Pas Bilong Ol Man

Mausgras Bilong Jisas  Long stori bilong yupela “Jisas​—⁠Em i Luk Olsem Wanem? Em i Gat Wanem Namba Long Nau?” (Disemba 8, 1998) Ol piksa long stori bilong yupela i kamapim olsem Jisas i bin sakim lo i stap long Wok Pris 19:27: “Yupela i no ken katim gras bilong het bilong yupela, na yupela i no ken katim na sotim maus gras.” Bilong wanem na yupela i no laik droim Jisas i gat bikpela gras?

C. S., long Inglan

God i bin givim dispela lo long ol Juda bambai ol i no ken katim gras o mausgras bilong ol olsem sampela pasin bilong lotuim ol god giaman samting. Tasol, lo bilong God i no makim olsem ol Juda i no ken katim mausgras o nus gras bilong ol. Stori bilong 2 Samuel 19:24 i makim olsem ol man Juda i save “katim” o sotim mausgras bilong ol. Ol pasin i stap long dispela taim, ating dispela i bosim ol long bihainim wanem pasin long katim o sotim mausgras. Ol samting ol man i bin digim long graun na painim i makim olsem, ol Juda i bin i gat kain kain pasin bilong katim mausgras na nus gras. Olsem na long ol piksa, mipela i droim Jisas i gat sotpela mausgras na em i sotim gras, na dispela i stret wantaim ol dispela save.​—⁠Edita.

Jisas i Bin Luk Olsem Wanem?  Long pes 8, yupela i tok olsem “God i bin kisim laip bilong Jisas na putim long bel bilong wanpela nupela meri Juda.” Jisas i gutpela olgeta, olsem na dispela samting i makim olsem i no gat wanpela jin bilong Adam i stap long em o olsem wanem?

J. G., long Amerika

Paslain long Jisas i kamap long bel, ensel Gebriel i tokim Maria: “Holi Spirit bai i kam long yu, na strong bilong God Antap Tru bai i karamapim yu. Olsem na dispela pikinini bihain bai yu karim, em bai i stap gutpela na stretpela man bilong God, na ol bai i kolim em Pikinini Bilong God.” (Luk 1:35) Spirit holi i mekim kiau long bel bilong Maria i redi bilong karim pikinini, em i kisim laip bilong namba wan Pikinini bilong God long ples spirit na putim em long graun. Tru tumas, spirit holi i lukautim gut dispela samting bambai strong bilong gutpela laip bilong dispela pikinini man i mas rausim sin i stap long kiau bilong Maria. Tasol em i no rausim sampela tingting na pasin bilong mama.​—⁠Edita.

Stap Fri Long Mekim Lotu  Inap sampela yia nau mi bin ritim Kirap!, na mi rait nau bilong tok tenkyu long stori “Yu Stap Fri Long Mekim Lotu​—⁠Ol i Laik Tekewe Dispela Pasin?” (Janueri 8, 1999) Mi save olsem pasin bilong birua long ol lotu i bin i stap long hap bilong Yurop long ol yia olsem 500 C.E. samting, na lotu Katolik i bin kirapim tingting bilong ol bikman bilong gavman long pasim ol man long stap fri long mekim lotu bilong ol. Nau mi kisim save long ol samting i wok long kamap long Frans long nau, mi save tingting, ‘Bilong wanem dispela kantri inap nogutim nem bilong en yet taim em i pasim ol man long stap fri long mekim lotu?’ Plis yupela i mas toksave long planti ol manmeri i save ritim dispela nius bilong yupela long ol samting i wok long kamap. Mi bilip olsem Frans bai larim yupela i stap fri long mekim lotu na stap olsem gutpela piksa bilong ol narapela kantri i bihainim.

C. C., long Pueto Riko

Stori Bilong Grace Marsh  Mi laik tok tenkyu long stori bilong sista Marsh long Kirap! (Me 8, 1998) Taim mi ritim stori bilong em long pasin bilong strongim bel long autim tok maski ol man i birua long em, dispela i strongim mi tru. Dispela stori i bin helpim mi long pilim moa yet olsem nau yumi stap fri long mekim wok autim tok, long wanem, ol brata long bipo ol i bin wok strong tru.

C. F., long Amerika

Ol Mak Bilong Pes  Mi laik tok tenkyu tru long stori “Ol Mak Bilong Pes​—⁠Mak Tru Bilong Ol Naijiria i Wok Long Pinis.” (Janueri 8, 1999) Mitupela man bilong mi i gat ol poroman bilong Afrika em ol i gat ol mak bilong pes, na mitupela i save tingting olsem ol dispela mak i wanem samting. Stori bilong yupela i bin bekim dispela askim bilong mipela.

M. V., long Itali