Ol Yangpela i Laik Save . . .
Bilong Wanem God i Larim Ol Samting Nogut i Kamap?
LIDIJA em i yangpela meri tru taim pait i kirap long kantri bilong em—em kantri bipo ol i kolim Yugoslavia. Em i tok: “Planti san na nait mi bin stap insait long wanpela ples hait i tudak. Planti taim mi laik ranawe i go ausait, maski ol birua bai kilim mi i dai! Taim pait i no kamap yet, mipela i no sot long wanpela samting, tasol nau mipela i amamas long i stap laip tasol.”
Ol hevi bilong pait i mekim na Lidija i bagarap long ol samting bilong spirit. Em i tok: “Inap planti wik mipela i no inap autim tok o go long ol miting. Mi ting Jehova i no tingim moa mipela. Mi bin askim mi yet: ‘Bilong wanem em i no helpim mipela nau?’ ”
Pait, pasin raskol, bagarapim man, sik, bikpela bagarap, birua—olgeta dispela samting inap painim ol yangpela tu. Na taim hevi i painim yu yet, yu inap ting: ‘Bilong wanem God i larim ol dispela samting nogut i kamap?’
Sampela man bilong God long bipo, ol tu i bin askim olsem. Tingim profet Habakuk. Em i lukim ol samting nogut i kamap namel long lain bilong God na em i tok: “Bikpela, planti taim mi singaut long yu. Wanem taim bai yu harim singaut bilong mi na yu helpim mipela, na ol dispela samting nogut i kamap long mipela i no ken bagarapim mipela? . . . Bilong wanem yu larim ol dispela hevi i kamap? Olsem wanem na yu lukim ol dispela samting nogut i kamap long ol manmeri na yu no mekim wanpela samting? Long olgeta hap mi lukim ol i bagarapim ol manmeri na ol samting bilong ol. Na ol man i save kros na pait nabaut.” (Habakuk 1:2, 3) Kain bel hevi olsem i save painim sampela yangpela Kristen long nau tu.
Tingim bel hevi bilong wanpela yangpela Kristen taim papa bilong em i dai wantu tasol. Em i tok: ‘Mi bin go longlong olgeta; mi go long windo na bikmaus i go long God Jehova. Mi putim olgeta asua i go long em. Olsem wanem dispela samting inap kamap? Papa em i wanpela gutpela man tru na em i save laikim tru mama, na nau dispela samting i kamap. Olsem wanem? Jehova i no sori long mipela?’ Tru, taim kain hevi olsem i kamap, em pasin bilong yumi man olsem yumi longlong nabaut, bel hevi, o belhat. Tingim: Gutpela profet Habakuk tu i bin bel hevi, long wanem, God i no bin pinisim pasin nogut. Tasol sapos man i no daunim pasin bilong bel nogut i stap long bel bilong em, bikpela hevi inap kamap. Em inap “putim hevi long Bikpela na i kros long em.”—Sindaun 19:3.
Orait, olsem wanem yu ken bosim bel na yu no belhat na bel nogut? Pastaim, yu mas save long as bilong pasin nogut.
God i No As Bilong Ol Samting Nogut
Baibel i kamapim long ples klia olsem God i no laik bai yumi kisim ol hevi. Em i putim namba wan man na meri long wanpela paradais i no gat pen na hevi. (Stat 1:28) Ating yu save olsem wanem sindaun bilong tupela i bagarap, a? Wanpela spirit, bihain em i kisim nem Satan, em i kirapim Adam na Iv long sakim tok bilong God. (Stat sapta 3; KTH 12:9) Adam i mekim olsem na ol pikinini bilong em ol i kisim sin na ol samting nogut sin i save kamapim.—Rom 5:12.
Em nau, i no asua bilong God na pasin nogut i kamap long graun, em asua bilong man. (Lo 32:5; Saveman 7:29) Tru tumas, ol samting nogut i save painim ol man long nau olsem sik, indai, pait, ol pasin i no stret, bikhet bilong Adam i as bilong en. Na tu, Baibel i tok “taim nogut i save painim yumi olgeta.” (Saveman 9:11) Wantu tasol na bagarap na hevi i save painim ol man nogut na ol stretpela man tu.
God i Larim Pasin Nogut i Stap
Yumi amamas long save, God i no as bilong pasin nogut, tasol ating yu tingting yet: ‘Bilong wanem em i larim pasin nogut i stap?’ Orait, yumi mas tingim gen sampela bikpela samting i bin kamap long Iden. God i tokim Adam sapos em i bikhet, em bai dai. (Stat 2:17) Tasol Satan i tokim Iv, sapos em i kaikai pikinini bilong diwai tambu, em i no ken dai! (Stat 3:1-5) Em nau, i olsem Satan i tok God em i giaman. Na tu, i olsem Satan i tok, mobeta man yet i tingim ol samting em i laik mekim na no ken larim God i bosim em!
God i no inap givim baksait long ol dispela tok Satan i sutim long em. Olsem wanem? Yu bin lukim wanpela wanklas bilong yu i sutim tok long wok bos bilong tisa? Sapos tisa i larim em, sampela wanklas moa bai mekim wankain samting, a? Na olsem tasol sapos Jehova i no bin stretim kwik dispela bikpela tok, bikpela hevi inap kamap namel long ol ensel i bin lukim pasin bikhet bilong Satan. Tasol Jehova i kirap kwik long stretim tok Satan i sutim long em. Long dispela as God i bin larim ol man i bihainim rot bilong Satan. Tasol taim ol man i kirap bosim ol yet olsem Satan i kirapim ol long mekim, yu ting dispela i bin kamapim amamas olsem Satan i tok promis? Nogat. Wok bos bilong Satan i kamapim planti bikpela pen na hevi nogut tru, olsem na yumi save, Satan em i man bilong giaman tru!
