Nambawan Polis i Tok Sori

Tom Will Lane em dispela nambawan polis Edward Michalec i toktok long en long “Kirap!” bilong Janueri 8, 1997, long stori “Kisim Strong Long Karim Ol Hevi Bihain Bai Kamap.” Long stori, Michalec i tok:

“Nambawan polis bilong Worton, Teksas, Yunaitet Stets, em i belhat tru. Em namba 4 taim long em i kalabusim mi na nau em i tok strong olsem: ‘Bilong wanem yu no save bihainim lo?’

“Kwiktaim mi bekim tok: ‘I stret mi mekim olsem.’ Man! Belhat bilong em i go bikpela moa, na em i kirap paitim mi long stik. Nambatu lain polis bilong em, ol tu i kirap na paitim mi long gan bilong ol.”

I no longtaim i go pinis na Mary Perez, em wanpela meri i bin wok long ofis bilong nambawan Polis Lane kirap long 1961 samting i raitim pas olsem: “Em i save mi wanpela Witnes Bilong Jehova. Em i stori long mi long pasin nogut em i bin mekim long Ed Michalec. Em i askim mi long tokim ol narapela Witnes olsem em i sori long pasin em i bin mekim. Em i tok, em i no bin save gut long pasin tru bilong ol Witnes olsem ol i gutpela manmeri i save bihainim lo. Em i sori tru.”

Mary i tok moa: “Maski dispela nambawan polis i dai sampela yia i go pinis, mi laik dispela pas i ken kamapim tok sori bilong em.”

Bihain em i stori long olsem wanem em i kamap wanpela Witnes: “Pasin birua i bin painim Brata Michalec long 1940 samting. Long dispela as mi tingting strong olsem mi mas harim tok bilong ol Witnes taim ol i kam long haus bilong mi. I no longtaim na mipela i kirap na stadi long Baibel. Mitupela man bilong mi i kisim baptais long 1949.”

Em wanpela samting i makim olsem, man i strong long bihainim ol lo Kristen pasin bilong em inap kirapim ol narapela long harim tok. Yumi save planti man i pilim tru pasin bilong Pita na ol narapela aposel bilong bipo, em ol i gat strongpela bel na ol i no pret long autim tok maski ol man i mekim nogut long ol.​—⁠Aposel 5:​17-​29.

[Ol Piksa long pes 27]

Ed Michalec na Mary Perez, long 1940 samting