“Bai Yu Dai!”

EM STORI BILONG LEANN KARLINSKY

Mi wok long painim ol dokta long Spen i no ken mekim wok long blut taim ol i laik helpim mi

SAPOS yu inap go raun long wanpela hap bilong dispela graun, bai yu makim wanem hap? Mi no gat hatwok long bekim dispela askim. Mi lainim ol narapela long kisim save long tok ples Spen long skul, na mi wantaim man bilong mi, Jay, na pikinini man bilong mi, Joel, i save go long wanpela kongrigesen bilong ol Witnes Bilong Jehova long Galaks, Vejinia, long Amerika, ol i mekim tok ples Spen. Na long dispela taim, mi gat bikpela laik tru long go long Spen. Olsem na yu ken save mi bin amamas tru taim papamama bilong mi i laik kisim mi i go long dispela hap! Tru, man bilong mi wantaim pikinini bilong mi i no inap go, tasol mi bin tingting long go long dispela hap inap longpela taim tru na mi tingim dispela samting taim mi wantaim papamama i kalap long wanpela balus bilong go stret long Madrit. Taim mipela kamap long dispela hap long Epril 21, mipela kisim wanpela ka na mipela laik draiv i go long Estelya, em wanpela liklik taun i stap long Navare, long hap not bilong Spen. Mi sindaun gut long baksait bilong ka na i no longtaim na mi slip.

Pastaim mi bin slip long ka tasol bihain bodi bilong mi i slip long graun na san i wok long sutim ai bilong mi. Mi stap we? Wanem samting i bin kamap na mi stap long dispela hap? Em wanpela driman bilong mi? Ol dispela askim i stap long tingting bilong mi na isi isi tingting bilong mi i kamap klia. Dispela i no wanpela driman, nogat. Samting nogut tru i bin kamap. Han bilong dres bilong mi i bruk bruk, na mi no inap surikim han o lek liklik. Bihain mi bin kisim save olsem ka bilong mipela i brukim banis i stap arere long rot na taim ka i kapsait i go daun inap 20 mita, em i tromoi mi i go ausait. I gutpela samting mi yet wantaim papamama bilong mi i no inap tingim liklik dispela bagarap i bin kamap.

Mi singaut bilong kisim sampela helpim, na wanpela man i save draivim ol bikpela trak em i kam lukim mi. Bihain em i go daun long lukim papamama bilong mi, ol i pas yet insait long ka. Dispela man i singaut long wanwok bilong em olsem, “tokim ambulens long kam hariap​—⁠tupela i stap long ka na ol i kisim bikpela bagarap!” Bihain em i kam lukim mi gen, mi no inap surik liklik, olsem na em i gat tingting long helpim mi na em i wok long stretim lek bilong mi. Tasol mi kisim bikpela pen tru long en na mi singaut, olsem na mi save mi bin kisim bikpela bagarap.

I no longtaim na mi stap long haus sik long Logrono. Ol polis i mekim gutpela pasin na toksave long sampela Witnes Bilong Jehova i stap long dispela hap olsem mi stap we na wanem samting i bin painim mi. I no longtaim na planti ol i kam long ol kongrigesen bilong Estelya na Logrono na stap wantaim mi, na ol lain bilong Hospital Lieson Komiti long dispela hap ol i kam tu. Tru tumas, taim mi stap long dispela haus sik na karim hevi, ol brata sista Kristen mi no bin save long ol long bipo ol i amamas long lukautim mi long san na long nait. Ol i mekim wankain gutpela pasin sori na lukautim papamama​—⁠skin bilong tupela i wok long kamap orait na tupela i lusim haus sik wanpela wik samting bihain long dispela bagarap i painim mipela.

