikinini i pulap long ol skul, na kros pait i kamap long gavman.
Na maski ol skul i gat planti tisa na ol gutpela buk samting, i no olsem ol pikinini bai kisim gutpela skul. Olsem: Long Ostria planti manki i gat 14 krismas (33 pesen) ol i no inap bungim ol liklik namba o rit gut. Wanpela nius bilong Landon (The Times) i tok, long Briten “ol skulmanki i no kisim gutpela mak long bungim ol namba, na long saiens, na long tok Inglis, olsem ol skulmanki long Jemani, na Frans, na Japan.”
Long Amerika ol tisa i tok, ol skulmanki inap kisim gutpela mak long tes, tasol ol i no inap raitim gut stori, o wokim tingting na stretim gut ol namba, o redim sotpela tok bilong kamapim ol bikpela tok ol i skul long en o i stap long wanpela pas samting. Olsem na ol bos bilong edukesen long olgeta hap bilong graun i laik skelim gen ol samting ol skul i lainim ol pikinini long en na pasin bilong givim mak long ol.
Pasin Pait Long Skul
Ol ripot i tok klia olsem pasin pait i kamap bikpela long ol skul. Long wanpela kibung bilong ol tisa long Jemani, ol i tok inap 15 pesen bilong ol skulmanki i “redi pinis bilong mekim pait—na 5 pesen i no gat tupela tingting long bagarapim tru narapela manki, olsem kikim em taim em i pundaun na em i no inap mekim wanpela samting bilong lukautim em yet.”—Nius Frankfurter Allgemeine Zeitung.
Ol man i tingting planti long sampela pasin nogut tru i bin kamap. Long ples bilong ol toilet long wanpela haiskul long Paris, fopela skulmanki i reipim yangpela meri i gat 15 krismas. Dispela i kirapim ol sumatin long raun long rot na singaut long gavman i mas putim gutpela sekuriti moa bilong lukautim ol long skul. Ol papamama i tingting planti long ol pasin sem i kamap planti long ol skul long nau, na pasin bilong pretim manki long givim mani, nogut ol i tokaut long samting em i bin mekim, na pasin bilong bagarapim bel na tingting bilong pikinini. Dispela i no kamap long Yurop tasol, long ol narapela hap bilong graun tu.
Dipatmen Bilong Edukesen long Japan i tok, pasin pait i kamap bikpela namel long ol skulmanki long gret 7 na i go inap gret 12. Wanpela nius bilong Saut Afrika (The Star) i putim het-tok olsem “Ol Skulmanki i Gat Gan Ol i Bosim Ol Skul.” Nius i tok, long sampela klas-rum long ol skul long Soweto, pait i kamap kain olsem bilong hap bilong Wes long Amerika long yia 1850 samting. Na wanpela nius bilong Landon (The Guardian) i tok, Nu Yok Siti i gat nem olsem ples bilong pait, tasol nau dispela i kamap nogut moa yet—“wanpela kampani bilong sekuriti i tokaut olsem ol i kisim oda bilong wokim hariap ol klos bilong pasim katres bilong lukautim ol skulmanki.”
Pasin pait i kamap bikpela long ol skul long Briten tu. Wanpela ofisa bilong yunion bilong ol tisa i tok: “Insait long 10-pela yia i go pinis, mipela i lukim planti skulmanki moa i holim naip samting bilong mekim pait, na nau dispela pasin i kalap long ol pikinini i yangpela moa, na long ol pikinini meri tu.”
Olsem na yumi no kirap nogut long sampela papamama i rausim pikinini bilong ol long skul na ol yet i givim skul long ol long haus. Tasol planti papamama i no inap mekim olsem na ol i tingting planti long ol samting nogut i kamap long ol pikinini long skul, na ol i laik save long rot bilong helpim pikinini bilong ol. Papamama i ken mekim wanem bilong helpim ol pikinini long winim ol hevi i painim ol long skul? Olsem wanem ol i ken wok gut wantaim ol tisa bilong helpim pikinini long kisim gutpela skul? Ol tok i kamap bihain long dispela bai bekim ol dispela askim.