Taim i No Gat Pasin Mangal Moa

“SAPOS tingting bilong ol man long olgeta hap i no senis​—⁠senis i no ken kamap bilong helpim gut ol man, na bikpela hevi i laik kamap long graun . . . bai i no gat rot long abrusim.”​—⁠Em tok bilong Václav Havel, presiden bilong Ripablik Sek.

Planti man i luksave olsem bikpela bagarap tru i laik painim ol man bilong nau. Sampela man i olsem Václav Havel, ol i ting pasin na tingting bilong olgeta man i mas senis​—⁠dispela tasol inap stretim ol hevi. Wanpela man i gat save long ol samting i kamap long nau, em i tok: “Hevi bilong planti handet milion rabisman long kisim kaikai na ol narapela samting ol i mas kisim i no ken senis . . . sapos olgeta kantri i no kirap na mekim sampela samting bilong senisim ol pasin bilong nau.”​—⁠Buk Food Poverty & Power.

Tasol olsem wanem? Yu ting yumi mas wetim ol man i senisim tingting na pasin bilong ol na yumi ken abrusim bagarap? Yumi inap bilip olsem ol gavman bai “kirap tasol na mekim sampela samting bilong senisim ol pasin bilong nau”? Sampela i ting olsem. Ol i tok: ‘God i orait long yumi yet i mekim sampela samting, olsem na em wok bilong yumi long senisim pasin bilong nau.’ Tasol ol samting nogut i bin kamap long bipo i kamapim sampela bikpela askim long laik na strong bilong man long senisim ol pasin bilong nau. Dispela i no tingting kranki, i stret yumi ken ting olsem. Olsem wanem? Bai yu larim dokta i katim yu sapos yu save olgeta man em i bin katim bipo, ol i bin dai?

Rot Bilong Stretim Hevi?

Long buk bilong em, Ted Trainer i tok: “Skulim ol man em rot bilong stretim.” Em i tok, ol man i mas skul na bai ol i ken save, bikpela senis i mas kamap; sapos nogat, “yumi no ken tru kamapim bikpela senis long dispela graun.” (Developed to Death​—⁠Rethinking Third World Development) Tru, ating ol man i mas skul olsem i bikpela samting long senisim tingting na pasin bilong ol sapos graun i no ken bagarap. Yes, em bikpela samting, na Baibel i stori long kain skul olsem. Baibel i tok, “olgeta samting long graun bai i save tru long Bikpela.” Long dispela taim, “bai i no gat wanpela” long olgeta hap bilong graun “i mekim nogut long narapela.”​—⁠Aisaia 11:⁠9.

Tasol maski man i kisim bikpela skul​—⁠skul bilong God tu​—⁠dispela i no inap pinisim ol man bilong mangal em ol i mekim planti samting nogut na bagarapim bikpela hap bilong graun. Skul bai senisim tasol ol man i gat laik long senisim tingting na pasin bilong ol; em ol man i laik bihainim ol lo bilong God. Krais Jisas i tok i no gat planti man i laik mekim olsem. (Matyu 7:​13, 14) Olsem na Baibel i no tok promis olsem senis bai kamap, long wanem, bihain ol man bai save ol hevi i bikpela tru na ol bai kirap na senisim pasin bilong ol. Nogat. Baibel i tok God bai kirap na pinisim ol man bilong mangal.

God Bai Mekim Sampela Samting

Planti man i ting, dispela bilip olsem God bai kirap na mekim sampela samting, em driman o tingting nating tasol. Buk World Hunger: Twelve Myths i tok: “Save bilong ol man olsem 200 yia samting bipo i mekim na yumi no bilip moa long dispela tingting bilong mekim gut bel, olsem God bai kirap na pinisim wok nogut bilong ol man bilong graun.” Tasol olsem wanem? I stret yumi bilip long ol tok nating na savetok bilong ol man bilong dispela graun em ol i no bilip moa olsem God bai kirap na mekim wanpela samting? Ating yumi ken tok, rot bilong ol long stretim ol hevi i olsem driman nating, a?

Yumi bihainim gutpela tingting sapos ol tok profet bilong Baibel, olsem God bai kirap na mekim sampela samting i as bilong bilip bilong yumi long abrusim bagarap. Taim yumi bilip long ol tok promis bilong God, dispela i no wanpela tingting nating bilong “mekim gut bel” bilong yumi​—⁠em i wanpela samting tru yumi wetim em bai kamap long han bilong God tasol!

“Bagarapim Ol Man i Bin Bagarapim Graun”

God i tok promis long wanem samting? Wanpela samting i olsem: Em i tok promis long bagarapim ol man i wok long bagarapim win na wara na graun. Kamapim Tok Hait 11:18 i tok, God i makim ‘taim pinis’ long “bagarapim ol man i bin bagarapim graun.” Wanem insait bilong dispela tok? Olsem: Ol man i wok nau long putim bikpela hevi long ol rabisman na ol man nating, bai ol i pinis. God bai ‘stretim gut hevi bilong ol rabisman, na helpim ol man i sot long ol samting, na daunim ol man i laik mekim nogut long ol narapela man.’ Em bai pinisim ol man bilong mangal, na ol man i no gat asua tasol ol i kisim nogut long ol, ol bai kisim planti samting. Em bai helpim “ol rabisman i singaut long em.” Na long han bilong ‘ol man nogut i laik daunim ol na bagarapim ol, em bai kisim bek ol.’​—⁠Song 72:​4, 12-14.

Man! Dispela bai kamapim bikpela senis! Aposel Pita i tok dispela senis bai kisim olgeta hap, olsem na “nupela skai na nupela graun” bai kamap. (2 Pita 3:13) Long “nupela graun” bai olgeta man i gat kaikai inap long ol. (Maika 4:⁠4) Long nau tu, graun inap kamapim planti kaikai inap tru long olgeta man. Dispela hevi long kaikai i stap, long wanem, ol i no tilim stret kaikai long olgeta man. Long buk bilong em (Food Poverty & Power), Anne Buchanan i tok: “Ol i ting olgeta hap graun bilong wokim kaikai inap kamapim kaikai bilong 38 i go inap 48 bilion manmeri.”

Dispela graun i no ken bagarap olgeta. Man bilong wokim graun i “no wokim graun bilong i stap nating. Nogat. Em i bin wokim bilong olgeta samting i ken i stap long en.” (Aisaia 45:18) Insait long sotpela taim bilong “bikpela hevi tru,” God bai kirap mekim save long ol man bilong mangal. (Matyu 24:21) Ol man i winim dispela hevi bai amamas long i stap long Paradais bai kamap long graun, na i no gat wanpela man bilong mangal bai i stap long en. (Song 37:​10, 11; 104:⁠5) Ol samting bai kamap olsem Baibel i tok promis: “God, Bikpela bai i pinisim krai bilong ol na mekim drai wara bilong ai bilong olgeta manmeri.”​—⁠Aisaia 25:⁠8.

Yu tu inap insait long dispela lain em ol i amamas long kisim ol gutpela samting taim God i kirap long pinisim pasin mangal long graun. Sapos yu gat bikpela laik long mekim laik bilong God, mekim wok long ol samting bilong helpim yu nau long sakim pasin mangal bilong graun. Mekim ol samting bilong helpim yu long winim taim bilong “bikpela hevi tru.” Ol Witnes Bilong Jehova i laik helpim yu long skul long ol samting yu mas save long en. Sapos yu laik, yu ken bungim ol long Haus Kingdom long hap yu stap long en o raitim pas long atres i stret long yu long pes 5.