Em Nau​—⁠Wanpela Gavman Bilong Pinisim Pasin Raskol

BAIBEL i tok profet olsem, long taim bilong yumi ol man bai i ‘laikim ol yet tasol, na laikim tumas long kisim mani. Ol bai i litimapim nem bilong ol yet na hambak nabaut, na tok nogut long ol arapela. Ol bai i sakim tok bilong papamama, na ol bai i no tok tenkyu. Ol bai i givim baksait long ol pasin bilong God. Ol bai i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol. Ol bai i tok nogut long ol arapela. Ol bai i no bosim laik bilong bodi bilong ol, na ol bai i pait na birua long olgeta gutpela pasin.’ (2 Timoti 3:​2, 3) Ol kain man olsem i save mekim pasin raskol.

Ol man i as bilong pasin raskol, olsem na sapos ol i senis na kamapim gutpela pasin, bai i no gat planti pasin raskol i kamap. Tasol i hatwok long ol man i senis na kamapim gutpela pasin. Long nau ol i hatwok moa, long wanem, kirap long 1914, em Baibel i makim stret dispela yia, yumi stap long “taim bilong las de” bilong dispela graun. Olsem Baibel i tok, “planti hevi nogut tru” bai i kamap long dispela taim. As bilong ol dispela hevi, em Satan, nambawan man bilong mekim pasin nogut, na em i “belhat nogut tru,” long wanem, “em i save, em i gat sotpela taim tasol bilong i stap.”​—⁠2 Timoti 3:1; KTH 12:⁠12.

Dispela i helpim yumi long save long as na pasin raskol i go bikpela long nau. Satan i save em na ol wok bilong em klostu nau bai bagarap. Long dispela sotpela taim tasol, Satan i wok long kain kain rot bilong kirapim ol man long mekim ol pasin nogut olsem 2 Timoti sapta 3 i stori long en. Olsem na gavman i laik pinisim pasin raskol i mas pinisim strong bilong Satan long bosim ol man, na helpim ol man long senisim pasin bilong ol bambai ol i no mekim ol pasin 2 Timoti sapta 3 i stori long en. Tasol olsem wanem? Wanpela gavman inap mekim dispela bikpela wok i narakain tru?

I no gat wanpela gavman bilong dispela graun em inap mekim dispela samting. Wanpela tisa bilong lo long Yukren, em J. Vaskovich, em i tok, ‘i mas i gat wanpela lain bilong helpim ol gavman na ol narapela lain long kamap wanbel, na long stretim tok long ol bikpela samting na helpim ol man long wok gut wantaim.’ Na taim ol kantri i bung bilong stori long pasin raskol, presiden bilong Filipin, em Fidel Ramos, em i tok: “Ol nupela save bilong wokim ol samting i mekim na yumi inap go long wanpela hap hariap o save kwiktaim long wanpela samting, olsem na pasin raskol i bin brukim boda bilong ol kantri na em i kamap olsem wanpela hevi bilong planti kantri. Olsem na i stret olgeta kantri i mas wok wantaim long stretim dispela hevi.”

“Bikpela Hevi Bilong Olgeta Hap”

Yunaitet Nesen i wanpela oganaisesen i gat sampela bikman bilong ol kantri i insait long en. Taim dispela oganaisesen i kirap mekim wok, em i bin wok long pinisim pasin raskol. Tasol olsem ol gavman, em tu i no inap stretim dispela hevi. Buk The United Nations and Crime Prevention i tok: ‘Planti kantri i no gat strong bilong daunim pasin raskol bilong ples, na pasin raskol i go nogut olgeta long olgeta hap, olsem na pasin bilong bagarapim man, na mekim pretim ol polis na jas samting, na grisim ol na bai ol i paulim kot, em i kamap bikpela. Ol lain i mekim pasin birua na pretim man, ol i bin kilim i dai planti tausen tausen man i no gat rong. Pasin bilong brukim lo na wok bisnis long drak i mekim nogut long planti man long olgeta hap.’

