Malolo Long Hap i Stret

TAIM yumi toktok, pasin bilong malolo long hap i stret em i bikpela samting. Dispela em i tru maski yumi mekim wanpela tok o yumi toktok wantaim wanpela man. Sapos toktok i no gat malolo bilong en, ol tok bai i no klia liklik. Taim yu malolo long hap i stret long mekim, dispela i save helpim ol man long kisim gut ol tok yu mekim. Na tu ol malolo inap mekim na ol bikpela tok yu kamapim bai pas strong long tingting bilong ol man.

Olsem wanem yu ken save yu mas malolo we? Ol malolo i mas longpela olsem wanem?

Malolo Long Ol Fulstop Samting. Taim yu raitim tok, ol fulstop samting em i bikpela samting. Em inap makim pinis bilong wanpela tok o makim wanpela askim. Long sampela tok ples ol i makim kirap na pinis bilong toktok man i mekim. Sampela i makim olsem wanem wanpela hap bilong sentens i pas wantaim narapela hap. Man i rit long em yet, em inap lukim ol fulstop samting. Tasol taim em i ritim tok bambai ol narapela i ken harim, nek bilong em i mas kamapim ol koma fulstop samting i stap long buk samting em i ritim. (Bilong kisim sampela save moa, lukim Stadi 1, “Ritim Stret.”) Sapos yu no bihainim ol fulstop samting, dispela bai mekim na ol narapela bai hatwok long kisim gut ol tok yu ritim o em bai paulim mining bilong tok yu ritim.

Ol fulstop samting na pasin bilong kamapim tingting i stap long wanpela sentens inap makim wanem hap i stret long malolo long en. Wanpela man i gat nem long wokim musik i tok: “Pasin bilong mi long kamapim ol wan wan krai bilong musik long piano i no winim ol narapela man i save paitim piano. Tasol pasin bilong malolo namel long ol wan wan krai bilong musik, dispela i makim hapman bilong paitim piano.” Em i wankain long pasin bilong toktok. Taim yu mekim gutpela wok long ol malolo, dispela bai mekim na tok yu bin redim gut i krai gut tru na i kamapim mining bilong en.

Taim yu redim ol tok yu bai ritim long ol man, ating sapos yu putim sampela mak long dispela buk samting yu bai ritim, em bai helpim yu. Droim wanpela liklik mak bilong makim wanpela sotpela malolo tru. Droim tupela liklik mak olsem bilong makim malolo i longpela moa. Sapos yu painim hatwok long kolim sampela tok na yu save malolo long hap i no stret, orait kisim pensil na makim ol tok i insait long dispela hap tok i hatwok long kolim. Orait nau ritim dispela hap tok kirap long stat bilong en i go inap long pinis. Planti man i save gut long mekim tok i save mekim olsem.

Taim yu toktok long ol samting bilong ol wan wan de yu no gat hevi long pasin bilong malolo, long wanem, yu save long tingting yu laik kamapim. Tasol sapos yu kisim pasin bilong malolo nating namel long ol tok yu mekim, maski i no gat wok long dispela malolo, orait tok yu mekim bai i no gat strong na bai em i no klia. Ol tok bilong helpim yu long winim dispela hevi i stap long Stadi 4, “Toktok i Ron Gut.”

Malolo Taim Yu Laik Kamapim Nupela Tingting. Taim yu stori pinis long wanpela bikpela tok na yu laik kirap stori long narapela, sapos yu malolo namel long dispela tupela tok, odiens bilong yu inap tingting long tok yu mekim pinis na redi long harim narapela tok, na ol inap luksave olsem nau bai yu stori long narapela samting, olsem na ol bai redi long kisim klia nupela tingting yu laik kamapim. Em i bikpela samting long malolo taim yu stori pinis long wanpela tingting na yu laik kirap stori long nupela tingting. Em i wankain olsem draiva bilong ka i mas go isi isi liklik taim em i tanim ka long kona bilong lusim wanpela rot na go long narapela.

Sampela i save stori long wanpela samting na kwiktaim ol i kirap stori long narapela, long wanem, ol i laik stori long planti samting tumas. Sampela i bihainim dispela pasin long olgeta tok ol i mekim. Ating olgeta man i stap klostu long ol i save bihainim wankain pasin. Tasol dispela i no gutpela rot bilong skulim man. Sapos yu gat sampela tok bilong mekim i gutpela long ol man i ken harim na tingim, orait lusim hap taim bilong kamapim klia dispela tok. Yu mas malolo bambai ol man i ken kisim klia ol tok yu kamapim.

Sapos yu bai mekim wok long wanpela autlain, orait yu mas stretim gut tok bilong yu bambai em i klia tru olsem yu bai malolo we namel long ol bikpela tok. Sapos yu bai ritim wanpela manuskrip, orait makim ol hap we manuskrip i lusim wanpela bikpela tok na i kirapim narapela.

