Diwai Nim Em Wanpela Gutpela Diwai Tru

WANPELA MAN LONG NAIJIRIA I RAITIM DISPELA STORI BILONG KIRAP!

“MARASIN bilong ples”—ol manmeri bilong India i save kolim dispela diwai olsem. Inap planti handet yia ol manmeri bilong India i kisim marasin long diwai nim bilong helpim ol long taim ol i pilim pen, na skin i hat, na ol i gat sua samting. Long kirap bilong olgeta wan wan yia planti Hindu i save kaikai sampela lip bilong diwai nim, long wanem, ol i bilip olsem lip inap klinim blut bilong ol. Ol manmeri i save klinim tit bilong ol long ol liklik han bilong diwai nim, na ol i putim wara bilong lip bilong dispela diwai long ol sua samting, na ol i dring ti ol i wokim long diwai nim bilong strongim skin.

Inap sampela yia nau ol saveman i laik kisim save long diwai nim. Tasol wanpela ripot bilong saiens (Neem​—⁠A Tree for Solving Global Problems) i tok: “Tru, i luk olsem yumi inap mekim planti wok long diwai nim, tasol yumi no save yet long olgeta samting yumi inap mekim long en. Sampela saveman i laikim tru dispela diwai na ol wok ol inap mekim long en, ol i tok, ol i no klia gut yet long ol samting ol inap mekim long en.” Na ripot i tok moa: “Inap 20 yia ol saveman i wok long kisim save long diwai nim, na ating dispela diwai inap mekim bikpela wok bilong helpim ol kantri i stap rabis na ol kantri i gat planti samting. Sampela saveman i no laik tokaut hariap long ol gutpela wok ol man inap mekim long diwai nim ol i tok ‘i stret yumi ken kolim diwai nim olsem diwai bilong mekim planti samting.’ ”

Wok Bilong En Olsem Diwai

Diwai nim i save stap long ol ples i hat, na em i wanpela bilong ol lain diwai ol i save kolim mahogani. Em i go longpela inap 30 mita na go braitpela inap 2.5 mita. Klostu olgeta taim em i gat lip, olsem na long planti mun bilong yia ol man inap hait long san aninit long en. Em i go bikpela hariap, na no gat planti wok bilong lukautim, na em inap kamap gut long graun i no gat planti gris long en.

Long yia 1900 samting ol i kisim dispela diwai i go long Wes Afrika bilong ol man i ken hait long san aninit long en, na bilong pasim ples wesan Sahara long go bikpela long hap bilong saut. Ol man bilong planim ol diwai ol i kisim dispela diwai i go long Fiji, Marisas, Saudi Arebia, Sentral na Saut Amerika, na long ol ailan Karibian. Long Yunaitet Stets ol i mekim traim na planim dispela diwai long hap saut bilong Arisona, Kalifonia, na Florida.

Long ol ples hat, long planti mun bilong yia ol man i ken hait long san aninit long en, na ol i ken kisim paiawut long en. Na tu, ol waitpela anis i no save kaikai dispela diwai, olsem na em i gutpela diwai bilong wokim haus na ol sia tebol samting. Taim yumi skelim ol samting ol man inap mekim long dispela diwai, em i wanpela gutpela samting tru. Tasol i gat ol narapela wok bilong en tu.

Ol Binatang i No Laik Tru Long En

Inap longpela taim ol manmeri long India i save olsem ol lip bilong diwai nim i save rausim ol binatang, olsem na ol i save putim lip bilong en long ol bet, ol buk, baket bilong tromoi pipia, na ol kabot samting. Long 1959 wanpela man bilong Jemani, em i saveman bilong ol binatang, na ol sumatin bilong em ol i lukim planti bilion grasopa i pinisim ol lip bilong olgeta diwai long Sudan, tasol ol i no kaikai lip bilong diwai nim. Dispela i kirapim ol long kisim sampela save moa long diwai nim.

