Ol Yangpela i Laik Save . . .
Bilong Wanem Mi Mas Rit?
“Mi save les hariap long rit. Mi save amamas long lukim TV.”—Margarita, 13, Rasia.
“Sapos mi mas makim wanem samting mi bai mekim, olsem pilai basketbal o ritim wanpela buk, mi bai pilai basketbal.”—Oscar, 19, Amerika.
SAPOS yu bin rit i kam inap long dispela sentens, ating yu bai luksave olsem pasin bilong rit em wanpela bikpela samting yu mas lainim. Maski i olsem, ating yu bai ting pasin bilong ritim wanpela buk o magasin i wankain long pasin bilong kisim marasin. Yu save olsem em bai helpim yu, tasol yu no laik kisim.
Nius Kirap! i toktok wantaim ol yangpela long 11-pela kantri bilong painimaut tingting bilong ol long wanem samting i mekim na i hatwok long rit, na wanem ol gutpela samting ol i save kisim taim ol i rit. Dispela em ol tok ol i mekim.
Bilong wanem yu pilim olsem i hatwok long rit?
“Mi no gat taim long rit.”—Semsihan, 19, Jemani.
“Pasin bilong rit em bikpela wok tumas. Ating mi wanpela lesman.”—Ezekiel, 19, Filipins.
“Mi no laik ol i subim mi long ritim ol stori i no kirapim tingting.”—Christian, 15, Inglan.
“Sapos buk em i liklik, ating mi bai amamas long ritim. Tasol sapos buk i bikpela, mi pilim em hatwok tumas long ritim.”—Eriko, 18, Japan.
“Ol narapela samting i save pulim tingting bilong mi. Na tingting bilong mi i save wokabaut.”—Francisco, 13, Saut Afrika.
Ol yangpela Kristen i mas ritim Baibel. (Song 1:1-3) Yu ting i hatwok long mekim olsem? Sapos olsem, wai na yu ting olsem?
“Baibel em i bikpela buk! Mi ting mi no inap ritim Baibel olgeta long laip bilong mi!”—Anna, 13, Rasia.
“Sampela hap bilong Baibel i hatwok long kliagut long en na i no givim amamas long mi.”—Jezreel, 11, India.
“Mi pilim i hatwok long ritim Baibel long olgeta taim, long wanem, mi no gat gutpela sediul.”—Elsa, 19, Inglan.
“Mi hatwok long ritim Baibel, long wanem, mi gat planti wok bilong haus na ol homwok bilong skul long mekim na dispela i pulim bikpela haptaim bilong mi.”—Zurisadai, 14, Meksiko.
“Mi pilim olsem mi no inap ritim Baibel, long wanem, mi save lusim bikpela haptaim long mekim ol samting mi save laikim.”—Sho, 14, Japan.
Tru, pasin bilong rit em i hatwok. Tasol yu ting gutpela samting inap kamap sapos yu wok strong long rit? Pasin bilong rit i bin helpim yu olsem wanem?
“Pasin bilong rit i helpim mi long kisim sampela save moa, na dispela i mekim na mi no pret taim mi toktok wantaim ol man.”—Monisha, 14, India.
“Pasin bilong rit i helpim mi long i stap isi na mi no tingting tumas long ol hevi bilong mi.”—Alison, 17, Australia.
“Taim mi rit, mi piksaim long tingting olsem mi stap long ol ples mi no inap go lukim.”—Duane, 19, Saut Afrika.
“Pasin bilong rit i helpim mi long mi yet i ken kisim save long ol samting, na mi no wet long ol narapela i mas tokim mi.”—Abihú, 16, Meksiko.
Wanem samting i bin helpim yu long amamas long rit?
“Kirap long taim mi liklik yet, papamama bilong mi i bin kirapim mi long rit long maus.”—Tanya, 18, India.
“Papamama bilong mi i kirapim mi long wokim tingting taim mi rit, olsem piksaim long tingting ol samting i kamap.”—Daniel, 18, Inglan.
“Papa bilong mi i tokim mi long kirap ritim ol buk bilong Baibel em mi save amamas long ritim, olsem Buk Song na Buk Sindaun. Nau mi save amamas long ritim Baibel, na mi no pilim olsem em wanpela hevi.”—Charene, 16, Saut Afrika.
