NIUS I KAM LONG OLGETA HAP

SPEN

Wanpela man i insait long wok reskiu i lukluk long ol bilding em guria i bagarapim

Wanpela lain saientis i ting olsem wok ol man i mekim i bin kamapim bikpela guria long 2011 long Lorca, long sauten Spen we i bin kilim i dai 9-pela man na planti i kisim bagarap. Ol dispela saientis i painimaut olsem graun i guria bikos ol man i digim graun bilong kisim wara bilong givim long ol gaden samting.

SAINA

Long 2012, ol turis i kam long Saina i tromoi 102 bilion dola bilong Amerika long raun lukim ol narapela kantri. Lain United Nation World Tourism Organization i tok dispela em fes taim ol turis bilong Saina i tromoi bikpela mani olsem we i putim Saina i stap namba 1 winim ol narapela kantri olsem Jemani na Amerika. Ol turis i kam long dispela 2-pela kantri i tromoi olsem 84 bilion dola bilong Amerika long raun lukim ol narapela kantri.

JAPAN

Wanpela nius (BMJ) bilong helt long Briten i kamapim ripot bilong wanpela stadi ol i bin mekim long 68,000 manmeri bilong Japan insait long 23 yia. Ol saveman i painimaut olsem ol meri i bon namel long yia 1920 na 1945 em ol i kirap smok paslain long ol i kamap 20 krismas, ol i save dai 10-pela yia paslain long ol meri i no save smok; na ol man i save dai 8-pela yia paslain long ol man i no save smok.

MAURITANIA

Wanpela plastik beg i trip insait long solwara

Gavman i putim tambu long kisim ol plastik beg i kam insait long kantri, o wokim na yusim bilong lukautim laip bilong ol animal long solwara na long graun em ol inap dai sapos ol i kaikai ol plastik beg. Gavman i kirapim ol man long yusim ol narapela rot we i no inap bagarapim graun.

GRAUN OLGETA

Ol insurens kampani i lusim inap olsem 50 bilion dola bilong Amerika long olgeta yia bikos long ol bikpela disasta em weda i kamapim. Long olgeta 10-pela 10-pela yia kirap long 1981 na i kam, ol insurens kampani i tromoi bikpela mani moa bikos pe bilong ol samting i go antap tru.