NIUS I KAM LONG OLGETA HAP

Ekwado

Long 2007, gavman bilong Ekwado i tokaut olsem ol i laik lukautim klostu 10,000 skwe kilomita bilong bikbus Amason. Dispela bikbus i gat kain kain animal, gras na diwai samting. Olsem na gavman i no laik bai ol man i digim graun long dispela hap bilong kisim oil. Tasol ol i no inap lukautim bikbus Amason, long wanem, ol narapela kantri i no givim mani bilong sapotim dispela wok.

Japan

Wanpela nius (The Japan News) i tok, taim ol man i givim blut long ol haus sik, i hatwok tru long luksave sapos dispela blut i gat sik o vairas long en. Narapela ripot bilong dispela nius i tok, long 2013 wanpela man husat i gat 60 krismas samting i kisim sik HIV long rot bilong kisim blut. Taim man i gat HIV i givim blut, i hatwok long ol dokta i luksave long dispela, long wanem, insait long sampela haptaim dispela vairas i save stap hait.

Simbabwe

Winim 30 yia i go pinis, ol man i pait long gavman long boda bilong Simbabwe na Mosambik. Ol bom ol i bin yusim long dispela taim i stap yet long nau, olsem na ol man i kisim bagarap long bodi na sampela man i dai. Lain International Committee of the Red Cross i tok: “Kirap long 1980, taim ol bom i pairap long boda bilong Simbabwe, winim 1,500 man na 120,000 animal i dai, na tu, 2,000 man i kisim bagarap long bodi.”

Australia

Wanpela wok painimaut i tok, planti marit husat i seperet i save tok pait long husat bai kisim ol animal em ol i lukautim long haus. Na tu, ol i save tok pait long kisim haus, mani, na ol narapela samting em ol i bungim inap planti yia.