Nau Mi Amamas Long i Stap Laip!

Dokta i tok: “Yu save yu bai dai, a?” Tupela taim bipo mi bin ting i gutpela sapos mi dai. Tasol dispela taim nogat. Orait, mi laik stori.

MI BIN go bikpela long wanpela hap bilong Long Ailan, Nu Yok, na papa bilong mi i gat nem olsem man bilong resis long ka. Em i man bilong mekim wok i nambawan olgeta na em i save amamas tru long resis long ka. Pasin bilong em i save senis senis​—⁠sampela taim em i amamas na sampela taim em i belhat na i hatwok tru long mipela i mekim ol samting em i laikim. Tasol mama i narapela kain, em i meri bilong i stap isi na em i no meri bilong toktok. Em i pret tru long papa i resis long ka, olsem na em i no inap go lukim em i resis.

Taim mitupela brata bilong mi i liklik yet, long haus mipela i bin lain long stap longwe liklik long papa na no ken mekim wanpela samting bilong mekim em i belhat, em samting mama i lain pinis long mekim. Tasol i hatwok tru. Mipela olgeta i pret long papa. Dispela i mekim na mi ting mi no inap mekim stret wanpela samting. Na tingting bilong mi olsem mi meri nating i go bikpela moa bihain long wanpela “pren” bilong famili em i bin mekim pasin sem long mi taim mi gat 13 krismas samting. Mi no inap karim bel hevi bilong mi, olsem na mi bin traim long kilim i dai skin bilong mi yet. Em namba wan taim mi bin ting i gutpela sapos mi dai.

Mi pilim olsem mi nogut pinis na i no gat wanpela i laikim mi, olsem na mi kisim pasin kranki long kaikai, em wanpela pasin i save kamap long planti yangpela meri em ol i ting ol i meri nating. Mi kirap na bihainim ol rot bilong painim amamas, na mekim nabaut long ol drak na dring, na pamuk, na rausim bel. Olsem hap tok bilong wanpela singsing i tok, mi “bihainim ol rot kranki bilong painim wanpela i ken laikim mi.” Mi insait long ol resis long motabaik na ka, na mi glas long solwara, na sampela taim mi bin go long Las Vegas bilong pilai laki. Na mi bin kisim tingting long wanpela meri i save tokaut long ol samting bai kamap bihain, na bilong kisim amamas mi bin pilai long plang wija, tasol mi no save em ol samting bilong ol spirit nogut.​—⁠Lo 18:​10-12.

Na bilong painim amamas mi mekim sampela samting gavman i tambuim, olsem salim ol drak na stil long ol bikpela stua. Na bilong painim wanpela i ken laikim mi, mi bin kisim planti boipren. Long dispela taim mi no save, tasol olgeta samting mi bin mekim long wokabaut bilong mi, mi inap kisim bagarap long en.

Wanpela nait long ples bilong resis long ka, mi bin dring na kisim ol drak wantaim. Mi bihainim tingting kranki na larim boipren bilong mi i draivim ka bilong kisim mi i go bek long haus. Mi sindaun long ka na bihain mi hap i dai. Wankain samting i painim boipren tu. Taim ka i bam, em nau mi kirap. Planti bagarap i bin painim skin bilong mi na mi mas slip long haus sik, tasol bihain mi orait bek; skru bilong lek sut tasol i bagarap.

Laik Long Kisim Samting i Gutpela Moa

Mi no bin tingting tumas long laip bilong mi yet, tasol mi tingting planti long laip na i stap bilong ol pikinini na ol animal, na long mekim ol samting bilong lukautim win, wara, na graun. Mi gat bikpela laik long ol samting i mas kamap gutpela long graun, na bilong mekim sampela wok bilong stretim bek graun, mi bin insait long planti oganaisesen. Dispela laik i bin kirapim tingting bilong mi long harim tok bilong wanpela wanwok, em wanpela Witnes Bilong Jehova. Olgeta taim sampela samting i no wok gut long ples wok, em i save tok, “dispela pasin bilong nau!” Taim mi bin askim em wanem insait bilong tok bilong em, em i tokim mi klostu nau ol hevi bilong yumi bai pinis. Mi save givim biknem long dispela meri, olsem na mi putim yau long tok bilong em.

Sori tru, bihain mi no lukim em moa, tasol mi no bin lusim tingting long ol samting em i bin tokim mi long en. Mi save bihain mi mas mekim sampela bikpela senis long wokabaut bilong mi sapos mi laik amamasim God, tasol mi no redi yet long mekim olsem. Tasol taim mi gat tingting long marit long wanpela boipren, mi save tokim em bihain bai mi kamap wanpela Witnes, na sapos em i no amamas long dispela tok, mi save em taim bilong lusim em.