Ol malolo yu mekim taim yu lusim wanpela bikpela tok na kirap stori long narapela, ol i longpela moa, winim ol malolo bilong ol fulstop samting. Tasol ol i no longpela tru na bai ol man i les long harim. Sapos ol i longpela tumas, ol man bai ting olsem yu no bin redim gut tok na yu wok long painim tok.

Malolo Bilong Strongim Tok. Planti taim ol malolo bilong strongim tok i save kamap paslain o bihain long wanpela tok o wanpela askim man i strongim nek na mekim. Kain malolo olsem i larim ol man i tingting long dispela tok nau tasol ol i bin harim, o kain malolo olsem i save kirapim ol man long i gat laik long save long ol tok bai kamap bihain. Dispela tupela samting i no wankain. Tingim wanem pasin i stret long mekim. Tasol tingim: Taim yu malolo bilong strongim tok, yu mas mekim tasol long ol tok i bikpela tru. Sapos yu mekim ol malolo bilong strongim tok planti taim, ol man i no inap kisim gut ol tok i bikpela tru.

Taim Jisas i ritim tok bilong Baibel long haus lotu long Nasaret, em i mekim gutpela wok long pasin bilong malolo. Pastaim em i ritim buk bilong profet Aisaia i stori long wok em i kisim. Tasol paslain long kamapim mining bilong en, em i pasim buk na givim bek long man bilong lukautim ol buk, na em i sindaun. Orait, olgeta man i stap long haus lotu i lukluk long em, na em i tok: “Dispela tok bilong buk bilong God yupela i harim pinis, nau tasol em i kamap tru.”​—Lu. 4:​16-21.

Malolo Taim Sampela Samting i Kamap. Sampela taim ol samting i save kamap na i katim tok bilong yu na yu mas malolo long tok yu mekim. Ating long taim bilong autim tok nois bilong ol ka o krai bilong wanpela bebi inap katim tok yu mekim wantaim man. Sapos long ples bung nois i no bikpela tumas, ating yu inap apim nek na toktok yet. Tasol sapos nois i bikpela na i stap longpela taim liklik, yu mas malolo. Long kain taim olsem ol man i no save putim yau. Olsem na mekim gutpela wok long pasin bilong malolo bilong helpim ol man long kisim gut ol tok yu laik autim long ol.

Malolo Bilong Larim Man i Bekim Tok. Ating long tok yu mekim i no gat rot bilong ol man i ken bekim sampela tok, tasol em i bikpela samting long larim liklik hap taim bilong ol man long bekim tok long tingting bilong ol. Sapos yu kamapim sampela askim bilong kirapim tingting bilong ol man, tasol yu no malolo liklik, ol samting yu laik bai ol dispela askim i mekim bai lus.

Em i bikpela samting long malolo taim yu mekim tok long pletfom na tu long taim yu autim tok long ol narapela. Sampela man i no save malolo liklik taim ol i toktok. Sapos dispela em i pasin bilong yu, orait wok strong long kisim pasin bilong malolo. Dispela bai helpim yu long toktok gut wantaim ol narapela na em bai mekim wok bilong yu long autim tok i kamap gutpela moa. Pasin bilong malolo i save strongim tok, na kirapim ol man long putim yau, na i gutpela long yau.

Taim yu toktok wantaim narapela i olsem tingting i go i kam namel long yutupela. Ol man bai putim yau long tok yu mekim sapos yu save putim yau long tok bilong ol na yu laik harim tok ol i mekim. Bilong mekim olsem, yu mas malolo bilong larim ol i kamapim tingting bilong ol.

Wok autim tok bilong yumi i save karim gutpela kaikai moa taim yumi mekim olsem yumi toktok wantaim man. Bihain long tok gude long man, planti Witnes i save tokim man long samting ol i laik toktok long en na bihain ol i kamapim wanpela askim. Ol i malolo bilong larim man i bekim tok, na ol i mekim tok i soim olsem ol i bin harim tok man bilong haus i kamapim. Taim ol i toktok wantaim, dispela Witnes bai larim man bilong haus i kamapim tingting bilong em planti taim. Ol i save ol inap helpim gut man sapos ol i save long tingting bilong em long dispela samting ol i toktok long en.​—Snd. 20:5.

Yumi no ken ting olsem olgeta man bai bekim ol askim long gutpela pasin. Tasol dispela i no pasim Jisas long larim ol birua bilong em i bekim tok. (Mk. 3:​1-5) Taim yu larim narapela i toktok, dispela i save kirapim em long wokim tingting, na sampela taim em bai kamapim tingting i stap long bel bilong em. Wanpela as na yumi autim tok em i olsem, yumi laik tokim ol man long sampela bikpela tok bilong Baibel em ol i mas tingim gut na makim samting ol bai mekim.​—Hi. 4:12.

Pasin bilong malolo long taim stret em i samting yumi mas mekim taim yumi autim tok. Taim yumi mekim gutpela wok long ol malolo, ol man inap kisim klia tingting yumi kamapim na ol i save tingim yet longpela taim bihain.