Kirap long dispela taim ol saveman i kisim save olsem marasin bilong diwai nim inap rausim 200 binatang, na ol talinga, na ol binatang jem i save givim sik long man na animal na diwai, na kain kain vairas. Ol saveman i mekim wanpela traim olsem: Ol i putim sampela lip bilong bin wantaim wanpela kain binatang bilong Japan insait long wanpela glas. Long wanpela hap bilong ol lip ol i putim marasin bilong diwai nim. Ol binatang i kaikai hap bilong lip i no gat marasin long en, tasol ol i no kaikai hap i gat marasin long en. Maski ol binatang i hangre na ol i dai, ol i no laik tru long kaikai dispela hap bilong lip i gat marasin long en.

Ol dispela kain traim i kirapim tingting bilong ol man olsem, ol inap wokim wanpela marasin bilong rausim ol binatang i winim sampela narapela marasin ol i bin wokim. Dispela marasin i no gat bikpela pe, na i no gat gip long en, na i no hatwok long wokim. Olsem: Long Nikaragua ol fama i save memeim pikinini bilong diwai nim na putim long wara​—⁠long wanpela lita wara ol i putim 80 gram. Ol i larim i stap inap 12-pela aua na bihain ol i rausim na spreim dispela wara long gaden.

Ol marasin ol i wokim long diwai nim i no save kilim olgeta binatang wantu tasol. Dispela marasin i save senisim pasin bilong sampela binatang, olsem na bihain em i no inap kaikai, na kamapim pikinini, na tanim i kamap narapela binatang. Ol marasin ol i wokim long diwai nim inap rausim o bagarapim ol binatang, tasol i luk olsem ol i no bagarapim ol pisin, na ol animal, na ol manmeri.

“Marasin Bilong Ples”

Diwai nim i gat ol narapela samting tu bilong helpim ol manmeri. Ol pikinini bilong diwai nim na lip bilong en i gat ol marasin bilong daunim sampela jem i save kamapim kain kain sik. Sampela man i tok, marasin bilong diwai nim inap helpim man i gat sua long skin o bel, na em inap daunim mak bilong blut. Ol i tok marasin ol i wokim long diwai nim inap helpim ol man i gat sik daiabitis na malaria. Sampela narapela gutpela samting ol inap kisim long diwai nim em olsem:

Marasin bilong rausim ol binatang. Wanpela marasin ol i kisim long diwai nim ol i save kolim salanin, na em i gat bikpela strong long rausim sampela binatang i save kaikaim man. Marasin ol i wokim long wel bilong diwai nim bilong rausim lang na natnat i stap pinis long ol stua.

Marasin bilong klinim tit. Long olgeta moningtaim planti milion man bilong India i save kisim hap bilong liklik han bilong diwai nim na kaikai bilong mekim i kamap malumalum na klinim tit na maus long en. Save ol i kisim pinis long dispela i kamapim olsem dispela pasin i gutpela, long wanem, ol marasin i stap long skin bilong diwai inap kilim ol jem.

Marasin bilong pasim bel. Wel bilong diwai nim em i strongpela marasin bilong kilim melek. Ol i givim pinis dispela marasin long sampela animal i stap long laboritori, na ol i no karim planti pikinini. Ol i givim dispela marasin long ol monki, na dispela i givim tingting long ol man olsem ol inap wokim wanpela marasin na ol man i no ken kamapim pikinini.

Tru tumas, diwai nim em i gutpela diwai tru. Maski ol man i no kisim yet save long olgeta samting bilong dispela diwai, i luk olsem diwai nim inap mekim planti samting​—⁠rausim ol binatang, helpim skin bilong ol man long stap strong, helpim ol man long planim ol diwai long bikbus, na ating em inap mekim na ol man i no inap kamapim planti pikinini tumas. Olsem na yumi no kirap nogut taim ol man i kolim dispela nambawan gutpela diwai nim olsem “presen God i givim long ol manmeri”!

[Ol Piksa long pes 27]

Diwai nim, long liklik piksa i gat lip bilong diwai nim