Baibel i Tok Wanem?
Wanem Taim i Stret Long Pait Bilong Lukautim Yu Yet?
WANPELA nois i kirapim yu long biknait. Yu harim man i wokabaut. Wanpela raskol i stap insait long haus bilong yu. Pret i kisim yu na klok bilong yu i pairap strong na yu no save bai yu mekim wanem nau.
Kain hevi olsem inap painim yumi olgeta. Pasin raskol—pasin bilong bagarapim man—i no kamap long sampela kantri o ol bikpela siti tasol, nogat. Ol man i pret, olsem na sampela i baim ol gan samting o ol i lain long kung fu samting bilong lukautim ol yet long ol raskol. Sampela gavman i kamapim ol lo i orait long ol sitisen i ken kilim i dai ol man i laik bagarapim ol. Tasol Baibel i tok wanem? I stret long pait bilong lukautim yu yet o famili bilong yu?
God i Save Heitim Pasin Bilong Pait
Baibel i no orait long pasin bilong pait na long ol man i save mekim pait bilong bagarapim ol arapela. Devit, em man bilong raitim song, i tok long God Jehova olsem: “Em i heitim tru ol man i laikim pasin pait.” (Song 11:5, NW ) God i bin tokaut long strafe em bai givim long sampela lain bilong bipo, na lain pipel bilong em yet tu, bikos ol i pait na kilim i dai ol man. (Joel 3:19; Nahum 3:1) Sapos eksiden i mekim na man i dai, dispela tu em i bikpela rong long Lo Bilong Moses.—Lo 22:8.
Bilong abrusim ol kros pait samting Baibel i strongim ol man long bihainim pasin bilong sindaun gut na stap bel isi wantaim olgeta man. Ol hatpela tok em i as na planti pait i kamap. Baibel i tok: “Sapos ol i no putim paiawut long paia, bai paia i dai. Na sapos ol man i no tok baksait, bai olgeta tok kros i pinis.” (Sindaun 26:20) Pasin bilong i stap isi i save mekim i dai kros na i pasim pait. Aposel Pol i tok: “Yupela yet i no ken tingting long kros na pait. Oltaim yupela i mas painim rot bilong i stap wanbel wantaim olgeta man.”—Rom 12:18.
Taim Man i Laik Bagarapim Yu
Ating yu save wok strong long i stap wanbel wantaim ol arapela, tasol dispela i no makim olsem ol man i no inap traim long bagarapim yu, nogat. Ol man i bin mekim nogut long ol gutpela wokboi bilong God kirap long bipo na i kam inap long nau. (Stat 4:8; Jop 1:14, 15, 17) Sapos raskol i holim naip o gan samting na i laik hansapim yu, orait yu mas mekim wanem? Jisas i tok: “No ken bekim rong long man i mekim nogut long yupela.” (Matyu 5:39) Na tu, em i tok: “Sapos wanpela man i pulim saket bilong yu, orait yu mas larim em i kisim siot bilong yu tu.” (Luk 6:29) Jisas i no orait long pait bilong lukautim ol mani kago samting. Sapos raskol i holim gan samting na i laik stilim samting, orait man i gat save bai i no pait bilong holimpas mani kago bilong em. Laip em i bikpela samting tru, winim mani kago.
Tasol olsem wanem sapos raskol i laik kilim yu i dai? Wanpela lo God i bin givim long ol Israel bilong bipo inap givim tingting long yumi. Sapos stilman i stilim samting long san na papa bilong haus i kilim em i dai, orait lo i tok papa bilong haus i gat asua long kilim man i dai. As bilong dispela em bikos lo i no makim indai olsem strafe bilong stilim samting, na man i stilim samting long san yu inap luksave long em na kotim em. Tasol sapos raskol i kam long nait na papa bilong haus i kilim em i dai, orait papa bilong haus i no gat asua, bikos long nait em i hatwok long luksave long samting raskol i laik mekim. Papa bilong haus inap kisim tingting olsem raskol i laik bagarapim famili bilong em na papa inap mekim samting bilong lukautim famili.—Kisim Bek 22:2, 3.
Olsem na Baibel i orait long man i pait bilong lukautim em yet na famili bilong em sapos narapela i laik bagarapim ol. Em inap sakim han bilong raskol, holim em, o paitim em bilong stopim em long bagarapim em. As na em i mekim olsem em bilong stopim raskol long bagarapim em. Long kain taim olsem sapos raskol i kisim bikpela bagarap o em i dai, orait i dai bilong em i wanpela eksiden, olsem samting em i no min long mekim.
Nambawan Samting Bilong Lukautim Yu
Samting i klia i olsem: Sampela taim i stret yumi ken pait bilong lukautim yumi yet. Ol manmeri i gat rait long lukautim ol yet na famili bilong ol long ol man i laik bagarapim o kilim ol i dai. Taim yumi no gat rot long ranawe, Baibel i no gat tok long yumi pait bilong lukautim yumi yet. Tasol em i savetingting long traim bes bilong yumi long abrusim ol samting we pait inap kamap.—Sindaun 16:32.
Baibel i tokim yumi long “wok long kamap wanbel wantaim ol arapela manmeri, na . . . strong long bihainim dispela pasin” long olgeta samting yumi mekim. (1 Pita 3:11) Dispela em i gutpela tok bilong helpim yumi long i stap bel isi.
YU LAIK SAVE?
◼ Bilong wanem yumi mas abrusim pasin bilong pait?—Song 11:5, NW.
◼ Em i savetingting long mekim wanem taim ol raskol i laik stilim mani kago samting?—Sindaun 16:32; Luk 12:15.
◼ Yumi mas i gat wanem kain tingting long pasin bilong kros pait na dispela inap helpim yumi long abrusim taim nogut?—Rom 12:18.
[Rait long pes 11]
Baibel i orait long man i pait bilong lukautim em yet na famili bilong em sapos narapela i laik bagarapim ol