I Gat Wanpela Man i Tingim Yumi
PLANTI tausen manmeri i save kamapim klia olsem ol i save tingim ol narapela. Ol i no tingim ol yet tasol na ting ol hevi bilong narapela i no samting bilong ol, nogat. Ol i mekim olgeta samting ol inap mekim bilong helpim narapela i gat hevi, maski ol yet inap kisim bagarap long dispela. Dispela em i wanpela bikpela wok tru i gat hatwok long en, long wanem, i gat sampela samting i gat strong na em inap pasim dispela wok.
Wanpela man bilong helpim ol man i sot, em i tok: Ol samting olsem pasin mangal, wok politik, ol bikpela pait, na ol bagarap olsem bikpela win, ol dispela samting inap pasim ‘wok bilong pinisim hangre, maski ol man i mekim dispela wok ol i gat save na ol i wok strong long mekim.’ Hangre em wanpela tasol bilong planti hevi ol man i wok long pinisim. Ol i wok tu long pinisim ol samting olsem sik, hevi bilong i stap rabis, ol pasin i no stret, na ol bikpela hevi na pen i save kamap long pasin bilong pait. Tasol olsem wanem? Ol wok ol i mekim em i daunim ol dispela hevi?
Nambawan bos bilong wanpela lain bilong helpim ol man i sot em i tok, ol man “i gat save na ol i wok strong” long helpim ol narapela i hangre na kisim pen, ol i olsem dispela gutpela man Samaria em Krais Jisas i bin tok piksa long en. (Luk 10:29-37) Tasol em i tok, maski wanem wanem samting ol i mekim, ol man i kisim hevi ol i wok long kamap planti moa yet. Olsem na em i kamapim askim: “Sapos long olgeta de inap sampela yia, gutpela man bilong Samaria i wokabaut long wankain rot na long olgeta wik em i lukim wanpela man i slip long rot em ol narapela i bin paitim em nogut tru na stilim olgeta samting bilong em, orait em i mas mekim wanem?”
Ating em i laik lusim dispela wok, a? Tasol gutpela tru na ol man i tingim tru ol narapela ol i no save les. (Galesia 6:9, 10) Olsem: Wanpela man i raitim pas i go long wanpela nius bilong Briten (Jewish Telegraph) na em i mekim gutpela tok amamas long ol Witnes Bilong Jehova, ol i bin “helpim planti tausen Juda long abrusim bagarap long Auswis” long taim gavman Natsi i bosim Jemani. Man i raitim pas i tok: “Taim kaikai i sot tru, ol i save skelim bret bilong ol na givim hap long ol brata sista [Juda] bilong mipela!” Oltaim ol Witnes i save mekim olgeta samting ol inap long mekim bilong helpim ol narapela.
Tru, maski yumi givim olgeta bret bilong yumi i go long ol narapela, dispela i no inap pinisim olgeta pen na hevi. Tasol nogut yumi ting ol gutpela wok ol man i gat pasin sori ol i bin mekim em i samting nating tasol. Ol wok ol man i mekim long pasin i stret bilong daunim pen na hevi bilong narapela, olgeta dispela wok em i gutpela. Samting ol dispela Witnes i bin mekim bilong helpim ol wankalabus bilong ol, dispela i bin mekim pen na hevi bilong ol i go daun liklik. Bihain gavman Natsi i pinis. Tasol pasin bilong dispela graun i save kirapim ol man long daunim ol narapela na putim hevi long ol, dispela pasin i stap yet, na i gat planti man i stap yet em ol i no save tingim ol narapela. Tru tumas, “sampela manmeri i save mekim nogut tru long ol rabisman. I olsem bainat na naip i pulap long maus bilong ol na i laik kaikai ol rabisman na pinisim ol olgeta.” (Sindaun 30:14) Ating yu laik save bilong wanem i olsem.
Bilong Wanem Sampela i Stap Rabis na i Gat Pasin Bilong Daunim Sampela?