Em nau, laspela boipren bilong mi em i laik kisim sampela save moa long ol samting mi bin lain long en, na em i tok, sapos mi gat laik long ol Witnes, ating em tu i gat laik long ol. Olsem na mitupela i kirap painim ol Witnes. Tasol ol i bin painim mipela taim ol i kamap long haus bilong mi. Ol i kirapim Baibel-stadi wantaim mipela, tasol bihain boipren bilong mi i lusim stadi na em i go bek long meri tru bilong em.

Mi no bin stadi long Baibel long olgeta taim. Pastaim i hatwok long mi kisim tingting bilong Jehova olsem laip i bikpela samting. Tasol taim mi stretim tingting bilong mi, mi save mi no ken mekim moa dispela pasin long kalap i go daun long balus bilong painim amamas, na mi mas lusim smok. Taim mi kisim tingting olsem laip i bikpela samting, mi redi long mekim ol samting i stret na mi no ken insait gen long wanpela samting i ken bagarapim mi. Long Oktoba 18, 1985, mi kisim baptais bilong makim olsem mi dediket long Jehova. Mi no save, klostu nau wanpela samting bai painim mi em inap bagarapim mi.

Mi Gat Laik Gen Long i Dai

Sampela mun bihain, em apinun bilong Mas 22, 1986, mi sanap long rot klostu long haus na rausim long ka ol klos mi bin kisim i go long wanpela hap bilong wasim, na nau wanpela ka i spit i kam na bamim mi. Ka i pulim mi i go long rot inap 30 mita! Draiva i no pasim ka, em i go tasol. Maski mi kisim bikpela bagarap long het, tingting bilong mi i no dai.

Mi slip long bel namel long rot i no gat lait na mi tingting planti​—⁠nogut narapela ka i kam na bamim mi gen. Mi gat bikpela pen tru, na mi pilim olsem mi no inap karim moa. Olsem na mi wok long beten long Jehova na askim em long larim mi i dai. (Jop 14:13) Wanpela meri i kam na em i wanpela nes. Mi askim em long stretim lek bilong mi, long wanem, ol i krungut. Em i mekim olsem, na tu, em i brukim hap klos bilong em yet na traim long pasim blut long wanpela lek bilong mi i bin kisim bikpela bagarap. Ol i painim su bilong mi longwe liklik long narapela rot na blut i pulap long tupela su!

Sampela manmeri em ol i wokabaut, ol i no save dispela hevi i bin painim mi taim mi sanap long rot, olsem na ol i wok long askim mi long ka bilong mi i stap we. Mi no save ka i bin pulim mi longwe long haus, olsem na mi ting mi slip klostu long ka bilong mi yet! Taim ambulens i kam ol man bilong haus sik ol i ting mi bai dai. Olsem na ol i singaut long polis, long wanem, man i draivim ka na bamim man, em i gat bikpela kot. Bihain ol i holim draiva bilong ka. Polis i bin banisim long rop dispela hap mi bin kisim bagarap long en na ol i kisim ka bilong mi bilong kamapim klia olsem dispela rong i bin kamap. Tupela dua i bin tekewe olgeta long wanpela sait bilong ka.

Hevi i Bikpela Moa

Taim mi kamap long haus sik, maski ol i pasim oksijen long maus bilong mi, olgeta taim mi tok: “Blut nogat, blut nogat. Mi wanpela Witnes Bilong Jehova!” Laspela samting mi inap tingim em bikpela sisis long baksait bilong mi taim ol nes i katim klos bilong mi, na ol dokta na nes i singaut long narapela narapela bilong tokim ol long samting ol i mas mekim.

Taim mi opim ai, mi kirap nogut long mi stap laip yet. Sampela taim tingting bilong mi i dai na sampela taim mi kisim bek tingting bilong mi. Long olgeta taim mi opim ai, mi save askim famili bilong mi long toksave long tupela marit i bin stadi long Baibel wantaim mi. Famili bilong mi i no amamas mi bin kamap wanpela Witnes, olsem na long laik bilong ol yet ol i “lusim tingting” long tokim ol. Tasol mi no les​—⁠olgeta taim mi opim ai, em namba wan samting mi askim ol long en. Mi no les, olsem na bihain gutpela samting i kamap. Wanpela taim mi opim ai na tupela marit i stap. Mi amamas tru! Lain bilong Jehova i save mi stap we.

