Pikinini Ol i Givim Nem Long Em Olsem Rabis
LONG wanpela liklik ples long Afrika, wanpela man nem bilong em Okot, na meri bilong em, Matina, ol i amamas tru taim namba wan pikinini bilong ol i kamap, em pikinini meri. Ol wanblut na pren i kam long ples bilong bringim ol presen, na bilong givim tok amamas olsem ol i laik pikinini i stap longtaim na i stap amamas.
I stap bilong tupela marit i hatwok na ol i no gat planti samting. Ol i wok gaden long wanpela liklik hap graun, na haus bilong ol, em haus Matina i karim pikinini long en, em haus brik ol i bin wokim long graun malumalum na i gat rup kunai. Tupela i tingting long wok strong na namba wan pikinini bilong ol inap kisim sindaun i winim sindaun bilong ol. Bilong helpim tupela long tingim dispela laik bilong ol, ol i givim nem Acan long pikinini meri, na insait bilong dispela nem i olsem “Mi Rabis.”
Wanem samting bai painim Acan bihain? Sapos i stap bilong em bai kamap wankain olsem i stap bilong planti man long kantri bilong em, ating em i no inap lain long rit rait. Sapos em inap painim wok mani taim em i bikpela pinis, ating em bai kisim 338 kina tasol long olgeta yia. Na long kantri bilong em, ol man i no winim bikpela krismas—ol i stap inap 42 krismas samting.
Sindaun bilong Acan i no narapela kain—planti man i gat wankain sindaun. Klostu 6 bilion manmeri i stap long graun na inap 1.3 bilion i save kisim 659 kina tasol long wok mani bilong ol long olgeta yia. Long ol kantri i gat planti mani, ol man i save kisim 38,500 kina long olgeta yia. Long olgeta de, inap 67,000 man moa ol i kamap rabis—em olsem 25 milion long olgeta yia. Planti bilong ol i stap long ol kantri i no gat planti wok bisnis long en, olsem Afrika, Esia, na Latin-Amerika. Tasol long ol kantri i gat planti mani i gat sampela rabisman tu. Na long olgeta 10-pela 10-pela rabisman, 7-pela em ol meri.
Klostu olgeta rabisman i no inap lusim pasin bilong i stap rabis. Dispela pasin i mekim na ol i no inap kisim ol samting ol i mas kisim—em kaikai, klos, na haus. Na dispela pasin inap pasim ol long mekim ol samting ol i laik mekim, na long kisim nem, na skul, na long abrusim sik. Wol Helt Oganaisesen i tok: ‘Pasin bilong i stap rabis i save bagarapim man kirap long taim em i kamap long bel bilong mama i go inap long taim em i dai. Dispela pasin i wok wantaim ol sik nogut i givim bikpela pen na bagarapim man na mekim ol rabisman i stap nogut tru.’
Tasol i stap bilong ol man long ol kantri i no gat planti wok bisnis long en i wok long kamap gutpela, a? Long sampela kantri yumi ken tok, yes. Tasol long planti kantri, nogat. Nius Choices i tok, tingting bilong ol man olsem “lain rabisman i wok long i go liklik,” em i ‘wanpela tingting kranki i no gat as tru bilong en.’ Nius i tok stret olsem: “Yumi stap long wanpela taim i mekim na ol kantri i gat planti mani ol i wok long kisim planti samting moa, na ol kantri i stap rabis ol i wok long i go rabis moa, na insait long ol kantri yet ol maniman i kisim planti samting moa na ol rabisman i go rabis moa yet.”
Olsem wanem? Pasin bilong i stap rabis bai wok yet long putim bikpela hevi long ol man i go inap oltaim? Long tupela stori i kamap bihain long dispela, Kirap! i stori long dispela samting na long rot bilong stretim.