Baibel i Tok Wanem?
Pasin Bilong God i Save Senis?
WANPELA saveman bilong graun, em George Dorsey, i stori long pasin bilong God bilong “Olpela Testamen” na i tok olsem em i “wanpela God i gat hatpela pasin tru.” Em i tok moa olsem: “Pasin bilong Yawe . . . i mekim na ol man i no inap laikim em liklik. Em i God bilong ol man bilong stilim na bagarapim ol samting bilong ol narapela man, na ol man bilong givim pen long ol narapela, na ol man bilong pait, na em i God bilong daunim ol narapela.” Sampela narapela i kisim wankain tingting long pasin bilong dispela God bilong “Olpela Testamen”—em Yawe, o Jehova. Olsem na sampela i gat hap tingting olsem pastaim Jehova em i wanpela God i save mekim pasin nogut na isi isi em i senis na kamap dispela God bilong “Nupela Testamen,” em God bilong sori na marimari.
Dispela i no nupela tingting. Marsion i bin kamapim pastaim, em i bin stap 150 yia samting bihain long Krais, na em i bihainim sampela tingting bilong ol Nostik. Marsion i no laikim liklik dispela God bilong “Olpela Testamen.” Em i tok dispela God i man bilong belhat na pait, na man bilong bekim rong, na em i wanpela hatpela bos i save praisim ol man i lotuim em. Marsion i tok olsem God bilong “Nupela Testamen”—em dispela God Jisas Krais i stori long en—em i gutpela olgeta, na em i wanpela God bilong sori na marimari, na em i save bihainim gutpela pasin na pasin bilong lusim tingting long rong bilong man.
“Jehova i Save Tingim Ol Senis i Kamap”
Insait bilong dispela nem bilong God, Jehova, i olsem, “Em i Mekim i Kamap.” Nem bilong em i makim olsem Jehova i save kamap olsem Man bilong inapim ol tok promis bilong Em. Taim Moses i bin askim God long kamapim nem bilong em, Jehova i kamapim sampela insait moa bilong dispela nem, olsem: “Mi bai kamap wanem wanem kain mi laikim.” (Kisim Bek 3:14, NW ) Baibel bilong Rotherham i tanim dispela tok olsem: “Bai Mi Kamap wanem wanem kain mi yet mi laikim.”
Olsem na Jehova i save kamap wanem wanem kain em i laikim bilong inapim laik bilong em na truim ol tok promis bilong em. Ol nem em i holim i kamapim klia dispela samting. Sampela nem bilong em i olsem: Jehova bilong ol bikpela lain ami, Jas, King, Man i no inap larim wanpela god giaman i senisim em, Bikpela King, Man bilong wokim yumi, Papa, Man bilong skulim yumi, Wasman, Man bilong harim beten, Man bilong baim bek yumi, God bilong amamas—em i holim ol dispela nem wantaim planti narapela nem moa. Bilong kamapim ol gutpela laik bilong em, Jehova i save kamap kain man olsem ol dispela nem i makim.—Kisim Bek 34:14, NW; Hetman 11:27; Song 23:1; 65:2; 73:28; 89:26; Aisaia 8:13, NW; 30:20; 40:28; 41:14; 1 Timoti 1:11.
Orait yu ting dispela i makim olsem pasin bilong God o sampela lo bilong em i save senis? Nogat. Jems 1:17 i tok olsem: “Dispela Papa em i no save senisim nabaut pasin bilong en.” Tasol olsem wanem God i ken mekim ol samting em i mas mekim long ol narapela narapela samting i save kamap tasol em yet i no save senis?