Krais Jisas i tok: “Oltaim ol rabisman bai i stap wantaim yupela. Wanem taim yupela i gat laik long helpim ol, orait yupela i ken helpim ol.” (Mak 14:7) Olsem wanem? Tok bilong Jisas i makim olsem hevi bilong i stap rabis na pasin bilong daunim ol man na mekim nogut long ol em i no inap pinis? Olsem sampela man i bilip, Jisas i bilip olsem pen na hevi em laik bilong God na bai ol man i gat pasin sori ol i gat rot long soim olsem ol i save tingim ol narapela? Nogat! Jisas i no bilip olsem. Em i laik tok olsem hevi bilong i stap rabis bai i stap yet i go inap long taim dispela pasin bilong nau em i no stap moa. Tasol Jisas i save tu long dispela samting: Long pastaim tru, i no laik bilong Papa bilong em long heven long ol kain hevi olsem i stap long graun.
God Jehova i wokim graun bilong kamap wanpela paradais—em i no laik bai sampela lain i stap rabis, na i gat pasin i no stret na pasin bilong daunim ol narapela na mekim nogut long ol, nogat. Em i kamapim klia olsem em i save tingim ol man taim em i wokim ol gutpela samting bilong helpim ol man long amamas long i stap laip. Tingim nem bilong gaden em i putim Adam na Iv long en, em tupela tumbuna bilong yumi bilong pastaim! Nem bilong dispela gaden, em Iden, olsem “Amamas.” (Stat 2:8, 9) Na Jehova i no givim ol wan wan samting tasol long ol inap long ol i ken stap laip na em tasol, nogat. Taim em i wokim pinis ol samting, Jehova i lukim ol dispela samting na em i tok em “i gutpela.”—Stat 1:31.
Orait, bilong wanem ol hevi olsem pasin bilong i stap rabis na pasin bilong daunim narapela i go bikpela tru long olgeta hap bilong graun? Dispela pasin nogut bilong nau i stap, long wanem, tupela tumbuna bilong yumi bilong pastaim ol i bin bikhet long God. (Stat 3:1-5) Dispela i kamapim wanpela askim olsem i stret long God i ken strong long ol man i mas bihainim tok bilong em o nogat. Olsem na Jehova i bin larim ol lain tumbuna bilong Adam long bosim wokabaut bilong ol yet inap sotpela taim. Tasol God i save tingim yet ol man na ol samting inap painim ol. Em i wokim rot bilong pinisim ol hevi em pasin bikhet i bin kamapim. Na liklik taim, Jehova bai pinisim pasin bilong i stap rabis na pasin bilong daunim narapela—em bai pinisim olgeta pen na hevi.—Efesus 1:8-10.
Wanpela Hevi Ol Man Yet i No Inap Stretim
Kirap long taim God i wokim namba wan man na i kam inap nau, ol man i bin wok long go longwe moa yet long ol lo bilong Jehova. (Lo 32:4, 5) Ol i bin wok long sakim ol lo bilong God, na dispela i mekim na narapela lain i bin pait long narapela lain, na ol ‘bikman i bin wok long daunim ol arapela na mekim nogut long ol.’ (Saveman 8:9) Olgeta wok bilong kamapim stretpela pasin long graun na i no gat wanpela samting i givim hevi long man, ol dispela samting i no bin kamap, long wanem, ol man i save tingim ol yet tasol, ol i save mekim ol samting long pasin ol yet ol i laikim na ol i no daun long God em i stap nambawan bos.
I gat narapela samting tu—em samting planti man i ting em i wanpela bilip giaman tasol. Man bilong kirapim pasin bikhet long God em i wok yet long kirapim ol man long mekim pasin nogut na tingim ol yet tasol. Dispela man em Satan, na Krais Jisas i kolim em “hetman i save bosim dispela graun.” (Jon 12:31; 14:30; 2 Korin 4:4; 1 Jon 5:19) Tok hait Jisas i kamapim long aposel Jon i toksave olsem Satan em i nambawan as bilong ol hevi—em i man i go pas long “giamanim olgeta manmeri bilong graun.”—KTH 12:9-12.
Maski i gat sampela man i tingim tru ol narapela, i no gat wanpela taim bai kamap na ol inap pinisim Satan o senisim dispela pasin bilong nau i save kirapim ol man long mekim nogut long ol narapela. Olsem na wanem samting inap stretim ol hevi bilong ol man? Tru, i mas i gat wanpela man i save tingim yumi, tasol bilong stretim tru ol hevi, i mas i gat wanpela man i gat laik na i gat strong long pinisim Satan wantaim olgeta pasin nogut bilong graun em i bosim.
