Sapta 3
Holimpas Tok Bilong God
1. (a) Wanem samting i painim lain Israel bilong bipo na ol i save tok bilong God i tru? (b) Bilong wanem yumi mas tingim dispela samting?
“YUPELA i save pinis, God, Bikpela bilong yumi i bin givim yupela olgeta gutpela samting em i bin promis long givim yupela. Olgeta samting em i bin promis long mekim, ol i kamap pinis, na i no gat wanpela promis i popaia.” ( Josua 23:14-16) Em tok Josua i mekim long ol hetman bilong lain Israel taim ol i sindaun pinis long Graun Bilong Promis. Yes, ol tok promis bilong Jehova i bin kamap tru. Dispela stori—na olgeta narapela tok bilong Baibel—i stap bilong yumi ken “wetim God i kisim yumi.”—Rom 15:4.
2. (a) Olsem wanem ‘spirit bilong God i bin kamapim olgeta tok bilong Baibel’? (b) Yumi save olsem spirit bilong God i bin kamapim ol tok bilong Baibel, olsem na yumi gat wanem wok?
2 Maski 40 man i bin raitim ol tok bilong Baibel, Jehova yet i As bilong en. Olsem wanem? Dispela i makim olsem em yet i stiaim wok bilong raitim olgeta tok bilong Baibel? Yes em i mekim. Em i mekim olsem long rot bilong strongpela holi spirit bilong em, olsem strong bilong em. Aposel Pol i tok tru olsem: “Spirit bilong God yet i bin kamapim olgeta tok i stap long buk bilong God. . . . Dispela tok i mekim yumi ol manmeri bilong God i kisim tru olgeta gutpela pasin, na em i mekim yumi i redi long mekim olgeta kain gutpela wok.” Ol manmeri long olgeta hap husat i bilip long dispela tok, ol i harim tok bilong Baibel na bihainim long wokabaut bilong ol.—2 Timoti 3:16, 17; 1 Tesalonaika 2:13.
Helpim Ol Narapela Long Tingim Baibel
3. Wanem gutpela rot tru bilong helpim ol man i no save bilip olsem Baibel em i Tok Bilong God?
3 Ol man yumi autim tok long ol, sampela i no bilip olsem Baibel em i Tok Bilong God. Olsem wanem yumi ken helpim ol? Wanpela gutpela rot i olsem: Yumi mas opim Baibel na soim ol long ol tok i stap long en. “Tok bilong God em i gat laip, na em i wok strong i stap. Em i sap moa, na i winim bainat i gat tupela sap. . . . Em i save gut tru long olgeta tingting na laik bilong bel bilong yumi.” (Hibru 4:12) “Tok bilong God” i no stori tasol long ol samting i bin kamap bipo na i pinis, nogat; em i gat laip! Ol tok promis bilong Baibel i wok long kamap tru. Tok bilong Baibel i gat strong moa na em inap kirapim tru bel bilong man, winim ol tok yumi yet inap mekim.
4. Wanem ol tok i tru bilong Baibel i bin senisim tingting bilong sampela man long Baibel? Bilong wanem ol i senisim tingting?
4 Planti man i laik skelim gut tok bilong Baibel taim ol i lukim nem bilong God long en. Sampela ol i laik stadi long Baibel taim ol i lukim ol tok Baibel i mekim long as bilong i stap bilong yumi, o bilong wanem God i larim pasin nogut i stap, o as bilong ol samting i wok long kamap long nau, o yumi ken wet long kisim laip oltaim long Paradais long graun. Long ol kantri we ol pasin bilong lotu i save opim rot bilong ol spirit nogut long mekim nogut long ol man, ol tok bilong Baibel long as bilong dispela samting na olsem wanem ol man i ken sakim ol spirit nogut, i bin kirapim laik bilong ol man long save long Baibel. Bilong wanem ol man i gat gutpela bel i pilim tru ol dispela samting? Long wanem, Baibel tasol i kamapim stretpela save long ol dispela bikpela samting.—Song 119:130.
5. (a) Taim sampela manmeri i tok ol i no bilip long Baibel, ating i gat wanem as bilong dispela? (b) Olsem wanem yumi inap helpim ol kain man olsem?
5 Tasol olsem wanem sapos sampela man i tokim yumi olsem ol i no bilip long Baibel? Ating yumi no ken toktok moa wantaim ol? Nogat. Sapos ol i laik skelim tok, yumi ken toktok wantaim ol. Ol inap ting Baibel em i buk bilong lain Kristendom. Pasin bilong ol lotu long giaman, na insait long wok politik, na singaut long mani, dispela inap mekim na ol man i no laikim Baibel. Gutpela sapos yu askim ol olsem ol i gat dispela tingting o nogat? Baibel i no orait long ol pasin bilong graun em lain Kristendom i save bihainim, na tu, yu ken skelim pasin bilong ol wantaim lotu Kristen tru, na ating dispela bai kirapim laik bilong ol long save long Baibel.—Maika 3:11, 12; Matyu 15:7-9; Jems 4:4.
