Ol Narapela Kain Animal Bilong Tasmania

LONG san, ples i stap isi na i no gat nois. Tasol long nait, bai yu harim wanpela kain krai o singaut i kamap long bus na i mekim skin gras bilong yu i sanap. Em krai bilong wanem samting? Em krai bilong wanpela kain animal i gat narakain nem—em Tasmania devil. Taim em i kaikai em i save singaut strong na kros wantaim. Maski lukluk bilong en na singaut bilong en i strong tru, em i no strongpela animal.

Dispela animal i ken kaikai na pinisim wantu bodi bilong ol animal i dai pinis. Em i gat strongpela tit na inap kaikai olgeta kain animal i dai pinis—skin, bun, na olgeta hap bilong bodi. Insait long 30 minit tasol em inap kaikai planti tru, inap olsem 40 pesen, winim hevi bilong bodi bilong en. Taim yumi skelim, em i kain olsem wanpela man i kaikai 25 kilogram abus long wanpela taim tasol!

Narapela naispela animal em ol i kolim wombat, em i sotpela na patpela. Wankain long ol kapul, ol meri wombat i gat paus we bebi i save stap insait long en na dring susu. Tasol paus bilong bebi i feisim mama, na long dispela rot taim mama wombat i digim graun, bebi i stap klin na doti i no pas long bebi. Na tu, tit bilong ol wombat i no save stop long gro—dispela i gutpela, long wanem, ol i save yusim tit bilong ol long brukim ol samting taim ol i digim graun. Maski ol i patpela na i luk olsem skin i no strong, ol i kleva tru na ol inap holim gut kaikai long fran lek bilong ol na putim long maus.

Narapela animal i narakain tru em platipus. Maus na lek bilong en i olsem bilong pato, bodi na gras bilong en i olsem bilong ota—em wanpela animal i save stap long wara—na tel bilong platipus i olsem bilong biva, em wanpela animal i luk olsem bikpela rat. Em i save putim kiau olsem kakaruk, digim hul long graun olsem wombat, na givim susu long ol pikinini bilong em olsem bea i save mekim. Olsem na fes saientis husat i bin skelim dispela animal, em i ting samting dispela animal i mekim i narapela kain na i hatwok long bilipim!

Wai na yumi amamas long ol dispela kain animal? Man Bilong Wokim yumi i laik bai yumi amamas long ol. Baibel i tok, em i bin tokim namba 1 man na meri long ‘bosim olgeta kain animal bilong graun.’ (Stat 1:28) Taim yumi lukim ol kain animal olsem, dispela i save kirapim laik bilong yumi long bihainim dispela tok, a?

[Blok/Piksa long pes 19]

OL TRAIPELA DIWAI

Taim yumi skelim sais o longpela bilong ol samting, yumi kirap nogut long ol diwai bilong Tasmania ol i traipela tru. Ol diwai i longpela tru em ol kumurere (Eucalyptus regnans) bilong ol ples maunten, ol i gat plaua na ol i save gro i go inap 75 mita. Wanpela bilong ol em i longpela tru inap olsem 99.6 mita, tasol em i sot liklik, inap 16 mita, long diwai retwut bilong California, long Amerika. Dispela diwai retwut i longpela tru winim olgeta narapela diwai bilong graun.

Narapela diwai em Huon pain, em i no longpela olsem kumurere bilong ples maunten, tasol em inap i stap longpela taim tru, winim diwai kumurere. Sampela saientis i tok diwai Huon pain inap i stap winim 3,000 yia, olsem na em i winim olgeta narapela diwai bilong graun long stap longpela taim tru. Dispela diwai em spesel diwai, long wanem, timba bilong en i gutpela tru bilong wokim ol tebol, sia samting na sip. Kala bilong em i yelo na em i isi long mekim wok long en, na tu, i gat wanpela kain oil long en we i pasim ol binatang long kaikai timba. Sampela bilong ol dispela diwai i bruk na i stap long bus inap planti handret yia, tasol ol i strong yet inap long ol man i yusim bilong wokim ol samting.

[Piksa long pes 18]

Tasmania devil

[Kredit Lain]

© J & C Sohns/age fotostock

[Piksa long pes 19]

Wombat

[Piksa long pes 19]

Platipus

[Ol Piksa Kredit Lain long pes 19]

Wombat and platypus: Tourism Tasmania; giant tree: Tourism Tasmania and George Apostolidis