Pas Bilong Ol Man
Papamama i Gat Sik Mi pilim tru stori “Ol Yangpela i Laik Save . . . Bilong Wanem Mama i Gat Bikpela Sik?” (Ogas 8, 1999) Mi no bin ting i gat planti narapela yangpela i gat wok long lukautim wanpela bilong famili, olsem mi gat wok long mekim. Bubu meri bilong mi em i stap wantaim mipela, na inap fopela mun em i bin slip tasol long bet. Mi kirap pilim olsem dispela i putim hevi long mi na mi les long lukautim em. Taim mi ritim dispela stori em i strongim mi tru. Dispela stori i helpim mi long bilip tru olsem Jehova i save helpim yumi.
J. P., long Filipin
Dispela stori i mekim gut bel bilong mi, na i strongim mi long helpim mama bilong mi, em i gat bikpela bel hevi. Mi bin bihainim ol tok dispela stori i kamapim na dispela i helpim mi long tingting gut long hevi bilong mama, na pilim tru hevi bilong em, na mekim ol pasin i no save skrapim bel bilong em.
G. L., long Itali
Dispela stori i kamap long taim stret. Mi gat sik kensa, na pikinini man bilong mi em i stap wantaim mi. Pikinini bilong mi em i bel hevi nogut tru, na mi no save olsem wanem mi ken mekim gut bel bilong em. Dispela stori i kamapim stret tingting bilong em. Ol dispela stori i no bilong ol yangpela tasol, nogat. Ol i stori long ol samting bilong i stap bilong man.
R. Z., long Jemani
Dispela stori i helpim mi long save olsem em i bikpela samting tru long i stap strong long ol samting bilong spirit. Mi kisim save olsem taim yumi tingting strong long Kingdom bilong God, long dispela taim tasol yumi inap helpim sikman.
P. E., long Ostria
Tok Bilas Mi laikim stori bilong Julai 8, 1999 “Ol Yangpela i Laik Save . . . Olsem Wanem Mi Inap Karim Hevi Taim Ol i Tok Bilas?” Kirap long taim mi stap long pilai-skul bilong ol liklik pikinini, ol wanskul i bin askim mi long bilip bilong mi. Sampela taim pasin bilong ol long mekim askim i bagarapim bel bilong mi. Planti taim mi laik bekim strongpela tok long ol. Nau mi save olsem ol dispela samting i bilong traim bilip tasol. Na i gat ol narapela long skul mi bin autim tok long ol na ol i amamas long harim tok.
L. C., long Yunaitet Stets
Ol i bin tok bilas long mi tu, long wanem, mi no laik insait long sampela bikpela de bilong lotu o long pasin bilong salut long plak samting. Na tu, ol i bin mekim nogut long mi, long wanem, mi no save giaman na mi save bihainim ol lo bilong Baibel. Pasin bilong kisim stretpela save i bin helpim mi long mekim ol tok bilong lukautim bilip bilong mi. Dispela i save helpim mi long kamapim klia tingting bilong mi, na mi no sem long tokaut long ol bilip bilong mi.
H. C., long Sambia
Maski mi no yangpela moa—mi winim 50 krismas!—mi laikim tru dispela stori. Taim yumi autim tok, sampela taim pasin birua bilong ol man i mekim na yumi tingting planti na ating yumi laik bekim tok nogut long ol. Olsem na mi pilim tru dispela tok: “Taim yu bekim sampela tok nogut long narapela, maski em i olsem smatpela tok, dispela inap kirapim narapela long mekim sampela tok nogut moa.” Taim mi mekim tok bilong lukautim bilip bilong mi, mi traim long mekim long pasin i makim olsem mi no laik bekim tok nogut, na tok bilong dispela stori i strongim mi long bihainim yet dispela pasin.
A. F., long Yunaitet Stets