6. (a) Wanem samting i kirapim yu long bilip olsem Baibel em i Tok Bilong God? (b) Wanem samting moa yumi ken mekim wok long en bilong helpim ol man long bilip olsem Baibel i kam long God?
6 Yumi ken helpim sampela man taim yumi tokim ol long ol samting i kamapim klia olsem spirit bilong God i as bilong ol tok bilong Baibel. Wanem samting i kirapim yu yet long bilip olsem Baibel i kam long God Jehova? Em tok Baibel yet i mekim long husat i as bilong ol tok bilong en? O yu bilip olsem God em i as bilong ol tok bilong Baibel, long wanem, planti tok profet bilong Baibel i kolim stret ol samting i mas kamap bihain? (2 Pita 1:20, 21) O yu bilip, long wanem, ol tok bilong Baibel i stret wantaim, maski 40 man i bin raitim ol tok bilong en insait long 1,600 yia samting? O yu tingim ol tok bilong en i stret wantaim saiens, maski ol narapela rait bilong dispela taim bipo i no olsem? O ol man i raitim Baibel ol i no haitim rong o popaia bilong ol? O ol birua i bin wok long bagarapim Baibel, tasol Baibel i stap yet? Wanem wanem samting i bin kirapim tingting bilong yu long bilip long Baibel, yu ken mekim wok long en bilong helpim ol man long bilip olsem Baibel i kam long Jehova.a
Yumi Yet i Ritim Baibel
7, 8. (a) Yumi mas mekim wanem long Baibel? (b) Yumi yet i mas ritim Baibel na yumi mas kisim wanem samting moa? (c) Long wanem rot yu yet i bin kisim save long ol samting Jehova i laik mekim?
7 Yumi mas helpim ol narapela man long bilip long Baibel, na tu, yumi yet i mas makim taim bilong ritim Baibel long olgeta de. Yu save mekim olsem? Long olgeta buk ol i bin wokim, dispela buk i nambawan bikpela buk. Tasol yumi no ken ting yumi inap i stap wanpis na ritim Baibel na i no gat wok long narapela i helpim yumi. Baibel i mekim tok lukaut long dispela samting. Yumi no ken ting yumi yet inap skelim ol tok bilong en na kisim save long ol samting. Bilong kamap Kristen i gat stretpela tingting, yumi yet i mas stadi na go oltaim long ol miting bilong lain bilong God.—Sindaun 18:1; Hibru 10:24, 25.
8 Baibel i stori long wanpela bikman bilong Itiopia i ritim tok profet bilong Aisaia. Wanpela ensel i tokim Kristen Filip long askim dispela man olsem: “Yu save long as bilong dispela tok yu ritim, o nogat?” Long pasin daun man Itiopia i tok: “Sapos i no gat man i tokim mi long as bilong dispela tok, orait bai mi inap save olsem wanem?” Em i askim Filip long kamapim mining bilong dispela skripsa. Filip i no save stap wanpis na ritim Baibel na nau em i kamapim tingting bilong em yet long ol skripsa, nogat. Em i pas gut wantaim oganaisesen bilong God long graun. Olsem na em inap helpim man Itiopia long kisim ol tok Jehova i kamapim long rot bilong dispela oganaisesen. (Aposel 6:5, 6; 8:5, 26-35) Long nau tu, i no gat wanpela man em yet inap kisim stretpela save long ol samting Jehova i laik mekim. Yumi olgeta i mas kisim helpim Jehova i save givim long rot bilong oganaisesen bilong em long graun.
9. Wanem pasin bilong ritim Baibel inap helpim yumi olgeta?
9 Bilong helpim yumi long save gut long tok bilong Baibel, oganaisesen bilong Jehova i save wokim kain kain gutpela buk i kamapim ol tok bilong Baibel. Na tu, long olgeta kongrigesen bilong ol Witnes Bilong Jehova long olgeta hap, i gat sediul bilong ritim Baibel long Skul Tiokratik Bilong Autim Tok. Yumi ken kisim bikpela helpim tru taim yumi yet i skelim tok bilong Baibel. (Song 1:1-3; 19:7, 8) Wok strong long ritim Baibel long olgeta de. Maski yu no save gut long olgeta tok, taim yu ritim Baibel yu kisim save long ol bikpela tok na dispela bai helpim yu tru. Olsem: Sapos yu ritim 4-pela o 5-pela pes tasol long wanpela de, yu inap ritim Baibel olgeta insait long wanpela yia.
