Strongim Tingting Bilong Yu Long Lusim Smok
“Strongpela tingting long lusim smok em i nambawan bikpela pasin bilong helpim ol man long lusim smok olgeta.”—Buk “Stop Smoking Now!”
SAPOS yu laik lusim smok, yu mas i gat strongpela tingting long bel long mekim olsem. Olsem wanem yu ken strongim dispela tingting? Wanpela samting, em yu ken tingting olsem sapos yu lusim smok dispela bai helpim yu long planti samting.
Yu bai seivim mani. Sapos yu save baim wanpela paket sigaret long olgeta de bai yu tromoi planti tausen kina long wanpela yia. “Mi no bin ting mi save tromoi bikpela mani tru long smok.”—Gyanu, bilong Nepal.
Bai yu stap amamas moa. “Taim mi lusim smok, i stap bilong mi i kamap gutpela na gutpela moa.” (Regina, bilong Saut Afrika) Taim ol man i lusim smok, ol inap testim swit bilong kaikai, smelim gut ol samting, na ol i gat strong moa long mekim wok, na lukluk bilong ol i kamap gutpela moa.
Helt bilong yu inap kamap gutpela. “Taim ol man o meri i lusim smok, maski ol i gat hamas krismas, kwiktaim dispela bai helpim helt bilong ol long kamap gutpela.”—Lain U.S. Centers for Disease Control and Prevention.
Bai yu amamas long yu yet. “Mi lusim smok, long wanem, mi no laik bai smok i kamap bosman bilong mi. Mi laik bosim skin bilong mi yet.”—Henning, bilong Denmak.
Dispela bai helpim famili na ol pren bilong yu. “Pasin bilong smok . . . i save nogutim helt bilong ol narapela i stap klostu long yu. . . . Sampela wok painimaut i kamapim olsem pasin bilong pulim smok i stap long win, dispela i mekim na planti tausen manmeri i save dai long olgeta yia long sik kensa bilong waitlewa na sik bilong klok.”—Lain American Cancer Society.
Man Bilong Wokim yu bai amamas long yu. “Ol brata tru bilong mi, . . . yumi mas rausim olgeta pasin doti bilong bodi.” (2 Korin 7:1) “Yupela i mas givim bodi bilong yupela long God . . . na bai yupela i mekim ol pasin God i laikim.”—Rom 12:1.
“Taim mi kisim save olsem God i no orait long ol samting i mekim doti bodi bilong yumi, mi pasim tok long bel olsem mi bai lusim smok.”—Sylvia, bilong Spen.
Tasol sampela taim strongpela tingting bilong bel i no inap. Ating yumi mas kisim helpim tu long ol narapela, olsem famili na ol pren. Ol inap mekim wanem?