Baibel i Tok Wanem?
Tru Tru Jisas i Dai Long Diwai Kros?
KLOSTU olgeta man taim ol i lukim kros ol i luksave olsem em i samting bilong lotu. Planti milion man i save onaim diwai kros na ting em i wanpela samting i holi em Jisas i dai long en. Wanpela man i save raitim ol buk bilong lotu Katolik, nem bilong em Adolphe-Napoleon Didron i tok: “Ol man i lotuim diwai kros wankain olsem ol i lotuim Jisas; ol man i adorim dispela kros ol i wokim long diwai wankain olsem ol i adorim God yet.”
Sampela i tok diwai kros i mekim na ol i pilim olsem ol i go klostu moa long God taim ol i beten. Na sampela i mekim wok long en olsem wanpela paspas, ol i ting olsem em i lukautim ol long ol samting nogut. Tasol yu ting ol Kristen i mas onaim kros? Tru tru Jisas i bin dai long diwai kros? Baibel i tok wanem long dispela samting?
Diwai Kros i Makim Wanem Samting?
Planti yia paslain long taim bilong ol Kristen, ol lain Babilon long bipo i save mekim wok long ol kros insait long lotu ol i mekim long Tamus, em god bilong mekim gaden, animal, na ol man i kamapim planti pikinini. Dispela pasin bilong mekim wok long kros long lotu i go long hap bilong Isip, India, Siria, na Saina. Sampela handet yia bihain, lain Israel i paulim na bagarapim lotu bilong Jehova taim ol i onaim giaman god Tamus. Baibel i tok long dispela kain pasin bilong lotu olsem “pasin nogut tru.”—Esekiel 8:13, 14.
Long Gutnius bilong Matyu, Mak, Luk, na Jon ol i mekim wok long tok Grik stau·rosʹ taim ol i toktok long samting ol i nilim Jisas long en na kilim em i dai. (Matyu 27:40; Mak 15:30; Luk 23:26) Dispela tok stau·rosʹ i makim wanpela pos. Wanpela buk (The Non-Christian Cross) em J. D. Parsons i raitim i tok: “Long ol planti tok bilong Nupela Testamen em ol i bin raitim pastaim long tok Grik, i no gat wanpela tok i makim olsem stau·rosʹ ol i bin nilim Jisas long en i narapela kain, em stau·rosʹ tasol, olsem wanpela pos, i no tupela hap diwai ol i bin nilim wantaim olsem kros, nogat.”
Olsem Aposel 5:30 i kamapim, aposel Pita i mekim wok long dispela tok xyʹlon, mining bilong en “diwai,” em wanpela tok i makim wankain samting olsem stau·rosʹ, em i no tupela hap diwai ol i nilim wantaim, nogat, em wanpela diwai pos o diwai. Inap 300 yia bihain long Jisas i dai, ol man i tok ol i Kristen ol i kamapim dispela tok olsem ol man i bin nilim Jisas long diwai kros na kilim em i dai. Tasol tok bilong ol tumbuna i as bilong dispela tok na tu ol i paulim mining bilong dispela tok Grik stau·rosʹ. Em i gutpela long luksave olsem sampela piksa bilong bipo i soim pasin bilong ol lain Rom long nilim man long wanpela pos o diwai bilong kilim em i dai.
“Stap Longwe Long Olgeta Giaman God”
Wanpela samting i bikpela moa long ol Kristen tru i mas tingim i olsem: I stret long onaim wanpela samting ol man i bin nilim Jisas long en na kilim em i dai o nogat? Maski sapos dispela samting em i wanpela pos, wanpela kros, wanpela spia o naip, yu ting i stret long yusim insait long lotu?
Sapos wanpela i mekim wok long naip samting bilong kilim i dai wanpela long famili bilong yu, na ol i soim dispela samting long kot na bai kot i ken lukim. Olsem wanem? Bai yu traim long kisim dispela naip, na kisim poto long en na wokim planti kopi long dispela piksa bilong tilim long ol man? Bai yu wokim ol narapela naip long kain kain sais i luk wankain olsem dispela naip? Na bai yu wokim sampela bilong ol i kamap olsem nekles samting? O bai yu wokim planti bilong dispela naip na salim long ol pren na wanblut bilong yu na bai ol i ken onaim? Ating bai yu no inap tru long mekim kain pasin olsem, a? Tasol ol man i mekim ol dispela samting long diwai kros!
Pasin bilong mekim wok long kros long lotu em i wankain long pasin bilong mekim wok long ol imis long lotu, em wanpela pasin Baibel i tambuim. (Kisim Bek 20:2-5; Lo 4:25, 26) Aposel Jon i kamapim klia bilip bilong lotu Kristen tru taim em i mekim dispela tok long ol wanbilip Kristen bilong em olsem: “Yupela i mas i stap longwe long olgeta giaman god.” (1 Jon 5:21) Ol Kristen tru i bin mekim olsem maski dispela i makim olsem ol i mas i dai insait long stediam bilong ol Rom.
Tasol ol Kristen long taim bilong ol aposel i save tingim indai bilong Jisas olsem ofa. Olsem tasol long nau, ol Kristen tru i save i no stret long lotuim samting Jisas i bin kisim bikpela pen na i dai long en, tasol ol i save tingim indai bilong Jisas olsem rot bilong God long kisim bek ol man long sin. (Matyu 20:28) Dispela bikpela pasin laikim bilong God bai kamapim ol blesing long ol man i laikim tok i tru, na ol bai kisim laip i stap oltaim tu.—Jon 17:3; KTH 21:3, 4.
[Piksa long pes 20]
Sampela piksa bilong bipo i soim pasin bilong ol Rom long nilim man long wanpela hap diwai o pos bilong kilim em i dai
[Kredit Lain]
Rare Books Division, The New York Public Library, Astor, Lenox and Tilden Foundations