Yu Save?
(Yu inap painim bekim bilong ol dispela askim long ol ves bilong Baibel yumi lukim daunbilo, na tu, olgeta bekim bilong ol i stap long pes 30. Bilong kisim sampela save moa, lukim buk “Insight on the Scriptures,” em Sosaiti Wastaua Bilong Nu Yok i wokim.)
1. Long rot bilong spirit bilong God, ol Kristen long taim bilong ol aposel ol inap mekim wanem na dispela i helpim ol long skulim ol man, na tu, em i helpim ol manmeri i no bilip long save ol i lain Kristen tru? (1 Korin 12:30)
2. Taim pisin balus i kam bek long Noa, em i kam bek wantaim lip bilong wanem diwai? (Stat 8:11)
3. Wanem nem bilong wanpela ples i makim wanpela samting i stap long hap not-wes bilong Poin Bilong Sainai, na Baibel i kolim dispela nem 6-pela taim, na dispela nem inap makim wanpela taun, wanpela provins, sampela strongpela banis samting bilong ol soldia i was long en, o ol lain maunten? (Stat 25:18)
4. Ol i rausim Apsalom long kantri inap 3-pela yia, olsem na Joap i mekim wok long husat bilong toktok long King Devit bambai Devit i ken larim Apsalom i kam bek? (2 Samuel 14:2)
5. Wanem provins i bin stap long hap bilong is long taim King Serksis i bosim kantri? (Esta 1:1)
6. Long ol tok profet i stori long ol Juda bai go bek long ples bilong ol, Baibel i tok wanem tupela kain diwai bai kamap na senisim ol “diwai nogut” na “ol rop i gat nil”? (Aisaia 55:13)
7. Long ai bilong namba wan gavman bilong provins Akaia, em Galio, ol Juda i bin sutim tok long Pol long wanem samting, na bilong wanem Galio i sakim dispela kot? (Aposel 18:12-17)
8. Husat tupela hetman i no bin go long haus sel, maski ol i insait long 70 hetman em Moses i bin makim bilong helpim em? (Namba 11:14-17, 24-26)
9. Wanem taun namel long mak bilong lain Efraim na Manase ol i bin givim long lain Efraim, tasol ol hap i stap arere i gat dispela wankain nem ol i givim long lain Manase? (Josua 16:8)
10. Wanem nem bilong namba 1, 2, 3, na namba 4 leta long alfabet bilong tok Grik?
11. Olsem Baibel i tok, ol Israel i givim wanem samting bilong mekim ofa long “namba wan de bilong Ol Bikpela De Bilong Bret I No Gat Yis”? (Mak 14:12)
12. King Neko i makim wanem pikinini bilong Josaia long kamap king bilong Juda na em i kolim nem bilong em Jehoiakim? (2 King 23:34)
13. Taim Moses i putim liklik blut bilong sipsip man long bikpela pinga bilong lek long han sut bilong Aron na olgeta wan wan pikinini man bilong em, dispela i makim wanem samting? (Wok Pris 8:22-24)
14. Husat em papa bilong Josua? (Nehemia 8:17)
15. Husat em papa bilong Jesebel? (1 King 16:31)
16. Ol i bin kilim i dai 42,000 man bilong wanem lain taim ol i no inap kolim stret tok “Sihibolet”? (Hetman 12:1-6)
17. Wanem hetpris i krosim stretpela meri Hana, long wanem, em i ting Hana i spak? (1 Samuel 1:12-15)
18. Olsem Lo God i givim long ol Israel i tok, wanpela stilman i mas bekim wanem samting? (Kisim Bek 22:1-4)
19. Taim ol i wokim haus bilong Bikpela, ol i mekim bikpela wok long wanem diwai? (1 King 6:9-20)
20. Wanem samting em God i no inap mekim? (Hibru 6:18)
21. Husat em i nambawan Birua bilong God? (Sekaraia 3:1)
22. Long driman, Amos i lukim Jehova i holim wanem samting long han bilong makim olsem ol Israel i no stap stret long bihainim ol samting bilong spirit? (Amos 7:7-9)
23. Buk Sindaun i tok, sapos wanpela meri i gat naispela skin tasol em i no gat gutpela tingting na pasin, em i olsem wanem samting? (Sindaun 11:22, NW )
24. Jisas i salim hamas disaipel i go bilong kisim yangpela donki em i bin sindaun long en bilong i go insait long Jerusalem? (Mak 11:1)
[Blok long pes 30]
Ol Bekim
1. Mekim tok long kain kain tok ples
2. Oliv
3. Sur
4. Meri i gat gutpela tingting bilong ples Tekoa
5. India
6. Ol diwai pain na ol naispela liklik diwai
7. Ol i tok em i lainim ol man long “mekim lotu long God long narakain pasin.” Long wanem em i no bin brukim wanpela lo bilong ol Rom
8. Eldat na Medat
9. Tapua
10. Alfa, beta, gama, delta
11. Pikinini sipsip bilong kaikai long Bikpela De Bilong Tingim De God i Larim Ol Israel i Stap Gut
12. Eliakim
13. Ol i mas wokabaut stret na inap tru long save bilong ol, ol i mas mekim stret wok pris bilong ol long mekim ol ofa
14. Nun
15. Etbal
16. Efraim
17. Eli
18. Em i mas bekim samting em i stilim inap 5-pela
19. Diwai sida
20. Tok giaman
21. Satan
22. String i gat liklik ain
23. Olsem naispela ring gol long nus bilong pik
24. Tupela