“Laik Bilong Yu Long Graun”
God i tok promis pinis olsem em bai pinisim dispela pasin nogut bilong graun. Em i gat laik long mekim na em i gat strong tu inap long mekim olsem. (Song 147:5, 6; Aisaia 40:25-31) Buk Daniel i stap long Baibel i tok profet olsem: “Taim ol dispela king i stap yet God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.” (Daniel 2:44) Krais Jisas i tingim dispela gutpela gavman i stap long heven na i bilong i stap oltaim oltaim, taim em i lainim ol disaipel bilong em long beten askim God olsem: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”—Matyu 6:9, 10.
Jehova bai harim kain beten olsem, long wanem, em i save tingim ol man. Song 72 i tok profet olsem God bai tokim Pikinini bilong em, Krais Jisas, long helpim ol man i sot long samting, ol man ol narapela i mekim nogut long ol, na ol rabisman, em ol i stap aninit long wok king bilong Jisas. Olsem na man bilong raitim Song i tok: “King [em King God i bin makim] i ken stretim gut hevi bilong ol rabisman, na em i ken helpim ol man i sot long ol samting. Na em i ken daunim ol man i laik mekim nogut long ol arapela man. Em i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol. Sapos ol man nogut i laik daunim ol na bagarapim ol, em i save kisim bek ol. Em i save laikim ol tumas na em i mekim olsem.”—Song 72:4, 12-14.
Long wanpela driman i makim ol samting i mas kamap nau long taim bilong yumi, aposel Jon i lukim “nupela skai na nupela graun,” em wanpela nupela taim God bai kamapim. Dispela bai helpim tru ol manmeri em pen na hevi i wok long painim ol! Jon i tok profet long ol samting Jehova bai mekim, na em i tok: “Mi harim maus bilong wanpela man i singaut strong olsem, ‘Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.’ Na dispela Man i sindaun long sia king, em i tok olsem, ‘Harim. Mi mekim olgeta samting i kamap nupela.’ Na em i tok moa olsem, ‘Yu raitim dispela tok. Dispela tok em i tru olgeta, inap olgeta man i ken bilip tru long en.’ ”—KTH 21:1-5.
Tru tumas, yumi inap bilip tru long ol dispela tok, long wanem, dispela tok em i tru olgeta. Klostu nau Jehova bai kirap na pinisim pasin bilong i stap rabis, na hangre, na sik, na pasin bilong daunim ol narapela, na olgeta kain pasin i no stret. Planti taim dispela nius i bin kamapim ol tok bilong Baibel bilong soim olsem i gat planti samting i kamapim klia olsem yumi stap klostu long taim God bai truim ol dispela tok promis em i bin mekim. Nupela taim God i tok promis long kamapim em i kam klostu pinis! (2 Pita 3:13) Klostu nau, Jehova bai “pinisim dai tru na bai dai i no kamap moa” na em bai “mekim drai wara bilong ai bilong olgeta manmeri.”—Aisaia 25:8.
I go inap long dispela taim i kamap, yumi ken amamas olsem long nau i gat wanpela lain i stap ol i save tingim tru ol narapela. Na samting i bikpela samting moa bilong givim amamas long yumi, em God Jehova yet i save tingim ol man. Klostu nau em bai pinisim olgeta hevi na pen.
Yu ken bilip tru long ol tok promis bilong Jehova. Wokboi bilong em, Josua, em i bilip tru. Em i tokim lain bilong God bilong bipo: “Yupela i save pinis, God, Bikpela bilong yumi i bin givim yupela olgeta gutpela samting em i bin promis long givim yupela. Olgeta samting em i bin promis long mekim, ol i kamap pinis, na i no gat wanpela promis i popaia.” (Josua 23:14) Dispela pasin i stap nau long graun em i no pinis yet, olsem na yu no ken larim ol hevi inap painim yu long bihain i daunim yu. Putim olgeta hevi bilong yu i go long han bilong Jehova, long wanem, tru tumas, em i save tingim yu.—1 Pita 5:7.
[Ol Piksa long pes 7]
Long nupela taim God i tok promis pinis long kamapim, bai i no gat wanpela man i stap rabis o sik, na i no gat pasin bilong daunim narapela o pasin i no stret