Long Trinde long 1 klok long nait, ol dokta i laik katim mi bilong stretim dispela lek i bruk. Mi tokim dokta olsem ol i no ken givim blut long mi.a Em i no amamas tumas long dispela samting, na em i tok bai mi dai, tasol em bai bihainim laik bilong mi. Ol dokta i katim mi na mi no dai, tasol mi tingting planti, long wanem, ol i no bin wasim hap skin bilong mi i gat sampela bagarap long en na bihain ol i no senisim ol banis laplap ol i bin pasim long sua na putim nupela.

I kam inap long Fraide mak bilong blut bilong mi i wok long go daun olsem long 4.7, na strong bilong mi i wok long pinis. Dokta i orait long givim narapela samting long mi bilong helpim mi​—⁠em ol sut EPO (erythropoietin) wantaim marasin ain na sampela narapela marasin i save helpim ol retpela sel bilong blut i kamap planti.b Jay na Joel i kam i stap pinis long dispela taim. Mi amamas tru long lukim man bilong mi na pikinini bilong mi!

Long 1 klok biknait samting, wanpela dokta i tokim Jay olsem ol lain i wok long haus sik i kisim tok orait long kot long givim blut long mi sapos mak bilong blut i wok long go daun moa. Jay i tokim em, em laik bilong mi yet na mi no laik kisim blut, maski wanem samting i kamap. Dokta i tok: “Olsem na em bai dai!”

Jay i kamapim tingting bilong em long Hospital Lieson Komiti long kisim mi i go long narapela haus sik​—⁠em wanpela haus sik ol bai tingim laik bilong mi. I no olsem olgeta long dispela haus sik mi stap long en i birua long mi, nogat. Wanpela dokta i tokim mi olsem em bai mekim olgeta samting em inap long mekim bilong kirapim ol narapela long bihainim stretpela pasin na tingim laik bilong mi. Tasol i no longtaim na sampela narapela dokta i wok long subim mi. Ol i givim askim long mi olsem, “Yu gat laik long dai na lusim famili bilong yu?” Mi tokim ol olsem mi gat laik long ol dokta i mekim wok long wanem samting i gutpela long helpim mi, tasol ol i no ken givim blut long mi. Dispela i no kirapim ol dokta long helpim mi. Wanpela i tok strong olsem, “Bai yu dai!”

Dispela Hospital Lieson Komiti i painim wanpela haus sik long Basilona, ol i orait long lukautim mi na ol i no ken givim blut long mi. Pasin bilong ol lain long dispela tupela haus sik i narapela kain olgeta! Long Basilona, tupela nes i wasim mi long pasin isi na ol i helpim mi long stap gut. Taim ol i senisim banis i stap long skin bilong mi, wanpela nes i lukim olsem banis i bin stap longpela taim na blut i pas long en. Em i tok em i sem long pasin ol wanlain bilong em long dispela kantri i bin mekim long mi.

Bihain liklik ol i kirap na mekim ol samting bilong stretim hevi bilong mi, em ol lain long haus sik bilong Logrono i no bin kirap na mekim. Dispela i kamapim bikpela senis. Inap long sampela de tasol skin bilong mi i wok long kamap orait gen, na mak bilong blut i go antap inap long 7.3. Taim mi lusim haus sik, mak bilong blut i go antap inap 10.7. Na taim ol dokta long Amerika i mas katim mi gen, mak bilong blut i antap moa inap long 11.9.

Mi amamas long wok ol dokta na nes i mekim bilong bihainim tingting bilong ol sikman i kam long ol bilong kisim sampela helpim, maski ol i wanbel long dispela tingting bilong ol o nogat. Taim ol lain i wok long haus sik i tingim bilip bilong sikman, i olsem ol i wok long lukautim man olgeta​—⁠i no bodi bilong em tasol​—⁠na long dispela rot ol i mekim olgeta samting ol inap long mekim bilong lukautim em gut tru.

[Ol Futnot]

[Piksa long pes 26]

Mi wantaim man bilong mi na pikinini man bilong mipela

[Piksa long pes 27]

Tupela bilong Hospital Lieson Komiti