Pas Bilong Ol Man
Ol Pikinini i Lus Taim mi kaunim pinis ol stori “Ol Pikinini i Lus—Wanem Taim Dispela Hevi Bai Pinis?” (Septemba 8, 1995), aiwara bilong mi i wok long pundaun. Sampela samting yupela i bin stori long en i wankain olsem bilong mi. Mi tok tenkyu long Jehova long em i bin givim strong long mi bilong sanap strong na karim ol hevi. Long rot bilong Tok bilong em mi kisim save na wetim Paradais, long dispela taim kain hevi olsem bai i no inap painim moa ol man.
T. O., long Brasil
Las De Mi wanpela man bilong autim tok long olgeta de, olsem na mi laik tok tenkyu long yupela long ol nius bilong yumi. Taim mi wok long kaunim ol stori “Yumi Stap Long Taim Bilong Las De?,” long Kirap! bilong Novemba 8, 1995, mi bin ting olsem: ‘Ol dispela stori i gutpela tru, na i stret, na i gat ol gutpela piksa!’ Pasin bilong putim ol gutpela piksa na ol rait i kamapim gut olgeta samting na em i mekim ol stori i isi tru long kaunim na save gut long en. Mi bin amamas tru long tilim kain nius olsem long ol man i stap klostu long mi.
J. B., long Amerika
Stap Singel Tenkyu long stori “Baibel i Tok Wanem? Presen Bilong Stap Singel.” (Septemba 8, 1995) Long ples mi stap long en, marit em i bikpela samting; ol brata sista Kristen bai kirapim ol yangpela long marit. Mi no bin tingting tumas long marit i kam inap long taim mi kisim 30 krismas. Long dispela taim mi gat laik long mi mas i gat poroman. Mi amamas tru long Jehova long kamapim dispela stori long taim mi pilim olsem mi no inap bosim moa laik bilong mi long i stap singel.
E. M. A., long Amerika
Pasin Bilong Toktok Tenkyu tru long stori “Pasin Bilong Toktok Gut.” (Oktoba, 8 1995) Inap longtaim, mi bin wok strong long pinisim pasin bilong sem. Tasol nau mi save, i no mi wanpela tasol i gat dispela hevi. Bai mi kirap long bihainim ol tok bilong yupela.
A. L., long Amerika
Yupela i tok i gutpela yumi kaunim ol stori bilong Wastaua na Kirap!, na tru tumas, em inap tru long helpim mipela. Taim yumi kirap mekim olsem, bai yumi i gat planti samting long toktok long en.
V. M. J., long Amerika
Kot Bilong Misin Long stori bilong yupela “Kot Bilong Misin Long Meksiko—Olsem Wanem Em i Kamap?” (Julai 8, 1995), yupela i bin tok olsem “king bilong ol Astek, em Nesahualkojotl.” Tasol, Nesahualkojotl em i no bin stap king bilong ol Astek, em i bin stap king bilong ol Seshimek.
E. R. C. L., long Meksiko
Tru, Nesahualkojotl em wanpela bilong lain Seshimek em i no bilong lain Astek. Tasol, sampela buk kain olsem “Nueva Enciclopedia Cultural IEPSA,” i kolim em olsem “king bilong ol Astek.” Olsem buk “Historia de México” i kamapim klia, Nesahualkojotl i stap king “wantaim ol Astek” em ol i bin daunim lain Seshimek na bosim ol.—Edita
Rausim Bel Dispela stori “Ol Yangpela i Laik Save . . . Rausim Bel—Em i Save Stretim Hevi?” i bin kirapim tingting bilong mi. (Oktoba 8, 1995) Twenti-foa yia i go pinis taim mi gat 15 krismas na mi kisim bel, mi bin i gat ol wankain tingting na bel hevi olsem ol meri long dispela stori. Papa bilong pikinini i strong long mi mas rausim bel, tasol mi laik karim pikinini. Pris bilong mi i laik mi givim pikinini bilong mi i go long ol narapela man bambai ol i ken kisim na lukautim olsem pikinini bilong ol yet. Mi no bin go gen long lotu Katolik inap long nau. Tasol, papamama bilong mi i bin helpim mi gut. Mi bin tingting long lukautim gut pikinini bilong mi long ol samting bilong spirit. Na taim ol Witnes Bilong Jehova i kam long haus bilong mipela, mi orait long ol i ken stadi long Baibel wantaim mi, na i no longtaim bihain na mi kisim baptais. Nau mi marit na mi stap amamas. Na pikinini man bilong mi? Em i mekim wok long nambawan ofis bilong ol Witnes Bilong Jehova. Mi no laik tru long tingim dispela rot mi inap bihainim pastaim—rausim bel. Em i no save stretim hevi.
G. J., long Amerika