Pas Bilong Ol Man
Graun i Laik Bagarap Mi rait bilong toktok long ol stori “Graun i Laik Bagarap—Man Inap Stretim Bek?” (Jun 8, 1996) Em i gutpela tru long kaunim stori i strongim yumi. Namba tri hap bilong ol dispela stori i helpim yumi long tingim Paradais, na long dispela taim bai yumi no tingting planti long graun win wara i bagarap, o long bikpela hul i kamap long oson. Mi laik i stap long dispela Paradais wantaim famili na ol pren bilong mi.
A. C., long Amerika
Mipela i bin laikim blok long pes 8 na 9 i stori long ol kain hevi olsem katim na rausim bikbus, sot long wara, ol animal samting i laik pinis. Ol dispela stori i helpim mipela long save gut long bikpela hevi i painim graun bilong yumi long nau. Mipela i pilim gutpela tru long save olsem Man bilong wokim yumi, em wanpela tasol em inap long stretim dispela bikpela hevi.
O. P. na F. J. O., long Spen
Ripot Bilong Jessica Nau tasol mi pinis long kaunim “Ripot Bilong Jessica” long Kirap! bilong Me 8, 1996. Stori i bin strongim mi tru! Taim mi lukim wanpela gutpela yangpela i amamas long lotuim Jehova na stap gut long em, dispela i save mekim mi i amamas tru. Stori bilong Jessica i helpim mi long tingim olsem, yumi gat wok long autim tok long olgeta taim, taim rot i op.
A. H., long Amerika
Stap Bilong Mi i Gat As Mi bin pilim tru stori “Bipo i Stap Bilong Mi i No Gat As Bilong En.” (Me 8, 1996) Taim mi kaunim dispela stori, i olsem mi kaunim stori bilong mi yet. Mi tu i bin raun nabaut na i no tingim wanpela gutpela samting bai painim mi long bihain. Tasol ol i singautim mi i go long Haus Kingdom bilong ol Witnes Bilong Jehova na mi kirap stadi long Baibel. Nau mi amamas long insait long wok bilong autim tok long olgeta de, na wok long helpim ol narapela long save long ol gutpela samting Jehova i bin soim long mi na mi wet long en.
C. R., long Amerika
Stap Pren Bilong God Mi laik tokim yupela olsem mi bin pilim tru dispela stori “Ol Yangpela i Laik Save . . . Sapos Mi Stap Pren Bilong God, Dispela Bai Helpim Mi?” (Mas 8, 1996) Long dispela yia, mi bin i stap nogut tru na bel hevi i bagarapim mi na mi no amamas long mi yet. Mi no gat strong long beten o long stadi long Baibel. Mi no pilim tok ol brata Kristen i givim bilong strongim mi. Taim mi kaunim dispela stori, em namba wan taim mi pilim olsem mi inap kamap gutpela gen.
S. K., long Jemani
Pren i Mekim Rong Mi rait long toktok long stori “Ol Yangpela i Laik save . . . Mi Mas Mekim Wanem Sapos Pren i Mekim Rong?” (Me 8, 1996) Wanpela gutpela pren bilong mi i bin raus long kongrigesen long yia i go pinis. Bel bilong mi i bin bagarap stret. Mi pilim olsem mi no bin helpim gut em, na mi no bin stap planti taim wantaim em bilong helpim em, na mi no gutpela pren bilong em. Taim mi kaunim stori na save olsem i no asua bilong mi na em i lusim tok i tru, mi pilim olsem wanpela bikpela hevi tru i lusim mi!
L. T., long Amerika
Mi pas gut wantaim gutpela mama bilong mi, tasol em i kirap na bihainim ol pasin i no stret. Bihain mi tokim ol elda bilong kongrigesen long ol samting em i wok long mekim na kongrigesen i rausim em. Mi no amamas long mi yet, long wanem, mi bin tokim ol elda. Tasol nau mi laik wok strong long winim dispela tingting kranki bilong mi taim mi bihainim ol tok yupela i kamapim long stori.
I. Y., long Japan