10. (a) Wanem taim yu save ritim Baibel? (b) Husat tu i mas insait long wok bilong ritim Baibel? Bilong wanem em i bikpela samting long ritim Baibel long olgeta de?
10 Wanem taim yu inap ritim Baibel? Sapos yu makim 10 o 15 minit long olgeta de, dispela bai helpim yu tru. Sapos yu no inap mekim olsem, orait makim sampela hap taim long olgeta wik bilong ritim Baibel na bihainim dispela sediul. Sapos yu marit, yu na poroman bilong yu i ken ritim Baibel wantaim. Sapos yu gat ol pikinini na ol inap long rit, ol i ken senis senis long ritim Baibel long maus. Pasin bilong ritim Baibel em i mas kamap samting yumi mekim long olgeta de yumi stap laip, kain olsem yumi save kaikai long olgeta de. Yu save, sapos man i no kisim gutpela kaikai, em bai kisim sik. Na i wankain tu long ol samting bilong spirit. Bilong kisim laip oltaim, long olgeta taim yumi mas kisim “olgeta tok bilong God.”—Matyu 4:4.
As na Yumi Ritim Baibel
11. I gat wanem as na yumi laik ritim Baibel?
11 I gat wanem as na yumi laik ritim Baibel? Yumi no laik inapim sampela pes tasol. Yumi laik save gut long God na bai yumi ken laikim em moa na lotuim em long pasin em i laikim. ( Jon 5:39-42) Yumi mas i gat wankain tingting olsem bilong wanpela man i raitim Baibel, em i tok: “God, yu mas skulim mi long gutpela pasin bilong yu, na soim mi long rot bilong yu.”—Song 25:4.
12. (a) Bilong wanem em i bikpela samting long kisim stretpela save? Taim yumi ritim Baibel, ating yumi mas mekim wanem na bai yumi inap kisim dispela save? (b) Yumi ken tingim wanem 4-pela tok bilong helpim yumi long skelim gut ol tok yumi ritim long Baibel? (Lukim blok long pes 30.) (c) Stori long ol dispela samting na bekim ol askim i stap long dispela paragraf. Lukim ol skripsa em paragraf i no kamapim tok bilong en.
12 Taim Jehova i skulim yumi, yumi mas i gat laik long kisim stretpela save. Sapos yumi no kisim dispela samting, olsem wanem yumi inap bihainim gut Tok Bilong God long wokabaut bilong yumi o kamapim gut mining bilong en long ol narapela? (Kolosi 3:10; 2 Timoti 2:15) Bilong kisim stretpela save, yumi mas ritim gut ol tok, na sapos wanpela hap i gat strongpela tok, ating yumi mas ritim tupela o tripela taim bilong kisim gut mining bilong en. Na em bai helpim yumi tu sapos yumi lusim hap taim bilong tingim tingim long bel, na skelim ol tok yumi ritim. Long pes 30 i gat fopela samting yumi ken tingim taim yumi ritim Baibel. Yu ken skelim planti hap bilong Baibel taim yu tingim wanpela o tupela bilong ol dispela tok, na dispela bai helpim yu. Taim yu bekim ol askim i stap long ol pes i kamap bihain, bai yu pilim dispela samting.
(1) Planti taim bai yu lukim olsem, hap tok bilong Baibel yu ritim i helpim yu long save long pasin tru bilong Jehova. Olsem: Song 139:13, 14 i kamapim olsem God i tingim tru ol pikinini i stap yet long bel. “Yu bin wokim olgeta hap bilong bodi bilong mi. Yu wokim mi olgeta insait long bel bilong mama. Mi pret long yu, olsem na mi save litimapim nem bilong yu. Olgeta samting yu wokim i narakain na i nambawan tru. Mi save gut long dispela samting na mi pilim tru.” Tru tumas, ol samting Jehova i bin wokim i nambawan tru! Pasin bilong em long wokim ol man i kamapim klia olsem em i laikim yumi tru.
Taim yumi ritim Jon 14:9, 10 i stori long pasin Jisas i bin mekim long ol narapela, yumi lukim pasin Jehova yet bai mekim long kain taim olsem. Taim yumi tingim dispela, yumi ken kisim wanem tingting long Jehova long ol stori i stap long Luk 5:12, 13 na Luk 7:11-15?
(2) Tingim olsem wanem dispela tok yu ritim i helpim bikpela as tok bilong Baibel. Dispela as tok i olsem: Long rot bilong Kingdom i stap long han bilong Jisas Krais, em Pikinini God i bin promis long en, Jehova bai kamapim klia olsem i stret em i stap Nambawan Bos, na em bai mekim nem bilong em i stap holi.