Tasol mi no amamas longtaim, long wanem, mak bilong hemoglobin long blut bilong mi i wok long i go daun na mi kisim bikpela fiva. Ol dokta i ting sampela bun long lek i as bilong dispela, olsem na ol i rausim na putim 4-pela stik ain insait long lek bilong mi. Tasol i no longtaim na mi kisim gen fiva na lek bilong mi i go blakpela. Sua nogut bilong bagarapim mi i bin kamap na sapos ol dokta i no katim na rausim lek, mi bai bagarap olgeta.

Subim Mi Long Kisim Blut

Hemoglobin bilong mi i bin go daun tru long mak bilong en, na ol dokta i tok ol i no inap katim mi sapos mi no kisim blut. Ol dokta, nes, famili, na ol pren bilong mi bilong bipo, ol i bin wok long subim mi long kisim blut. Bihain, ol dokta i wok long toktok isi isi klostu long dua bilong mi. Mi save ol i tingting long mekim wanpela samting, tasol mi no kisim gut tok bilong ol. Gutpela tru, long dispela taim stret wanpela Witnes i kam lukim mi, em i harim tok bilong ol dokta olsem ol bai traim long givim blut long mi. Kwiktaim em i toksave long ol elda Kristen na ol i kam helpim mi.

Ol dokta i bin singaut long wanpela dokta bilong stretim tingting bilong skelim tingting bilong mi. Ol i laik bai em i tok mi no gat save liklik long samting mi tok long en, na ol dokta inap sakim laik bilong mi. Wok bilong ol i lus. Orait, ol i singaut long wanpela pris i bin kisim blut bilong tokim mi i no gat rong sapos mi kisim blut. Bihain, famili bilong mi i painim rot bilong kisim tok orait long kot na ol dokta i ken givim blut long mi.

Long moningtaim long 2 klok samting, wanpela lain dokta, wanpela meri kuskus bilong kot, wanpela ofisa bilong kot, ol loya bilong haus sik, na wanpela jas, ol i kam insait long rum slip bilong mi. Em nau, ol i wokim kot. Ol i no bin toksave pastaim long mi olsem dispela samting bai kamap, na mi no gat Baibel o wanpela man bilong helpim mi, na tingting bilong mi i no klia, long wanem, ol i bin givim planti marasin long mi bilong daunim pen. Wanem samting i kamap? Jas i no givim tok orait long ol, na em i tok em i pilim tru pasin bilong ol Witnes Bilong Jehova long sanap strong, winim tingting bilong em bilong bipo long ol.

Wanpela haus sik long Kamden, Nu Jesi, i orait long helpim mi. Lain bilong haus sik long Nu Yok i kros nogut tru, olsem na ol i no givim wanpela marasin long mi, marasin bilong kilim i dai pen tu ol i no givim long mi. Na helikopta bilong kisim mi i go long haus sik long Nu Jesi ol i no larim em i pundaun. Ambulens i bin kisim mi i go na gutpela tru bagarap i no bin painim mi long rot. Taim mi kamap long haus sik, mi harim tok bilong dokta olsem mi bin stori long en long kirap bilong dispela stori: “Yu save yu bai dai, a?”

Ol i Katim Mi Gutpela Tru

Skin bilong mi i no gat strong moa, olsem na wanpela nes i mas helpim mi long putim mak X long pepa bilong tok orait long ol dokta i ken katim mi. Ol i katim na rausim lek sut bilong mi antap long skru namel long lek. Bihain, hemoglobin bilong mi i go daun tru aninit long 2, na ol dokta i ting bikpela bagarap i bin painim kru bilong mi. Ol i bin ting olsem, long wanem, taim ol i bin kolim nem “Virginia, Virginia” long yau bilong mi, mi no bin opim ai. Dispela nem Virginia i stap long ol pepa bilong haus sik. Tasol bihain liklik, taim mi bin harim wanpela i tok isi isi olsem, “Ginger, Ginger,” mi opim ai na lukim wanpela man mi no bin lukim em bipo.

Bill Turpin em i bilong wanpela kongrigesen bilong ol Witnes Bilong Jehova long Nu Jesi. Em i bin kisim save long dispela nem Ginger long sampela Witnes long Nu Yok; em wanpela hap nem mi bin kisim taim mi liklik yet. Em i givim ol askim long mi inap long mi ken bekim long rot bilong pasim na opim ai bilong mi, long wanem, masin bilong pulim win i pasim maus bilong mi na mi no inap toktok. Em i askim mi: “Yu laik bai mi traim long kam lukim yu gen na tokim ol Witnes long Nu Yok long yu stap olsem wanem?” Man! Mi pasim na opim ai planti taim bilong makim olsem mi laik tru em i mekim olsem! Long pasin hait Brata Turpin i bin kam lukim mi na em inap kisim hevi long dispela, long wanem, famili bilong mi i bin putim tambu olsem ol Witnes i no ken kam lukim mi.

