Graun Bai Pinis

Dispela tok “graun bai i pinis” i makim wanem samting?

BAIBEL I TOK

God i no amamas long ol pasin bilong dispela graun, olsem na dispela tok “graun” i no makim graun tru bilong yumi, nogat. Em i makim ol manmeri husat i stap longwe long God na ol i kamap birua bilong em. (Jems 4:4) Baibel i tok: “Ol dispela lain bai kisim strafe long kot na bagarap inap oltaim.” (2 Tesalonaika 1:7-9) Tasol ol manmeri husat i bihainim tok bilong Jisas Krais na “i no insait long ol samting bilong dispela graun,” ol bai kisim laip oltaim long bihain.—Jon 15:19.

Tru tumas, long laspela hap bilong 1 Jon 2:17, Baibel i tok: “Man i bihainim tok bilong God, em bai i stap oltaim.” Ol dispela man bai i stap laip oltaim long graun olsem Baibel i tok long Song 37:29, olsem: “Ol stretpela man bai i kisim graun God i givim ol, na bai ol i stap oltaim long en.”

“No ken laikim pasin bilong dispela graun na ol samting bilong dispela graun. Sapos man i laikim pasin bilong dispela graun, pasin bilong laikim Papa i no stap long em.”—1 Jon 2:15.

Hau bai God i pinisim ol man i sakim tok bilong em?

BAIBEL I TOK

Tupela samting i mas kamap paslain long God i pinisim ol man nogut. Namba 1, God bai pinisim olgeta lotu giaman. Baibel i tok olgeta lotu giaman i olsem wanpela pamukmeri, na nem bilong en “Bikpela Babilon.” (Revelesen 17:1-5; 18:8) Em i mekim ol samting bilong soim olsem em i stap gut long God, tasol em i poroman wantaim ol gavman bilong dispela graun. Bihain ol dispela gavman bai birua long en. Baibel i tok: “Ol bai heitim dispela pamukmeri. Na ol bai rausim olgeta samting bilong en na mekim em i stap skin nating. Na ol bai kaikai mit [o mani kago] bilong en, na ol bai kukim em olgeta long paia.”—Revelesen 17:16.

Namba 2, God bai mekim save long “ol king bilong olgeta hap graun,” dispela i makim ol gavman bilong graun. Ol gavman bilong graun na olgeta man nogut bai bagarap “long pait long dispela bikpela de bilong God i Gat Olgeta Strong,” em ol i kolim “Armagedon.”—Revelesen 16:14, 16.

“Yupela ol manmeri i no save bikhet na sakim tok bilong Bikpela, yupela i mas i kam long em. Yupela i mas daunim yupela yet na mekim pasin i stret. Sapos yupela i mekim olsem, orait taim Bikpela i belhat na bekim pe nogut long ol manmeri, yupela bai i no inap bagarap.”—Sefanaia 2:3.

Wanem taim bai God i pinisim ol man nogut?

BAIBEL I TOK

Dispela samting bai kamap taim ol man long olgeta hap bilong graun i harim gutnius bilong Kingdom Bilong God, em dispela gavman we bai pinisim tru olgeta gavman bilong graun. (Daniel 7:13, 14) Jisas Krais i tok: “Na ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.” (Matyu 24:14) Wok autim tok i kamapim klia pasin marimari na stretpela pasin bilong God, na tu, i stap olsem wanpela bilong ol “sain” i soim olsem taim bilong pinis i klostu. Ol narapela sain i makim olsem pinis i klostu em, ol bikpela pait i kamap long olgeta hap bilong graun, ol bikpela guria, ol bikpela hangre, na ol man i kisim kain kain sik.—Matyu 24:3; Luk 21:10, 11.

Na tu, Baibel i tok profet long ol pasin ol man bai bihainim “long taim bilong las de.” Baibel i tok: “Long taim bilong las de, taim nogut bai kamap na dispela bai givim hatwok long ol man. Ol man bai laikim ol yet tasol, ol bai laikim tumas mani.  . . ol bai sakim tok bilong papamama . . . ol bai i no gat pasin bilong bosim bel, ol bai kamap wail olgeta, ol bai i no laikim ol gutpela pasin . . . ol bai i no laikim God, nogat, ol bai laikim kain kain amamas.”a—2 Timoti 3:1-5.

Ol dispela hevi i kirap long 1914 long Wol Woa 1, na dispela i makim haptaim bilong las de. Olsem na kirap long dispela taim, ol Witnes Bilong Jehova i amamas tru long tokaut long Kingdom Bilong God long olgeta hap bilong graun. Na nem bilong nambawan nius bilong ol em Wastaua i Tokaut Long Kingdom Bilong Jehova.

“Yupela i mas was i stap, long wanem, yupela i no save long dispela de o dispela aua.”—Matyu 25:13.