Olsem wanem? God bai larim pasin nogut i go i go inap long oltaim oltaim? Nogat. Bilong stretim ol bikpela tok Satan i bin sutim long em, klostu nau God bai pinisim ol pasin nogut. (Song 37:10) Tasol inap long dispela taim, olsem wanem yumi bai karim ol hevi?
Wanpela Bikpela Tok Yu Insait Long En
Yu mas save, dispela bikpela tok i bin kamap namel long God na Satan, yu tu yu insait long en! Yu insait long en olsem wanem? Tingim wanpela buk bilong Baibel i gat nem bilong wanpela stretpela man, em Jop. God i tokim Satan, Jop em i gutpela piksa olsem man bilong strongpela bilip, na Satan i tok: “Yu ting Jop i aninit long yu sapos em i no kisim wanpela samting long han bilong yu, a?” (Jop 1:9) Em nau, Satan i tok, sapos God i larim em long mekim sampela samting, em inap pulim olgeta man long lusim wok bilong God!—Jop 2:4, 5.
Olsem na Satan i bin krungutim gutnem bilong olgeta man i stap aninit long God—gutnem bilong yu tu. Tasol Sindaun 27:11 i tok: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” Yes, maski yu karim planti hevi taim yu mekim wok bilong God, yu save kamapim long ples klia olsem Satan em i man bilong giaman!
Tru, taim ol samting nogut i painim yumi, yumi hatwok long tingim ol bikpela tok Jehova i mas stretim. Diane i gat 10-pela krismas taim mama bilong em i dai, na em i tok: “Mi pret, nogut ol hevi i mekim na bel bilong mi i go strong o mi bel nogut.” Tasol em i kisim save long as na God i larim ol pasin nogut i stap, na dispela i bin helpim em long kisim stretpela tingting long ol hevi bilong em. Nau em i tok: “Maski i gat sampela hevi mi mas karim, olgeta taim Jehova i save sambai long mi.”
Diane i helpim yumi long tingim gen wanpela bikpela samting: Jehova i no larim yumi wanpela i karim ol hevi. Song 55:22 i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.” Yangpela Kotoyo i save dispela tok i stret. Bikpela hevi i painim Kotoyo taim papamama i bagarap long wanpela guria long Kobe, Japan, long 1995. Kotoyo i stori long em yet na ol liklik brata susa bilong em olsem: “Mipela inap sanap strong, long wanem, mama i bin skulim mipela long wetim Jehova.”
Olsem wanem long Lidija, em yangpela meri yumi bin kamapim stori bilong em pastaim? Bihain em i save, Jehova i no bin lusim em. Nau em i tok: “Olgeta taim Jehova i bin stap bilong helpim mipela. Em i bin soim rot na stiaim wokabaut bilong mipela.”
Jehova—God Bilong Sori na Em i Tingim Yumi
Taim hevi i painim yu, yu tu inap kisim helpim long God! Na maski em i larim ol samting nogut i painim ol gutpela man, em i save mekim gut bel bilong ol tu. (2 Korin 1:3, 4) Em i save mekim olsem long rot bilong kongrigesen Kristen. Insait long kongrigesen yu inap painim ol gutpela pren i ‘winim pasin namel long tupela brata,’ ol pren bilong strongim bel bilong yu taim bikpela hevi i painim yu. (Sindaun 18:24) Kotoyo i tok: “Namba wan de bihain long guria, mipela olgeta i bin go long wanpela hap ol brata i bung long en, na ol i bin strongim bel bilong mipela na givim ol samting bilong skin long mipela. Dispela i bin helpim mi long stap bel isi. Sapos yumi gat Jehova na ol brata, mi pilim olsem yumi inap winim olgeta hevi.”
Jehova i save long yu, olsem na em i save long ol samting yu yet yu mas kisim taim hevi i painim yu. Daniel i tingim ol samting i bin helpim em long karim hevi taim papa bilong em i dai, em i tok: “Jehova i save kamap papa bilong yumi, na insait long oganaisesen bilong em i gat ol man i save tingim ol samting bilong spirit, na ol i stap olsem gutpela piksa bilong yumi ken bihainim. Jehova i save bekim olgeta askim bilong mi, em ol askim mi bai toktok wantaim papa bilong mi long en sapos em i stap.” Na bihain long mama i dai, Diane tu i bin pilim olsem Jehova i bin sori long em na lukautim gut em. Em i tok: “Ol man i bikpela pinis na strong long ol samting bilong spirit, ol i bin strongim bel bilong mi, na stiaim mi, na givim gutpela tok long mi, na long rot bilong ol Jehova i bin soim rot long mi na helpim mi long karim hevi.”
Tru, taim ol samting nogut i painim yu, em i no gutpela samting. Tasol yu mas save long as na Jehova i larim hevi i kamap. Oltaim yu mas tingim, klostu nau God bai pinisim hevi. Yes, olgeta samting nogut i bin painim yumi bai pinis olgeta! (Aisaia 65:17; 1 Jon 3:8) Sapos yumi mekim wok long olgeta samting God i givim bilong helpim yumi long karim hevi, yumi inap kamapim long ples klia olsem Satan em i man bilong giaman. Bihain, ‘God bai mekim drai wara i stap long ai bilong yu.’—KTH 21:3, 4.
[Ol Piksa long pes 19]
Klostu nau Jehova bai pinisim olgeta samting nogut