Olsem wanem Esekiel na Daniel i kamapim klia bikpela as tok bilong Baibel? (Esekiel 38:21-23; Daniel 2:44; 4:17; 7:7-14)
Olsem wanem Baibel i kamapim klia olsem Jisas em i dispela Pikinini God i tok promis long salim i kam? (Galesia 3:16)
Olsem wanem Kamapim Tok Hait i stori long bikpela samting bilong Kingdom bai kamap? (KTH 11:15; 12:7-10; 17:16-18; 19:11-16; 20:1-3; 21:1-5)
(3) Askim yu yet long olsem wanem yu ken bihainim ol tok yu ritim. Kirap long Buk Kisim Bek i go inap long Lo, yumi ritim stori bilong pasin pamuk na pasin bikhet ol Israel i bin mekim. Yumi kisim save olsem ol dispela tingting na pasin i kamapim ol bikpela hevi. Olsem na bel bilong yumi i mas kirapim yumi long mekim ol samting Jehova i laikim na yumi no ken bihainim pasin nogut bilong ol Israel. “Dispela ol samting i bin kamap long ol, em i olsem piksa bilong ol arapela man i ken lukim. Ol man i bin raitim ol dispela stori long buk bilong God, bilong givim tingting long yumi ol man i stap long dispela taim nau, em taim dispela graun klostu i laik pinis.”—1 Korin 10:11.
Stori bilong Kein i kilim i dai Abel i skulim yumi long wanem samting? (Stat 4:3-12; Hibru 11:4; 1 Jon 3:10-15; 4:20, 21)
Ol tok bilong Baibel i go long ol Kristen i wet long kisim laip long heven, ol dispela tok i stret tu long ol man i wet long kisim laip oltaim long graun? (Namba 15:16; Jon 10:16)
Maski yumi gat gutnem long kongrigesen, i gat wanem as na yumi mas tingting long olsem wanem yumi ken bihainim moa yet ol tok bilong Baibel yumi save pinis long en? (2 Korin 13:5; 1 Tesalonaika 4:1)
(4) Tingting long olsem wanem yu ken mekim wok long tok yu ritim bilong helpim ol narapela. Olgeta manmeri i save tingting planti long ol sik, olsem na yumi ken ritim ol samting Jisas i bin mekim bilong soim ol samting em bai mekim taim em i stap King long Kingdom bilong God: “Planti lain manmeri i kam long em. Na ol i bringim ol lek nogut na ol aipas na ol bun krungut na ol mauspas na planti arapela sikman tu, . . . na em i mekim ol i kamap orait.”—Matyu 15:30.
Stori bilong Jisas i kirapim bek pikinini meri bilong Jairus inap helpim husat? (Luk 8:41, 42, 49-56)
13. Wanem samting bai kamap sapos yumi wok long ritim Baibel na stadi wantaim oganaisesen bilong Jehova?
13 Pasin bilong ritim Baibel i helpim yumi tru taim yumi skelim ol dispela fopela tok i stap antap! Tru, em hatwok liklik long ritim Baibel. Tasol em inap helpim yumi inap oltaim, long wanem, taim yumi ritim Baibel bai yumi wok long kamap strong moa long ol samting bilong spirit. Pasin bilong ritim Baibel long olgeta de bai helpim yumi long i go klostu moa long gutpela Papa bilong yumi, Jehova, na ol brata Kristen bilong yumi. Em bai helpim yumi long bihainim dispela tok long “holimpas tok i gat laip.”—Filipai 2:15, 16.
[Futnot]
a Bilong kisim save long as na yumi mas skelim tok bilong Baibel, lukim buklet Yumi Stap Bilong Mekim Wanem? Yu Ken Save Olsem Wanem? long pes 10-16, em ol Witnes Bilong Jehova i wokim.
Stori Gen Long Ol Dispela Tok
• Bilong wanem ol i raitim Baibel na lukautim i kam inap long nau?
• Olsem wanem yumi ken helpim ol narapela man long laikim Baibel?
• Olsem wanem pasin bilong ritim Baibel oltaim inap helpim yumi? Yumi ken tingim wanem fopela tok taim yumi skelim ol tok yumi ritim?
[Blok/Piksa long pes 30]
TAIM YU RITIM WANPELA HAP BILONG BAIBEL, SKELIM DISPELA
Dispela tok i lainim yu olsem wanem long pasin bilong Jehova?
Olsem wanem em i stret wantaim bikpela as tok bilong Baibel?
Dispela tok i mas mekim wanem long i stap bilong yu yet?
Olsem wanem yu ken mekim wok long en bilong helpim ol narapela man?