Namba 4 presiden bilong Yunaitet Stets bipo em James Madison. Wanpela taim em i bin tok: ‘Bilong kamapim wanpela gavman em man bai bosim man, bikpela hatwok i olsem: I mas i gat wanpela gavman em inap bosim ol man, na wanpela gavman i strong long bosim em yet.’ (Skelim wantaim Saveman 8:⁠9.) Olsem na gutpela rot em long rausim ol gavman ‘em man i bosim man,’ na kamapim wanpela gavman God i bosim. Olsem wanem? Dispela kain samting inap kamap?

Gavman Bilong Pinisim Pasin Raskol

Ol trupela Kristen i bilipim tok bilong Baibel long Kingdom bilong God.a Em wanpela gavman tru. Yumi no inap lukim dispela Kingdom, long wanem, em i stap long heven, tasol ol samting em i mekim long dispela graun yumi inap lukim. (Matyu 6:​9, 10) Dispela Kingdom em Krais Jisas wantaim lain 144,000 em ol i kam long “olgeta lain man, na bilong olgeta tok ples, na bilong olgeta kain skin, na bilong olgeta kantri . . . , na bai ol i stap king na bosim ol manmeri bilong graun.” Dispela strongpela gavman bai bosim “planti manmeri tru,” na olsem Baibel i tok, ol tu i “bilong olgeta lain man na bilong olgeta kantri na bilong olgeta kain skin na bilong olgeta tok ples.” (KTH 5:​9, 10; 7:⁠9) Olsem na tupela lain wantaim​—⁠ol man bilong bosim Kingdom na ol man i stap aninit long en​—⁠ol i bilong olgeta lain, ol i stap wanbel, na God i orait long ol.

Ol Witnes Bilong Jehova i stap aninit long wok bos bilong God, olsem na i no gat planti pasin nogut insait long lain bilong ol. Olsem wanem na ol i no gat planti hevi? Long wanem, ol i amamas long lain long bihainim ol gutpela lo bilong Baibel long wokabaut bilong ol, na long larim spirit bilong God i gat bikpela strong long helpim ol long kamapim gutpela pasin bilong spirit​—⁠em pasin sori. Baibel i tok: “Yupela i mas givim bel bilong yupela long ol arapela manmeri. Dispela pasin i winim tru olgeta arapela pasin.” (Kolosi 3:14) Long 230 samting kantri, ol Witnes Bilong Jehova i save kamapim dispela pasin sori na ol i stap wanbel, olsem na ol i kamapim klia olsem Kingdom bilong God i wok nau long mekim sampela samting bilong pinisim pasin raskol.

Tingim wanpela samting i bin kamap long 1994. Ol i bin givim askim long 145,958 Witnes Bilong Jehova long Jemani, na planti bilong ol i tok, bilong kamap wanpela Witnes, ol i mas winim sampela bikpela hevi pastaim. Ol i stadi long Baibel na dispela i bin kirapim ol long senisim pasin bilong ol. Olsem: Inap 30,060 bilong ol i bin winim hevi bilong smok o kisim drak, na 1,437 bilong ol i bin lusim pilai laki, na 4,362 bilong ol i bin lusim pasin bilong kros pait o long mekim pasin nogut, na 11,149 bilong ol i winim sampela pasin olsem bel nogut o pasin birua, na famili bilong 12,820 bilong ol i no bin stap gut, tasol ol i winim dispela hevi.

Tru, em ol samting i bin painim ol Witnes Bilong Jehova long wanpela kantri tasol, tasol wankain samting i bin painim planti Witnes long ol narapela hap. Tingim wanpela yangpela man bilong Yukren, nem bilong em Yuri. Taim em i kirap stadi Baibel wantaim ol Witnes Bilong Jehova, em i man bilong stilim ol samting long poket bilong ol man. Em i bin go long longwe ples Mosko, long wanem, em i save long dispela hap i gat bikpela lain man i raun, olsem na em i no ken hatwok long stil.