“Taim mi gat 4-pela krismas, papamama bilong mi i givim mi wanpela tebol na bukself i gat olgeta buk ol i bin bungim bilong mi kirap long taim mama i karim mi.”—Airi, 14, Japan.
Bilong wanem yu ting em i bikpela samting long ritim Baibel?
“Ol manmeri i gat kain kain tingting long Baibel em ol dispela tingting i no stret. I gutpela moa sapos yu yet i skelim ol dispela samting i tru o nogat.” (Aposel 17:11)—Matthew, 15, Amerika.
“Bilong kliagut long tok bilong Baibel, yu mas tingting gut long ol tok bilong en. Taim mi ritim Baibel, dispela i helpim mi na mi no pret long kamapim klia tingting bilong mi taim mi toktok wantaim ol narapela long ol bilip bilong mi.” (1 Timoti 4:13)—Jane, 19, Inglan.
“Taim mi ritim Baibel, mi pilim olsem Jehova i toktok stret long mi. Sampela taim mi save pilim tru long bel ol tok mi ritim.” (Hibru 4:12)—Obadiah, 15, India.
“Mi wok long kisim amamas long ritim Baibel, long wanem, Baibel i soim Jehova i gat wanem tingting long mi na Baibel i givim ol gutpela tok long mi.” (Aisaia 48:17, 18)—Viktoriya, 14, Rasia.
Yu save makim wanem taim bilong ritim Baibel na ol buk na nius bilong Baibel?
“Mi gat wanpela sediul. Namba wan samting long olgeta moning mi save ritim wanpela sapta bilong Baibel.”—Lais, 17, Brasil.
“Mi save ritim Baibel na ol narapela buk bilong Baibel long taim mi raun long tren bilong i go long skul. Inap 4-pela yia nau mi bin mekim olsem.”—Taichi, 19, Japan.
“Mi save ritim sampela pes bilong Baibel long olgeta nait paslain long mi slip.”—Maria, 15, Rasia.
“Long olgeta de mi save ritim 4-pela pes bilong ‘Wastaua’ o ‘Kirap!’ Long dispela rot mi save ritim wanpela magasin olgeta paslain long nupela magasin i kam.”—Eriko, 18, Japan.
“Mi save ritim Baibel long olgeta moning paslain long mi go long skul.”—James, 17, Inglan.
Olsem ol tok antap i kamapim, pasin bilong rit inap helpim yu na yu no pret long mekim ol samting, na i helpim yu long kisim sampela save moa. Pasin bilong ritim Baibel na ol buk na nius bilong Baibel, na dispela magasin tu, bai helpim yu long “go klostu tru long God.” (Jems 4:8) Olsem na maski yu pilim olsem i hatwok long rit, no ken givap.
SAMTING BILONG TINGIM
◼ Bilong wanem em i bikpela samting long yu mas ritim Baibel?
◼ Olsem wanem yu ken makim haptaim bilong ritim Baibel na ol buk na nius bilong Baibel?—Efesus 5:15, 16.
[Blok long pes 24]
SKELIM WANTAIM
Skelim tok yu ritim wantaim ol samting bilong yu yet em yu save pinis long en na ol samting long ples yu stap long en. Givim ol dispela askim long yu yet:
◼ Skelim Tok Wantaim Tok Yu Ritim Pinis Olsem wanem? Ol hevi na ol narapela samting buk o magasin i stori long en i wankain olsem ol narapela buk o magasin mi bin ritim pinis i stori long en? Ol manmeri insait long buk i gat wankain pasin olsem ol narapela manmeri mi bin kisim save long ol?
◼ Skelim Tok Wantaim Yu Yet Olsem wanem dispela stori i stret long i stap bilong mi, pasin bilong ples, na ol hevi mi karim? Mi inap mekim wok long dispela tok bilong helpim mi yet long karim ol hevi o bilong mekim i stap bilong mi i kamap gutpela?
◼ Skelim Tok Wantaim Ples Yu Sindaun Long En Dispela stori i skulim mi long wanem ol samting bilong graun, ol diwai na wara samting, pasin bilong ol narapela kantri, o ol hevi long i stap bilong ol man? Dispela stori i givim wanem save long mi long Man Bilong Wokim olgeta samting?