Taim mi stap 6-pela mun pinis long haus sik mi inap mekim sampela samting tasol olsem givim kaikai long mi yet na wasim tit. Bihain mi kisim lek giaman na mi inap raun liklik taim mi mekim wok long wanpela samting olsem stik wokabaut. Taim mi lusim haus sik long Septemba 1986 na go bek long flet bilong mi, wanpela nes i bin stap wantaim mi inap 6-pela mun moa bilong helpim mi.

Kisim Helpim Long Lain Brata

Taim mi no go bek yet long flet bilong mi, mi kirap pilim tru olsem mi stap long wanpela lain brata Kristen. (Mak 10:​29, 30) Long pasin sori, ol brata na sista i bin lukautim mi long ol samting bilong skin na long ol samting bilong spirit tu. Gutpela pasin bilong ol i mekim, na mi inap go bek long ol miting Kristen, na bihain, mi inap mekim wanpela wok ol Witnes i save kolim wok painia haptaim.

Draiva bilong ka em i kot. Inap 5-pela yia samting i save lus pastaim na dispela kain kot i kamap o ol i makim de kot bai kamap. Tasol kot bilong mi i pinis insait long sampela mun tasol​—⁠loya bilong mi i kirap nogut long dispela. Mani mi bin kisim long kot i bin helpim mi long sindaun long narapela haus na bai mi no ken hatwok. Na tu, mi bin baim wanpela liklik bas i gat wanpela kain masin insait long en bilong apim wilsia bilong mi na ol samting bilong draivim bas mi inap mekim long han. Olsem na long 1988, mi bin go insait long wok painia oltaim, na lusim 1,000 aua long olgeta yia long autim tok. Inap planti yia mi bin amamas long wok long ol provins olsem Not Dakota, Alabama, na Kentaki. Mi bin raun 160,000 kilomita long liklik bas bilong mi, na planti bilong ol dispela kilomita em long wok autim tok.

Planti taim samting bilong lap i bin kamap taim mi raun long wanpela samting olsem liklik motabaik i gat 3-pela wil. Tupela taim mi bin kapsaitim motabaik taim mi bin wok wantaim meri bilong ol wasman bilong raun. Wanpela taim long Alabama, mi tingting kranki olsem mi inap kalapim wanpela liklik wara taim mi sindaun long motabaik, tasol nogat, motabaik i kapsait na mi pundaun long graun na graun malumalum i pas long mi. Tasol taim kain samting olsem i painim mi, mi bin lap na mi no tingting tumas long mi yet; dispela i bin helpim mi na mi no tingting tasol long ol hevi bilong mi.

Gutpela Samting Mi Wetim i Strongim Mi

Sampela taim mi pilim olsem ol sik i laik daunim mi tru. Sampela yia bipo liklik, mi bin lusim wok painia tupela taim, long wanem, ol dokta i ting ol i mas katim na rausim narapela lek bilong mi. Inap long nau mi no save bai mi lusim lek bilong mi o nogat, na inap 5-pela yia nau mi bin sindaun tasol long wilsia. Long 1994, mi brukim han bilong mi, olsem na wanpela i mas helpim mi long waswas, putim klos, kukim kaikai, klinim haus, na kisim mi i go long ol hap mi mas i go long en. Tasol ol brata sista i bin helpim mi, olsem na maski dispela hevi i painim mi, mi inap mekim yet wok painia.

Inap planti yia mi bin painim ol kain kain amamas mi ting ol i samting bilong amamas, tasol nau mi save ol bikpela amamas bai kamap bihain. Mi bilip olsem God bai stretim ol sik bilong nau long nupela taim bilong em i kam klostu pinis, na dispela i mekim na mi amamas long i stap long nau. (Aisaia 35:​4-6) Long dispela nupela taim, mi laik waswas wantaim ol weil na dolfin, na wokabaut long ol maunten wantaim wanpela laion na ol pikinini bilong en, na mekim wanpela samting i no hatwok long mekim olsem wokabaut long nambis. Mi save amamas long tingim ol samting mi bai mekim long Paradais long graun, em God i bin wokim yumi bilong kisim amamas long ol dispela samting.​—⁠Em stori bilong Ginger Klauss.

[Piksa long pes 13]

Long bipo taim mi meri bilong pilai laki

[Piksa long pes 15]

Ol tok promis bilong God i save strongim mi