Em i Bungim Narapela Kain Samting Tru
“BIPO mi no bin mekim wanpela gutpela samting olsem!” Em tok bilong Kristie taim em i stori long narapela kain samting tru em i bin bungim. Olsem wanem? Yu tu bai tok olsem sapos yu bin waswas wantaim ol dolfin long Galf Bilong Meksiko?
Olgeta man i save amamas tru long lukim ol dolfin i raun insait long solwara o pilai pilai olsem sanap long tel bilong en na pul i go bek, o sut i kam antap tru na lusim solwara olgeta, o long larim ol man i sindaun long baksait bilong en na raun. Ol man i lukim kain samting olsem, ol i laik tru long go insait long solwara na pilai wantaim ol dolfin.
Long olgeta taim Kristie i bin ting olsem. Orait wanpela taim em i raun long bot na waswas long solwara long Galf Bilong Meksiko. Em nau, wanpela het i kam antap long solwara klostu long em. Bihain liklik, tripela dolfin i ting ol i bin painim wanpela pren bilong pilai wantaim ol. Pastaim Kristie i pret liklik, tasol bihain em i amamas taim em i mekim sampela samting wantaim ol dolfin. Em i bin stap isi na wetim ol dolfin i mekim sampela samting pastaim.
Kristie i tok: “Wanpela dolfin i kam antap long solwara klostu long mi—mi bin lukluk long en na em i bin lukluk long mi. Mi putim han long skin bilong en na toktok long en olsem mi save mekim long dok bilong mi.”
Ol dolfin i gat save, olsem na ol man i amamas long lukim ol pilai samting ol bai mekim. Na planti man i gat save long pasin bilong dolfin na ol i skulim dolfin long mekim sampela kain pilai, ol i tok, dolfin i no pret long man, na planti bai amamas long pilai nating maski man i no praisim ol long liklik hap kaikai.
Savemeri Liz Morris i wok long skelim pasin bilong ol dolfin long wanpela ples ol i kolim Si-Wol, long Florida, Amerika. Mipela i askim em wanem samting i save givim bikpela amamas long em taim em i wok wantaim ol dolfin, na em i tok: “Ating em pasin bilong ol. Ol i laik pilai pilai na ol i laik save long olgeta samting, olsem na i no hatwok long pren gut tru wantaim ol . . . Ol bai amamas tru taim yumi holim ol na mekim sampela samting long ol bilong makim olsem yumi laikim ol.” Long nupela taim God i tok promis long kamapim, yumi olgeta inap bungim planti narapela kain samting tru olsem Kristie i bin bungim.