Sampela Tok i Kam Long Olgeta Hap
Animal Inap Helpim Skin Bilong Yu?
Nius The Toronto Star i tok: “Pasin bilong laikim ol animal inap helpim man na em i no sik planti taim.” Insait long 10-pela yia i go pinis, save ol man i kisim i kamapim olsem “ol man i save lukautim animal ol i no bel hevi tumas, na ol i no save go lukim dokta planti taim, na planti bilong ol i kamap orait gen bihain long ol i kisim hat-atek. Wanpela animal inap helpim ol man i bin kisim sik strok long kamap strong gen, na helpim ol man i gat sik bilong tingting long stap bel isi.” Dokta Alan Beck bilong wanpela yunivesiti (Purdue University School of Veterinary Medicine) long Indiana, Yunaitet Stets, em i ting “ol animal i save mekim na man i stap bel isi. Ol animal i save pulim tingting bilong man, na kirapim em long holim ol.” Dispela samting i save kamap maski animal i no bilong famili bilong man yet, olsem na planti man moa i lukautim animal bambai dispela i ken “helpim” ol. Sampela dokta bilong stretim sik bilong tingting, ol i kirapim ol man i gat sik bilong tingting long lusim hap taim bilong poromanim wanpela animal, na dispela i bin helpim ol dispela sikman.
Ol i Bagarapim Ol Pikinini Long Olgeta Hap
Lain Wol Helt Oganaisesen (WHO), long Jeniva, Swiselan i tok, long olgeta hap ol man i save mekim nogut long 40 milion pikinini. Nius The New York Times i tok, long 19 kantri ol i bin skelim ol pikinini i no winim yet 14 krismas, na ol i kisim save olsem, ol man i bin mekim pasin sem long planti pikinini man (29 pesen) na long planti pikinini meri (34 pesen) bilong dispela lain ol i skelim. Lain WHO i tok, long olgeta yia long Yunaitet Stets, ol man i save bagarapim skin bilong 2 milion pikinini.
No Gat Planti Wara Moa
Wanpela nius (The UNESCO Courier) i tok: ‘Nau i no gat planti wara bilong wan wan man i ken mekim wok long en; long 50 yia i go pinis i gat planti wara (50 pesen) moa.’ Na ol i ting wara bai i wok long i go daun long olgeta hap. Dispela hevi na i no gat planti wara i kamapim klia olsem ol man i mekim bikpela wok moa long wara, long wanem, namba bilong ol i go antap, na ol i mas wokim planti gaden moa, na kamapim planti faktori moa. Ol saientis bilong glasim graun bilong makim wanem ol hap i sot tru long wara, ol i tok sampela hap i “bagarap olgeta.” Nius Courier i tok, dispela i makim olsem ol wara i stap “bai i no inap lukautim ol manmeri taim bikpela hevi i kamap, olsem bikpela san.” Nius i tok moa: “Long 50 yia i go pinis, i no gat wanpela kantri long graun em wara bilong en i go daun tru. Tasol long nau, planti manmeri (35 pesen) i save stap long ol hap i no gat planti wara long en.”
Ol Rabisman Giaman
Ripot bilong wanpela nius (The Week) long India i tok, planti rabisman i sot tru long ol samting na ol i stap nogut, tasol sampela rabisman i no olsem. Long wanpela provins bilong India, em Maharastra, wanpela rabisman i wokabaut long tupela stik na em i go long wanpela ka i sanap i stap long trafik-lait. Draiva bilong ka i no laik lukluk long rabisman na em i wok yet long toktok wantaim gelpren bilong em. Olsem na rabisman i singaut strong moa na askim ol long givim mani. Orait, nau draiva i putim windo i go daun na subim dispela rabisman i go longwe long ka, olsem na mani i stap long plet bilong rabisman i pundaun nabaut. Wantu dispela rabisman i “lek nogut” em i kamap orait, na em i kirap brukim windo bilong ka long tupela stik bilong em. Nius The Week i tok: “Ol pren bilong em i ‘aipas’ na ‘lek nogut,’ em ol i wok long singaut long mani long draiva bilong ol narapela ka, olgeta i kam na helpim dispela rabisman;” ol i kisim ol ston, na stik, na stik bilong wokabaut, na ol i tromoi long ka na pulim dispela yangpela man i kam ausait long ka bilong em. Ol polis i kam long taim stret, olsem na ol dispela rabisman i ranawe i go siksti.
Man i Sot Long Wok Em i No Stap Gut
Ol i skelim 50 tausen wokman long Jemani na ol i kisim save olsem, ol man wok bilong ol i no hatwok liklik long mekim, dispela inap nogutim skin bilong ol, winim ol man i mekim planti wok. Wanpela nius (Augsburger Allgemeine) i tok: “Ol wokman i save mekim wankain wok long olgeta taim na ol yet i no inap bosim wok bilong ol, ol i save sik planti taim, winim ol man i mas wok strong.” I no gat narapela hevi bilong wok i save mekim na wokman i sik planti taim na inap longpela taim, olsem wok i no save kirapim man long taitim bun. Nius i tok, ol man i no gat wok long taitim bun bilong mekim wok bilong ol, planti ol i gat “sik long bel, na mak bilong blut i go antap, na baksait na ol skru i pen.”