Long 1993, Yuri i stap gen long Mosko, namel long bikpela lain man. Long Fraide Julai 23, inap olsem 23,000 manmeri bilong olgeta hap i sindaun long Stediam Lokomotiv, tasol ol i no pret long Yuri, long wanem, nau em i wanpela Witnes Bilong Jehova. Yuri i go antap long pletfom, long wanem, em i insait long program i kamap long dispela lain man bilong olgeta hap. Pasin bilong em i senis na em i save bihainim lo bilong Baibel i tok: “Ol stilman i no ken stil moa.”​—⁠Efesus 4:28.

Planti planti man moa i olsem Yuri, ol i bin lusim pasin raskol bilong ol bambai ol i ken kisim laip long nupela stretpela taim God bai kamapim. Dispela i kamapim klia tok tru bilong Bikman Peter Imbert, bipo em wanpela bikman bilong polis long Briten, em i tok: “Mipela inap pinisim pasin raskol kwiktaim sapos olgeta man i redi long mekim sampela samting na no ken les.” Gavman bilong God i redi long skulim ol gutpela man bilong kirap na “no ken les” long mekim sampela samting.

Taim i No Gat Pasin Raskol Moa

Maski man i mekim wanem kain pasin raskol, dispela i makim olsem em i no sori long narapela man. Ol Kristen i save bihainim Jisas, em i tok: “Yupela i mas laikim God . . . long bel . . . na long spirit . . . na long tingting bilong yupela.” Na “yu mas laikim ol [narapela] olsem yu laikim yu yet.”​—⁠Matyu 22:​37-39.

I gat wanpela gavman tasol i wok long pinisim pasin raskol long rot bilong skulim ol man long bihainim dispela tupela lo​—⁠em Kingdom bilong God. Long nau, dispela skul i save helpim inap 5 milion Witnes Bilong Jehova. Ol i wok strong long ol i no ken larim pasin nogut i kamap long bel bilong ol, na ol i redi long mekim sampela samting ol yet i mas mekim na i no gat moa pasin nogut. Samting God i bin mekim long i stap bilong ol, dispela i olsem piksa bilong ol samting em bai mekim bihain long nupela taim aninit long wok gavman bilong em. Man! Tingim wanpela taim na i no gat moa polis na jas na loya na kalabus!

Bilong kamapim dispela kain samting long olgeta hap bilong graun, i mas i gat narapela kain wok bos i no bin kamap bipo na i kam inap long nau​—⁠wanpela gavman God yet i mas kamapim. Daniel 2:⁠44 i tok: “Na taim ol dispela king i stap yet [long nau] God bai i kirapim wanpela kingdom [long heven] na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.” Na God bai bagarapim Satan, olsem na pasin na laik nogut em i save bosim bai pinis.​—⁠Rom 16:⁠20.

Taim ol gavman bilong graun i pinis na gavman bilong God long heven i bosim graun, ol man i no ken bosim gen ol man. Ol king bilong heven​—⁠ol king i winim ol ensel​—⁠ol bai skulim ol manmeri long ol pasin i stret. Em nau, bai i no gat moa ol kilman, na ges i gat gip nogut, na bom bilong ol paitman​—⁠ol bai pinis olgeta! Bai i no gat moa pasin bilong sakim wanpela lain na helpim sampela lain, em kain pasin i save kamapim pasin raskol! Na bai i no gat sampela i gat planti samting na sampela i stap rabis, nogat tru!

Profesa S. A. Aluko bilong wanpela yunivesiti (Obafemi Awolowo) long Naijiria, em i tok: ‘Ol rabisman i no inap slip long nait, long wanem, ol i hangre; ol maniman i no inap slip, long wanem, ol rabisman i raun na stil.’ Tasol klostu nau olgeta man bai slip gut, long wanem, ol i save wanpela gavman​—⁠em gavman bilong God​—⁠em i pinisim tru pasin raskol!

[Futnot]

[Piksa long pes 10]

Wanpela stilman bilong bipo na man em i bin stil long em, nau tupela i stap wanbel olsem brata Kristen