Kirap! I Seivim Laip Bilong Pikinini i Stap Long Bel

● Wanpela meri Meksiko, nem bilong em, Anita, i gat 3-pela pikinini na em i kisim bel gen.a Em i tokim man bilong em olsem em i no laikim narapela pikinini moa na em bai mekim olgeta kain samting em inap mekim bilong rausim bel. Na em i tok tu olsem em bai kilim em yet i dai! Long dispela taim, Anita i wok long stadi long Baibel wantaim wanpela Witnes Bilong Jehova, tasol pasin bilong em i no senis tumas. Em i tok: “Mi gat pasin antap.”

Witnes husat i stadi wantaim Anita i kamapim klia ol bikpela stiatok bilong Baibel. Em i kamapim long Anita olsem laip bilong pikinini i stap yet long bel bilong mama, em samting i dia tumas long ai bilong God. Long taim bilong ol Israel long bipo, sapos wanpela man i paitim wanpela bel mama na mama o pikinini i stap long bel em i dai, orait Lo Bilong God i tok dispela man em i wanpela kilman. (Kisim Bek 21:​22, 23)b Tasol Anita i no tingim tumas dispela tok. Em i wokim pinis tingting bilong em.

Anita i tok: “Wanpela i bin tokim mi olsem, sapos mi kisim sut bilong wanpela kain marasin, dispela marasin bai rausim bel. Olsem na mi baim dispela marasin na mi askim wanpela pren long givim sut bilong dispela marasin long mi. Em i mekim, tasol no gat wanpela samting i kamap. Bihain mi kisim save olsem dispela pren i no laik kisim asua long dispela samting, olsem na long pasin hait, em i putim wara nating insait long sut.”

Maski i olsem, Anita i wok strong long painim narapela rot. Long namba 4 mun, em i painim wanpela dokta husat i orait long rausim bel. Sikspela de paslain long em i go lukim dokta, dispela Witnes i givim em wanpela nius Kirap! bilong Novemba 8, 1980, i gat wanpela stori olsem, “Stori Bilong Pikinini i Stap Yet Long Bel Bilong Mama.” Long pinis bilong dispela stori, i gat dispela tok: “Tude mama i rausim mi long bel. Em i kilim mi i dai.” Anita i kirap nogut tru long dispela tok, na em i krai nogut tru inap sampela aua. Em i tok: “Nau, dispela stori i opim tru ai bilong mi.”

Anita i karim wanpela helti bebi gel. Anita i tok: “Long nau, gutpela samting i painim mi, mi kisim save long Jehova, na mi laikim em tru long bel olgeta bilong mi.” Na tu, em i skulim pikinini gel bilong em long Tok Bilong God bambai em tu i ken kisim pasin bilong laikim tru Jehova. Pikinini gel bilong em i save tok olsem em i tenkyu long God olsem em i stap laip​—long wanem, namba wan, God em i As bilong laip, na namba tu, ol tok bilong God i stap long Baibel em nius Kirap! i kamapim, dispela i bin seivim laip bilong em.

[Ol Futnot]