Mekim Gutpela Wok Long Wanpela Video

TAIM Tillie i gat 12-pela krismas tasol, em i autim tok long skul taim rot i op long em. Klas bilong em i wok long skelim ol samting bilong Namba Tu Pait, na dispela i kirapim ol long toktok long ol samting nogut i bin kamap taim ol Natsi i kilim i dai planti milion manmeri. Tillie i tokim tisa bilong em olsem long dispela taim nogut tru i no ol Juda tasol i kisim bagarap, nogat; ol Natsi i bin givim tu bikpela pen long ol Witnes Bilong Jehova na ol i kilim ol i dai. Tisa i orait long Tillie i bringim video Purple Tringles i kam long skul. Paslain long soim dispela video, tisa i tokim ol sumatin long klas bilong em olsem: “Namba bilong ol Juda em ol Natsi i bin kilim i dai i bikpela tru, olsem na ol man i no tingim planti ol narapela lain em ol tu i bin kisim nogut long han bilong ol Natsi. Ol Witnes Bilong Jehova tu i insait long dispela lain.”

Tisa i kirap nogut tru long ol samting em i lukim long dispela video, olsem na em i givim dispela video long narapela tisa bambai em i ken mekim wok long en long klas bilong em. Tillie i tingim tu tisa bilong em long gret 4, olsem ol Natsi i bin kilim i dai brata bilong em. Em i kisim video i go long dispela tisa tu, na long dispela apinun yet tisa i lukim video.

Winim 60 manmeri olgeta ol i lukim video Purple Triangles, na em i kirapim tru tingting bilong ol. Dispela samting i kamap, long wanem, wanpela yangpela meri i no pret long tokaut long lotu bilong em.​​—⁠Song 8:⁠2.