God i Mekim Gut Bel Bilong Mi Taim Hevi i Painim Mi

Stori bilong Victoria Colloy

Wanpela dokta i tokim Mama: “Mipela i no inap mekim wanpela samting moa bilong helpim pikinini meri bilong yu. Em i mas yusim stik wokabaut na pasim ain bilong strongim lek.” Taim mi harim dispela tok, bel bilong mi i bagarap stret! Mi no inap mekim wanpela samting sapos mi no inap wokabaut.

MAMA i karim mi long Novemba 17, 1949, long taun Tapachula, Chiapas, long Meksiko. Mi wanpela helti bebi, na mi fesbon, na bihain long mi i gat tripela narapela bratasusa. Tasol taim mi gat sikspela mun, mi stop long krol na mi no inap long muvim tumas hanlek bilong mi. Tupela mun bihain mi stop olgeta long muvim hanlek bilong mi. Ol dokta i kirap nogut, long wanem, wankain hevi i painim tu ol narapela bebi long Tapachula. Olsem na wanpela dokta bilong bun i kam long Meksiko bilong skelim sik bilong mipela. Dokta i painimaut olsem mipela i gat sik polio.

Taim mi gat tripela krismas, mi kisim operesen long hips bilong mi, na long ol skru bilong tupela lek. Bihain, sol long han sut bilong mi i bagarap tru. Taim mi gat sikspela krismas, ol i kisim mi i go long wanpela haus sik bilong ol pikinini long Mexico City. Mama i save wok long wanpela fam long Chiapas, olsem na mi stap wantaim bubu meri bilong mi long Mexico City. Tasol klostu olgeta taim mi stap long haus sik.

Taim mi gat 8-pela krismas, mi kamap orait liklik. Tasol bihain, isi isi mi no inap mekim wok moa long hanlek bilong mi. Olsem na ol dokta i tok long laip olgeta bilong mi, mi mas yusim stik wokabaut na pasim ain bilong strongim lek.

I go inap long taim mi gat 15 krismas, mi bin kisim pinis 25 operesen. Ol i wokim ol dispela operesen long bun bilong baksait bilong mi, long tupela lek, long skru bilong lek long antap na daunbilo, na long ol pinga bilong lek. Bihain long olgeta wan wan operesen, inap sampela hap taim mi mas eksasaisim ol hanlek bilong mi. Bihain long wanpela bilong ol dispela operesen, ol i putim simen long 2-pela lek bilong mi. Taim ol i rausim simen, mi mas wokim ol eksasais we i givim bikpela pen long mi.

Samting i Mekim Gut Tru Bel Bilong Mi

Taim mi gat 11-pela krismas, Mama i kam lukim mi bihain long taim mi kisim wanpela operesen. Em i bin kisim save olsem Jisas i bin oraitim ol sikman, na tu, Jisas i bin oraitim wanpela paralais man na em inap wokabaut gen. Mama i bin kisim dispela save long rot bilong nius Wastaua, em nius ol Witnes Bilong Jehova i wokim. Mama i givim mi wanpela bilong dispela nius, na mi haitim aninit long pilo bilong mi, tasol bihain nius i no stap moa. Ol nes i bin painim dispela nius na ol i bin kisim. Ol i krosim mi, long wanem, mi bin ritim dispela nius.

Wanpela yia bihain, Mama i lusim Chiapas na i kam gen bilong lukim mi. Long dispela taim em i wok long stadi long Baibel wantaim ol Witnes. Em i bringim buk From Paradise Lost to Paradise Regaineda na givim long mi. Mama i tok, “Sapos yu laik stap long nupela taim we Jisas bai oraitim yu, yu mas stadi long Baibel.” Olsem na taim mi gat 14 krismas samting mi kirap stadi wantaim ol Witnes maski bubu meri i no laik bai mi mekim olsem. Long yia bihain, mi mas lusim haus sik, long wanem, mi kamap bikpela pinis. Dispela haus sik i bilong ol liklik pikinini tasol.

Mi Karim Ol Hevi

Mi bel hevi nogut tru. Bubu meri bilong mi i birua long mi, olsem na mi mas go bek gen long Chiapas na stap wantaim papamama bilong mi. Tasol long haus tu i gat ol hevi, long wanem, papa em man bilong dring oltaim. Inap sampela haptaim mi pilim olsem i no gat as long mi stap laip. Mi tingting long dring posin. Tasol taim mi wok yet long stadi long Baibel i go, tingting bilong mi i senis. Tok promis bilong Baibel long graun bai kamap Paradais i givim bikpela amamas long mi.

Mi kirap long tokim ol narapela long ol gutpela tok promis i stap long Baibel. (Aisaia 2:4; 9:​6, 7; 11:​6-9; KTH 21:​3, 4) Long Me 8, 1968, taim mi gat 18 krismas, mi kisim baptais na kamap wanpela Witnes Bilong Jehova. Kirap long 1974, long olgeta wan wan mun mi save lusim bikpela hap taim, winim 70 aua, long toktok wantaim ol man long ol gutpela tok promis bilong Baibel​—⁠em ol tok promis we i save helpim mi long i stap amamas.

Mi Amamas Long Laip Bilong Mi

Bihain, mitupela Mama i go sindaun long taun Tijuana, klostu long boda namel long Meksiko na Amerika. Mitupela Mama i stap long wanpela haus i stret long sindaun bilong mitupela. Insait long haus, mi inap wokabaut wantaim ain i stap long lek na holim stik wokabaut. Na mi save sindaun long wilsia na kukim kaikai na wasim na ainim ol klos. Taim mi laik i go autim tok bilong God, mi save draivim wanpela liklik ka i ron long pawa.

Na taim mi bungim ol man long strit na long haus bilong ol, mi save toktok wantaim ol long tok bilong Baibel. Na tu, mi save go oltaim long wanpela haus sik i stap klostu na toktok wantaim ol man i wet long kisim marasin. Taim mi pinis long toktok wantaim ol, mi save draivim liklik ka bilong mi i go long maket bilong baim ol samting mipela i nidim na go bek long haus na helpim Mama long kuk na mekim ol wok bilong haus.

Bilong lukautim mitupela Mama long sait bilong mani, mi save salim ol sekenhen klos. Mama i gat 78 krismas na inap 3-pela taim em i kisim hat atek na em i no inap mekim planti wok. Olsem na mi save lukautim em long sait bilong marasin na kaikai. Maski helt bilong mitupela i no gutpela, mitupela i save wok strong long i go long olgeta miting bilong mipela long kongrigesen. Winim 30 manmeri em mi bin stadi wantaim ol long Baibel, nau ol tu i insait long wok bilong autim tok bilong Baibel.

Mi bilip tru olsem dispela tok promis bilong Baibel bai kamap tru long bihain, olsem: “Ol lek nogut bai ol i kalap olsem ol dia.” Tasol long nau dispela tok bilong God i mekim gut bel bilong mi. “Yupela i no ken pret, long wanem, mi God bilong yupela na mi stap wantaim yupela. Bai mi mekim yupela i kamap strong na bai mi helpim yupela. Bai mi was gut long yupela na long bikpela strong bilong mi bai mi daunim ol birua bilong yupela.”​—⁠Aisaia 35:6; 41:10.b

[Ol Futnot]

[Piksa long pes 22]

Mi gat 7-pela krismas taim mi pasim ain bilong strongim lek

[Piksa long pes 23]

Mi save draivim liklik ka taim mi go autim tok bilong Baibel