“Wanpela Tasol Bilong Ol Planti Man Em Yu Bin Helpim Ol”
LONG Janueri 1996, Carol i bin sik, em i gat buk nogut long kru. Em i gat 60 krismas samting na inap long dispela taim em i strongpela meri na meri bilong amamas, na em i save mekim ol gutpela tok long olgeta man. Tasol nau ol dokta i wok strong long rausim dispela buk nogut i save kilim man i dai. Taim Carol i gat dispela hevi, em i kisim dispela pas i stap daunbilo:
“Yes Carol:
“Mi sori tru long yu gat dispela sik. Gutpela tru, yumi gat dispela gutpela samting yumi ken wetim em Baibel i helpim yumi long laikim na save long en. Yumi wetim Kingdom bilong Jehova long bosim dispela graun na bai yumi ken i stap long wanpela paradais, em dispela taim yumi olgeta i wetim.
“Mi laik yu mas save olsem wok bilong yu long autim tok i bin helpim planti man long abrusim indai bilong oltaim oltaim. Mi wanpela bilong ol dispela lain. Mi no save yu inap tingim yet namba wan taim yumi bin bung. Long dispela taim mi gat 20 krismas. Mi gat longpela gras, mi wok long salim ol drak, na mi wok long raun raun nabaut wantaim ol narapela bikhet manki. Mipela olgeta i karim ol gan na mipela i no laikim ol narapela—mipela i laikim mipela yet tasol.
“Yu bin paitim dua bilong mi wantaim narapela Witnes na soim Wastaua na Kirap! long mi. Mi laik givim mani long yu na mi tok olsem mi no laik kisim ol nius. Yu bin tokim mi olsem yupela i no raun bilong kisim mani. Yu bin tokim mi olsem yupela i mekim wanpela wok bilong helpim ol man long kaunim Baibel. Mi no inap tingim mi bin kisim ol nius o kaunim ol. Tasol yu bin planim pikinini kaikai bilong tok i tru long bel bilong mi.
“Sampela yia bihain narapela Witnes, em Gary, em i kam long haus bilong mama bilong mi taim mi bin i stap. Mi tokim em long yu bin kam lukim mi sampela yia bipo. Gary i stadi long Baibel wantaim mi longtaim tru inap long mi kisim baptais long 1984. Nau mi wok long skulim ol pikinini bilong mi long tok i tru bilong Kingdom bilong God.
“Mi save olsem mi wanpela tasol bilong ol planti man em yu bin helpim ol long ol dispela yia yu bin stap gut long dispela wok. Tasol, long dispela pasin bilong laikim tru ol man, yu bin helpim mi na famili bilong mi long kisim save long Bikpela God, em Jehova, na pikinini bilong em, Krais Jisas. Mi wet long dispela de mi ken lukim yu long nupela taim, taim Jehova i mekim drai wara i stap long ai bilong yumi, na ol manmeri bai i no i dai moa.—KTH 21:4.
“Mi na famili bilong mi, mipela i amamas tru olsem mipela i bin save long yu na mipela tu i insait long dispela wok yu bin mekim bilong autim tok. Tenkyu.
“Mi salim sori Kristen,
Peter”
Inap sikspela mun Carol i bin sik na bihain em i dai long Mas 1996. Em i bin wok strong long autim tok inap 35 yia na em i bin planim planti pikinini kaikai bilong tok i tru. Em i kisim save olsem yumi no save wanem taim bai wanpela pikinini kaikai i karim kaikai—sampela taim em sampela yia bihain.—Matyu 13:23.