Pas Bilong Ol Man
Taim Bilong Yumi Nius bilong Disemba 8, 1999, i gutpela tru! Dispela nius i helpim mi gut tru, na mi amamas tru long ol stori “Taim Bilong Yumi—Ol Yia Bilong Bikpela Senis.” Ol tok bilong en i stret tru na i givim planti save long mi. Em i kirapim laik bilong mi long wok strong moa long was i stap long ol samting bilong spirit nau long dispela taim bilong pinis.
M. V., long Filipin
Man Tingting Bilong Em i Dai Tenkyu tru long gutpela stori bilong Michiko Ogawa. (“Gutpela Samting Mi Wetim i Strongim Mi Long Karim Ol Hevi,” Janueri 8, 2000) Man bilong em i bin kisim bagarap 5-pela de bihain long taim mama i karim mi. Tingting bilong em i dai na em i stap olsem inap long olgeta yia mi stap laip, na taim mi tingim dispela samting mi pilim tru dispela bikpela hevi! Tru tumas, Jehova i bin helpim meri bilong dispela man long lukautim tupela pikinini man bilong em na long karim dispela bikpela hevi.
L. N., long Amerika
Mi pilim tru dispela stori long bel bilong mi. Mi save stap wanpis na i no longtaim i go pinis mi kisim save olsem mi gat sik kensa. Taim mi kaunim pinis dispela stori, mi gat laik tru long holimpas Michiko na tok tenkyu long em i wok long holimpas bilip na stap gut long Jehova maski ol traim i painim em. Pastaim, mi laik wanpela mirakel i mas kamap na pinisim sik bilong mi. Tasol nau, olsem Michiko, mi gat laik olsem laik bilong Jehova i ken kamap.
M. S., long Amerika
Ol Dokta i No Mekim Wok Long Blut Ol i bin mekim bikpela wok tru bilong kamapim ol stori “Ol Dokta i No Mekim Wok Long Blut—Em Laik Bilong Planti Man.” (Janueri 8, 2000) Mi save go long wanpela skul bilong kamap nes na mi givim dispela nius long wanpela wanskul na long wanpela tisa bilong mi. Pastaim dispela wanskul na tisa ol i save bel nogut long ol Witnes Bilong Jehova. Tasol tupela i amamas long kisim ol dispela nius na sampela narapela nius i stori long ol Witnes Bilong Jehova.
R. P., long Swiselan
Tupela pikinini bilong mi i bin kisim bagarap long ka long 1998. Lek bilong pikinini man bilong mi i bagarap olgeta. Em i tokaut planti taim olsem em i no laik kisim blut! Tasol haus sik i no gat ol samting bilong katim man na ol i no mekim wok long blut. Ol i senisim em i go long narapela haus sik, tasol ol wokman long dispela haus sik tu ol i no laik katim em—ol i laik mak bilong hematokrit long blut bilong em i mas go antap inap olsem 35. (Em i bin go daun inap olsem 8.1.) Ol i kisim pasin i olsem ol i wet i stap bilong lukim olsem em bai dai o nogat. Tasol taim ol i helpim em—olsem apim lek bilong em, na ol i givim marasin (erythropoietin) long em, na sampela samting moa—mak bilong hematokrit long blut bilong em i go antap inap olsem 35.8! Taim dokta i katim em i no gat hevi, tasol em i kisim sampela bagarap long skin em bilong i stap oltaim, long wanem, ol dokta i no helpim em hariap. Mi laik olgeta dokta, na ol dokta bilong katim man, na ol dokta i gat wok long mekim i dai tingting bilong sikman taim dokta i katim em, ol i mas kaunim dispela ol stori.
L. L., long Amerika
Em i gutpela samting tru long save olsem planti dokta i amamas long wok gut wantaim ol Witnes Bilong Jehova. Mi bai hariap long bringim dispela nius i go long dokta bilong mi. Mi save em bai amamas tru long dispela nius.
U. M., long Amerika
Dispela stori i kamap stret long taim ol i makim bilong dokta i katim mi. Taim mi lusim planti blut na mak bilong blut i go daun, mi mekim wok long dispela nius long kamapim long ol wokman bilong haus sik na ol wanblut bilong mi long as na mi no laik kisim blut. Mi tenkyu long Jehova olsem mi kamap orait gen na kisim bek strong bilong mi.
C. B., long Amerika