Kru Bilong Pisin na Slip
Nius Toronto Star i tok, inap longpela taim ol saientis i bin save olsem taim ol pisin i slip, ol inap opim wanpela ai na lukluk, na dispela i lukautim ol na ol birua i no inap bagarapim ol. Nupela save ol i kisim i kamapim olsem, ol pisin inap larim kru olgeta i slip o larim hap bilong en i wok i stap bambai wanpela ai i ken op na lukluk. Ol i skelim ol pato ol i kolim malat taim ol i lain na slip i stap, na ol i kisim save olsem ol pato i sindaun long pinis bilong lain wanpela hap bilong kru bilong ol i wok i stap inap bikpela hap taim insait long taim bilong ol long slip. Ol pato i stap long namel bilong lain, kru bilong ol i wok i stap liklik hap taim insait long taim bilong ol long slip. Profesa Niels Rattenborg bilong Yunivesiti Bilong Indiana, em i tok, i luk olsem “taim bagarap inap painim ol pisin, planti taim moa dispela hap bilong kru bilong ol i wok yet taim ol i slip.”
I No Helpim Man Liklik
Wanpela nius (University of California Berkeley Wellness Letter) i tok: “Pasin bilong smok i no save helpim man na skin bilong em bai stap liklik. Planti yangpela meri i kirap long smok, long wanem, ol i ting dispela bai helpim ol na skin i no ken i go patpela.” Tasol ol i skelim 4,000 man i gat 18 i go inap 30 krismas, na ol i kisim save olsem “insait long 7-pela yia, skin bilong planti man i go bikpela (winim hap kilo long wanpela yia), maski ol i smok o nogat.” Nius i tok: “Smok i no save helpim man na skin i no ken i go patpela. Smok i no save helpim man long wanpela samting.”
Wilwil Bilong Ol Liklik Animal
Nius New Scientist i tok, long Hong Kong wanpela kampani bilong wokim ol samting bilong ol liklik animal ol man i save lukautim insait long haus, i bin wokim wanpela “wilwil bilong ol animal.” Wil i go pas i olsem wanpela kain wil ol liklik animal i save ran insait long en na wil i tantanim. Taim animal i ran insait long dispela wil, dispela i mekim wilwil i ran long graun. Tasol sapos papa bilong animal i pret long bagarap bai painim liklik animal bilong em, orait em i ken apim wil i go pas na wil i no ran moa long graun. Long dispela rot, animal inap eksasais gut, maski wilwil i no raun.
Helpim Baksait na Em i No Pen Taim Yu Raun
Ol man em baksait bilong ol i save pen long olgeta taim, ol i hatwok long raun long ol narapela hap. Tasol nius The Toronto Star i kamapim sampela gutpela tok bilong helpim ol dispela man. Olsem: Taim yu wokabaut “pasim su i gutpela long wokabaut long en. Ol su hai-hil i mekim na skin i sanap kranki, na dispela i putim hevi long bun bilong baksait. . . . Sapos yu raun long ka, lusim ka sampela taim na stretim baksait na wokabaut liklik. . . . Baim wanpela kain pilo bilong helpim baksait long stap stret” na putim long sia bilong ka. Na tu, taim yu sindaun, yu no ken sindaun long wankain pasin tasol. Nius Star i kamapim tok bilong helpim ol man na baksait i no ken pen taim ol i karim switkes. Nius i tok, “nau i no hatwok long painim narapela narapela kain switkes i gat wil na yu inap pulim switkes, na yu no ken hatwok long karim. Gutpela sapos han bilong switkes i longpela na yu no ken hatwok long pulim switkes. Sapos yu pulim switkes na baksait bilong yu i krungut, long wanem, han bilong switkes i sotpela tumas dispela i no helpim baksait bilong yu.”
Pasin Bilong Kamapim Belhat
Wanpela nius (National Post) bilong Kanada i tok, “pasin bilong kamapim belhat na paitim nating ol samting olsem pilo o wanpela kain bek ol man bilong boksen i save paitim, dispela i no save daunim pasin bilong belhat, nogat. Em i mekim na man i save belhat moa yet. Profesa Brad J. Bushman bilong wanpela yunivesiti (Iowa State University), em i tok: “Ol buk na nius ol man i laik ritim i tok, pasin bilong kamapim belhat na paitim nating ol samting em i gutpela samting, tasol ol buk bilong ol saveman i no wanbel tumas wantaim dispela tingting.” Nius Post i tok, ol saveman i kisim save olsem, “ol buk na nius i tok olsem dispela kain pasin bilong kamapim belhat em i gutpela rot bilong helpim man taim em i kros, ating ol i save strongim pasin bilong belhat, long wanem, i olsem ol man i no gat wok moa long bosim bel.”