Pasin bilong gutpela papamama long mekim kain kain samting bilong helpim pikinini bilong ol i piksa bilong dispela samting. Insait long wanpela de, ating papa o mama i kamap olsem man o meri bilong redim kaikai, klinim haus, givim gutpela tingting, givim kanda, na ol bai mekim wok olsem nes, pren, tisa, na planti samting moa. Dispela papa o mama ol i no save senisim pasin bilong ol bilong mekim ol dispela narapela narapela wok, nogat; ol i save mekim ol samting ol i gat wok long mekim. Na i wankain tu long Jehova, tasol wok em i mekim i bikpela moa yet. Jehova inap bihainim kain kain pasin bilong inapim laik bilong em na helpim lain bilong em.—Rom 11:33.
Olsem: Long Ol Skripsa Hibru na Ol Skripsa Grik Jehova em i wanpela God bilong sori na marimari. Profet Maika, em i bin stap olsem 700 yia samting paslain long Krais, i stori long pasin bilong Jehova olsem: “Bikpela, i no gat wanpela god i olsem yu. Yu save lusim sin bilong ol liklik lain manmeri bilong yu i stap yet. Kros bilong yu i no save stap oltaim. Nogat. Oltaim yu save laikim mipela na yu save amamas long mekim gutpela pasin long mipela.” (Maika 7:18) Na tu, aposel Jon i bin raitim wanpela tok planti man i save long en: “God yet em i as bilong dispela pasin bilong laikim ol arapela.”—1 Jon 4:8.
Tasol Ol Skripsa Hibru na Ol Skripsa Grik i kamapim tu pasin bilong Jehova long stap stretpela Jas bilong ol man ol i save brukim ol lo bilong em planti taim na bagarapim ol narapela, tasol ol i no laik tanim bel. Olsem man bilong raitim Song i tok: “[Jehova] bai bagarapim ol manmeri i save mekim pasin nogut.” (Song 145:20) I olsem Jon 3:36 i tok: “Man i bilip long Pikinini, em i gat laip i stap gut oltaim oltaim. Tasol man i no bihainim tok bilong Pikinini, em bai i no inap kisim laip. Nogat. Belhat bilong God i stap long em.”
Ol Pasin Bilong Jehova i No Save Senis
Pasin bilong Jehova i no bin senis na em i holim yet ol pasin olsem pasin sori, gutpela tingting na save, stretpela pasin, na bikpela strong. Em i tokim ol lain Israel olsem: ‘Mi tasol mi Bikpela na mi no save senisim tingting bilong mi.’ (Malakai 3:6) Em i mekim dispela tok 3,500 yia bihain long taim em i bin wokim ol manmeri. Na olsem dispela tok bilong God yet i kamapim, taim yumi skelim gut ol tok i stap long Baibel olgeta, dispela i kamapim klia olsem ol lo na pasin bilong God i no save senis. Maski planti yia i kam i go pinis, pasin bilong God Jehova i no bin senis na em i wok long kisim pasin isi, nogat; long wanem, long olgeta taim em i bin holim dispela pasin.
Olsem Baibel i kamapim, pasin sori bilong God na pasin bilong em long holimpas stretpela pasin i no bin senis; em i bihainim wankain pasin olsem em i bin mekim long taim em i kirap na wokim ol man long gaden Iden. Ol samting Jehova i bin mekim olsem Baibel i stori long en i kamapim ol narapela narapela pasin bilong dispela God i no save senis. Kain kain samting i save kamap, na pasin bilong ol man tu i narapela narapela, olsem na i no olsem Jehova bai mekim wankain pasin long olgeta man o long olgeta samting, nogat. Em bai bihainim wanem wanem pasin i stret long ol samting i kamap.
Olsem na tok bilong Baibel i kamapim klia tru olsem kirap long bipo yet na i kam inap long nau pasin bilong God i no bin senis, na long bihain tu pasin bilong em i no ken senis. Jehova em i Man bilong stap wankain tasol. Long olgeta taim em i stap olsem Man ol narapela i ken bilip long en. Em i no save senis. Long olgeta taim yumi inap bilip na wet long em.
[Ol Piksa long pes 12, 13]
Dispela God i bin bagarapim Sodom na Gomora . . .
. . . em bai kamapim nupela taim i gat stretpela pasin long en