Wanpela Loya i Skelim Ol Witnes Bilong Jehova

LES Civin, em wanpela loya na dairekta bilong wanpela ofis bilong ol loya long Saut Afrika, em i tok olsem: “Mi bin i gat liklik save tasol long ol Witnes Bilong Jehova.” Bilong wanem em i kirap skelim ol bilip bilong ol Witnes? Em i kisim wanem tingting long ol dispela bilip? Daunbilo i gat ol tok em i mekim long nius Kirap!

Yu kamap bikpela insait long wanem lotu?

Mi kamap bikpela insait long lotu Juda, tasol long 1972 samting, mi maritim Carol husat i wanpela Angliken. Em i no gat intres long lotu, na lotu i no bin stiaim laip bilong mipela long dispela taim. Tasol taim pikinini man bilong mipela Andrew i gat 8-pela krismas, Carol i pilim olsem mipela i mas givim sampela skul long em long sait bilong lotu. Wanpela tisa bilong lotu Juda i tokim mi olsem sapos Carol i joinim lotu Juda, orait Andrew bai kamap wanpela Juda na em i ken insait long Bar Mitzvah (em wanpela lotu bung ol Juda i save mekim long ol pikinini man taim ol i kamap bikpela) taim em i gat 13 krismas. Olsem na mipela i kirap long i go long ol klas bilong skulim ol man long lotu long haus lotu bilong ol Juda.

Olsem wanem yu bin bungim ol Witnes Bilong Jehova?

Taim ol Witnes i kam long haus bilong mipela, oltaim mi save katim tok bilong ol hariap. Mi save tokim ol: “Mi wanpela Juda na mi no bilip long Nupela Testamen.” Carol i tokim mi olsem wanpela pren bilong em, em wanpela Witnes na em i save gut long ol tok bilong Baibel. Carol i tok i gutpela sapos mipela i kisim sampela save moa long Baibel. Olsem na mi orait long stadi wantaim ol Witnes, maski mi no bin amamas long mekim olsem.

Yu kisim wanem tingting taim yu stadi long Baibel?

Mi laik daunim ol Witnes. Long taim mi go long ol klas bilong lotu Juda, mi bilip strong gen long ol bilip bilong ol Juda, na mi ting mi insait long lain bilong God stret. Mi tingting: ‘Ol Witnes inap lainim mi long wanem samting?’ Long namba wan taim mipela i stori, mi tokim Witnes husat i kam long haus bilong mipela, olsem: “Mi bon olsem wanpela Juda. Mi amamas long lotu mi stap long en, na mi bai dai olsem wanpela Juda. Tok bilong yu i no inap senisim tingting bilong mi.” Long gutpela pasin, Witnes i tok em i pilim tingting bilong mi. Long ol Fraide na Mande nait, mipela i save go long ol klas bilong skulim ol man long lotu Juda, na long ol Sande moning (sapos mi no painim rot bilong abrusim stadi) mipela i save stadi wantaim ol Witnes. Baibel stadi ol Witnes i mekim i no gat pe bilong en, tasol ol klas long haus lotu bilong ol Juda i gat pe bilong en.

Mi yusim Baibel Juda bilong mi, long wanem, mi ting ol Witnes i yusim wanpela Baibel i sapotim bilip bilong ol. Tasol mi kirap nogut long lukim olsem tok bilong tupela Baibel i wankain. Dispela i kirapim mi long strong moa long soim olsem ol Witnes i no gat save.

Bihain long mipela i bin go long sampela klas bilong tisa bilong lotu Juda, Carol i tokim mi olsem em i ting dispela tisa i no gat gutpela save long Baibel. Na em i tok tu olsem em bai no go moa long ol dispela klas, na em bai no tok olsem Jisas i no Krais. Bel bilong mi i bagarap stret, na mi tingting long katim marit bilong mipela. Tasol taim bel bilong mi i kol, mi tingting long mekim narapela samting​—⁠mi bai yusim save bilong mi olsem wanpela loya long soim Carol olsem dispela longlong lotu bilong ol Witnes i no trupela lotu.

Yu bin mekim olsem?

Wanpela tisa bilong lotu Juda i givim mi wanpela buk ol i bin raitim bilong soim olsem Jisas i no truim ol tok profet bilong Mesaia. Inap 18 mun, mitupela Carol i stadi long dispela buk. Na tu, long olgeta wik mipela i stadi yet wantaim ol Witnes. Tasol taim mipela i skelim olgeta wan wan tok profet long buk bilong tisa bilong lotu Juda, mi kirap tingting planti. Ol tok profet bilong Mesaia long Baibel i makim wanpela man tasol, em Jisas Krais. Tasol ol tok bilong dispela buk i narapela kain. Tingting bilong mi i kirap tru taim mipela i stadi long tok profet i stap long Daniel 9:​24-27, em dispela tok profet i tok Mesaia bai kamap long yia 29 C.E.a Witnes i bringim wanpela Baibel Hibru i gat tok Inglis aninit long olgeta wan wan tok Hibru. Mi sekim ol tok, mi yet mi kaunim na bungim ol yia wantaim, na mi tok: “Orait, tok profet i makim yia 29 C.E. So?”

Witnes i tok: “Em yia Jisas i kisim baptais long en.”

Mi no gat toktok! Mi kirap nogut tu long lukim olsem ol tok profet bilong Baibel i save kamap tru na ol i stret wantaim.

Ol pren bilong yu i ting wanem taim yu senisim bilip bilong yu?

Sampela i tingting planti na ol i tok ol bai wokim rot na bai mi na meri bilong mi i ken bungim sampela lain husat inap soim mipela olsem ol Witnes i paulim tingting bilong mipela. Tasol mipela i bin mekim wok painimaut na skelim gut ol tok mipela i bilip long en​—⁠olsem na tingting bilong mipela i no paul.

Wanem samting i mekim na yu kamap wanpela Witnes?

Pastaim mi kirap long go long sampela miting long Haus Kingdom wantaim meri bilong mi, em long dispela taim em i kamap wanpela Witnes pinis.b Mi pilim tru gutpela pasin pren bilong ol Witnes na pasin bilong ol long laikim narapela narapela, maski ol i bilong wanem lain na skin. Mi no bin lukim dispela kain pasin long lotu bilong mi. Olsem na bihain long mi stadi 3-pela yia moa, mi kisim baptais.

Yu pilim olsem wanem long disisen bilong yu long kamap wanpela Witnes?

Em i wanpela gutpela samting tru long mi inap tok olsem, “Mi wanpela Witnes Bilong Jehova.” Tasol taim mi tingim pasin bilong mi long daunim tok i tru, mi pilim olsem mi no gutpela man inap long mi ken kisim ol gutpela samting bilong spirit em Jehova i bin givim long mi. Mi no inap tru long bel hevi long disisen mi bin mekim.

Yu bin kisim wanem ol blesing?

Planti. Wanpela blesing mi kisim, em mi inap mekim wok olsem wanpela elda, olsem mekim wok wasman na tisa long kongrigesen bilong mipela. Na tu, mi inap helpim Dipatmen Bilong Lo long brens ofis bilong ol Witnes Bilong Jehova long Saut Afrika. Tasol nambawan gutpela blesing em olsem, mi save long Jehova na Pikinini bilong em na mi luksave long taim yumi stap long en na ol bikpela samting i wok long kamap long graun.

[Ol Futnot]

[Rait long pes 11]

Mi kirap nogut . . . long lukim olsem ol tok profet bilong Baibel i save kamap tru na ol i stret wantaim