Aids—I Gat Wanem Gutpela Samting Bilong Bihain?
OL I no gat marasin bilong oraitim o bilong pasim jem HIV. Na ol narapela samting i save mekim na ol i hatwok long daunim dispela sik. Wanpela samting em pasin bilong planti manmeri. Maski ol inap kisim bagarap long samting ol i save mekim, ol i no laik senisim pasin bilong ol. Long Yunaitet Stets, namba bilong ol manmeri i kisim HIV em i stap wankain tasol, maski namba bilong ol manmeri i kisim pinis sik AIDS em i go daun. Lain Associated Press i ting as bilong dispela em tingting bilong “planti manmeri, ol i no save tingim ol toksave long ol samting ol i mas mekim bilong pasim dispela sik.”
Ol ripot i tok, inap olsem 93 pesen bilong ol manmeri i kisim pinis HIV, ol i sindaun long ol kantri i no gat planti wok bisnis long en, na sampela samting moa i save mekim na ol i hatwok long daunim dispela sik. Planti bilong ol dispela kantri i stap rabis, olsem na ol i no gat marasin o klinik samting bilong lukautim skin bilong ol manmeri. Na maski ol dispela kantri inap kisim ol nupela marasin—na planti bilong ol i no inap—pe bilong marasin long wanpela yia bai winim pe planti man bai kisim long olgeta yia ol i stap laip!
Tasol sapos ol i wokim wanpela nupela marasin i no gat bikpela pe na em inap oraitim dispela sik, yu ting ol manmeri i gat wok long kisim dispela marasin bai ol i gat rot long kisim? Ating nogat. Lain UNICEF (United Nations Children’s Fund) i tok, long olgeta yia inap olsem 4 milion pikinini ol i save dai long 5-pela sik, maski i gat marasin sut bilong pasim ol dispela sik na i no gat bikpela pe bilong en.
Olsem wanem long ol manmeri i gat jem HIV na ol i sindaun long ol kantri i no gat marasin bilong helpim ol? Ruth Mota bilong wanpela lain bilong helt (International Health Programs) long Santa Krus, Kalifonia, em i bin helpim wok long planti kantri bilong skulim ol man long olsem wanem ol inap lukautim gut skin na ol i no ken kisim HIV. Em i tok: “Mi save, stretpela tingting long dispela sik em i bikpela samting, wankain olsem marasin em i bikpela samting. Mi save long sampela manmeri i gat HIV na ol i bin stap 10-pela yia i go inap 15 yia, maski ol i no bin kisim marasin. Marasin i gutpela, tasol bilong oraitim sik yu no ken kisim marasin tasol. Tingting bilong yu long dispela samting, na famili na ol narapela i sambai long yu, na yu tingim ol samting bilong spirit, na yu kisim gutpela kaikai, ol dispela samting tu inap helpim yu.”
Bai i Gat Rot Long Pinisim
Olsem wanem? I gat as na yumi ken ting sik AIDS bai pinis olgeta? Yes, yumi ken ting olsem. Wanpela beten planti man i save kolim olsem Beten Bilong Bikpela, em i kamapim nambawan rot bilong pinisim dispela sik. Long dispela beten, em Buk Matyu long Baibel i kamapim, yumi askim God long kamapim laik bilong em long graun olsem em i kamapim long heven. (Matyu 6:9, 10) God i no laik bai yumi kisim sik i go inap oltaim, nogat. God bai mekim tru ol samting olsem yumi beten long en. Na taim em i mekim olsem, em bai pinisim sik AIDS na olgeta narapela sik i save bagarapim man. Long dispela taim “i no gat man . . . bai i tok olsem, ‘Mi gat sik.’ ”—Aisaia 33:24.
Tasol nau, gutpela rot bilong helpim yu, em yu mas klia long ol samting em inap givim dispela sik long yu. I gat tupela samting yu inap mekim long planti sik, olsem: Yu inap pasim sik o yu inap oraitim sik. Tasol yu no inap mekim kain samting olsem long HIV. I gat rot bilong pasim dispela sik, tasol inap long nau i no gat rot bilong oraitim. Bilong wanem bai yu mekim nabaut long samting em inap bagarapim yu? Tru tumas, rot bilong pasim sik i winim tru rot bilong oraitim sik.
[Blok/Piksa long pes 9]
“Kongrigesen i Nambawan Tru”
Aposel Pol i tokim ol wanbilip olsem: “Wanem taim yumi inap mekim gutpela pasin long ol arapela, yumi mas mekim. Na yumi mas strong tru long mekim gutpela pasin long ol arapela manmeri i bilip long Bikpela.” (Galesia 6:10) Mama bilong Karen, em yumi bin toktok long em long namba wan stori, em i stori long ol samting kongrigesen bilong ol Witnes Bilong Jehova i bin mekim taim ol i kisim save olsem Karen na Bill i gat sik long jem HIV. Em i tok: “Kongrigesen i nambawan tru. Taim sik numonia i kisim Bill, Karen tu i sik na em i hatwok long lukautim Bill na ol pikinini. Tasol ol brata sista insait long kongrigesen ol i klinim haus bilong ol, na ol i stretim ka bilong ol, na ol i wasim klos bilong ol. Na ol i helpim tupela long stretim ol pepa long sampela samting bilong ol yet, na ol i helpim ol long i go sindaun long narapela haus. Ol i baim na kukim kaikai bilong ol. Em nau, ol i lukautim ol gut long ol samting bilong spirit, skin, tingting na bel.”
[Piksa long pes 8]
Sapos ol marit i stap gut long poroman bilong ol, dispela inap helpim ol long abrusim HIV